شەۋكەت ئۇلۇغ كىچىك تىنىپ قويدى : - مەن سىزنىڭ كىيىنچە پۇشايمان قىلىپ قالماسلىقىڭىزنى ئۈمىد قىلىمەن . - بۇ نىمە دىگىنىڭىز ؟ مەن نىمىگە پۇشايمان قىلاتتىم ؟ ئادىلە شەۋكەتنىڭ بىر ئىشنى ئىغىزىدىن چىقىرالمايۋاتقانلىقىدىن گۇمان قىلىپ سورىدى : - شەۋكەت ئاكا، سىز بەختىيار ئاكامنىڭ شىركىتىدە دەسلەپتە قۇرۇلغاندىلا بار ئىكەنسىز، ئۇنداقتا سىز ئۇنىڭ ئايالى قەدىرىيەنى تونۇيسىزغۇ دەيمەن ؟ ئۇ ئايال قانداق ئۆلۈپ كەتكەن ؟ شەۋكەتنىڭ چىرايى بىردىنلا ئۆزگىرىپ تىلى تۇتۇلۇپ قالغان ئادەمدەك دۇدۇقلاپ ئادىلەدىن كۆزىنى ئىپ قاچتى : - قەدىرىيە شۇ كىسەل سەۋەبى بىلەن ئۆلۈپ كەتكەن، قالغان ئىشلارنى مەنمۇ ئىنىق بىلمەيدىكەنمەن . - مەن بەختىيار ئاكامدىن ئايالىنىڭ خامۇشلۇق كىسىلى سەۋەبىدىن ئۆلۈپ كەتكەنلىكىنى ئاڭلىغان، قىزىمۇ شۇ سەۋەپتىن خامۇشلۇق كىسىلىگە گىرىپتار بوپتىكەن، بىراق مىنىڭ ئازراق گۇمانىم بار، لىكىن گۇمانىمنى جەزىملەشتۈرەلمەيمەن، ئەگەر بەختىيار بىلەن توي قىلسام ئۇنىڭ بۇرۇنقى ئايالىدەك بەخىتسىز بوپ قالارمەنمۇ دەپ ئەنسىرەيمەن ، لىكىن ئۇنىڭ ماڭا تۇتقان پوزىتسىيەسى يەنىلا شۇنچىلىك تەمكىن، مەن قانداق قىلىشنى بىلەلمەي قالدىم . شەۋكەت ئادىلەگە قاراپ يىنىك بىرنى تىندى : - ئادىلە، بۇرۇنقى ئىشلارنى مەنمۇ ئىنىق بىلىپ كەتمەيمەن، بىراق توي ئىشىدا ئالدىراپ قارار چىقىرىپسىز، بەلكىم مەدىنە سىزنى ياخشى كۆرىشى مۇمكىن، بىراق سىز ئۇنىڭ ئاپىسىغا ئايلانغاندا، ئۇ بەلكىم ئەكىسچە مۇئامىلە قىلىشىمۇ مۇمكىن، شۇڭا بۇ ئىشنى توي قىلىشتىن بۇرۇن مەدىنەگە ئىيتسىڭىز توغرىمىكىن دەپ ئويلايمەن . ئادىلە شەۋكەتنىڭ بەزى ئىشلارنى ئۆزى ئاغزىدىن چىقىرالماي مەدىنە ئارقىلىق بىر ئىشلارنى بىلدۈرمەكچى بولغانلىقىنى غۇۋا ھىس قىلدى : - ماقۇل ، سىزنىڭ ماڭا توغرا تەكلىپ بىرىدىغانلىقىڭىزغا ئىشىنىمەن . ئادىلە ئاستا ئورنىدىن تۇردى : - شەۋكەت ئاكا، مىنىڭ يەنە ئازراق ئىشىم بار ئىدى، ۋاقتىم يەتسە سىزنى يەنە يوخلاپ كىلىمەن . - ھە بولىدۇ، بۈگۈن يوخلاپ كەلگىنىڭىزدىن بەكلا خۇشال بولدۇم . - ئەمسە ياخشى داۋالىنىڭ، مەن ماڭاي . ئادىلە خوشلىشىپ چىقىپ كەتتى، شەۋكەت ئۇ چىقىپ كىتىشىگە چىرايى باشقىچە ئۆزگىرىپ خىيالغا پاتقانچە جىمىپ قالدى . ئادىلە دوختۇرخانىدىن چىقىپ سائىتىگە قارىدى، سائەت ئىككىدىن ئاشقان ئىدى، ئۇ مەدىنەنى كۆرۈپ كىلىش ئۈچۈن يولدىن تاكسى توسۇپ بەختىيارنىڭ شەھەر سىرتىدىكى داچىسىغا قاراپ ماڭدى . قاھار نادىرەنىڭ ئارقىسىدىن چىقىپ كەچۈرۈم سورىغان بولسىمۇ، بايىقى ئىشلار نادىرەگە ئىغىر كەلگەچكە ئۇ قاھارغا پەرۋاسىز كىتىپ قالدى، ئىشلىرى ئىلگىرى باسمىغان قاھار بىر قاۋاققا كىرىپ ھاراق ئىچكەچ جەۋلانغا تىلفۇن قىلىپ يىنىغا كىلىشىنى ئىيتتى، ھايال قالمايلا جەۋلان ئۇ دىگەن قاۋاققا كەلدى ، جەۋلان قاھارنىڭ كەيپىياتىغا قاراپ سورىدى : - نىمە بولدۇڭ ؟ نادىرە بىلەن سوقۇشۇپ قالدىڭما ؟ قاھار جەۋلان كەلگەندە سەل تەڭشىلىپ قالغان بولۇپ، جەۋلاننى كۆرۈپ بايىقى ئىشلارنى يىپىدىن يىڭنىسىغىچە جەۋلانغا ئىيتىپ، ئادىلە ئۈستىدىن شىكايەت قىلىپ قاخشاپ كەتتى . - سەن نىمىشقا ئۇنداق قىلىسەن ؟ ئادىلە ئىككىمىز ئاللىقاچان ئايرىلىپ كەتتۇق، بۇ ئىشقا سىنىڭ ئارلىشىشىڭنىڭ ھاجىتى يوقتى . جەۋلان سەل نارازى بولغاندەك قاھارغا گۆلىيىپ قويدى . - بۇنداق قىلىشىم سەن ئۈچۈن، سەن يەنە مىنى ئەيىپلەۋاتامسەن ؟ قاھار ئاچچىقىدا يەنە بىر رومكا ھاراقنى گۈپۈلدىتىپ ئىچىۋەتتى . - بولدى ئىچمە، ئەمدى بولدى قىل . جەۋلان ئۇنىڭ قولىنى تۇتىۋىلىپ : - سەن يىقىندا نادىرە بىلەن توي قىلىسەن، بۇ يەردە بۇنداق ئىچىپ يۈرسەڭ قانداق بولىدۇ ؟ مىنىڭچە نادىرەنىڭ كۆڭلى چوقۇم بەك يىرىم، سەن ئەسلى ئۇنىڭ كۆڭلىنى ئالساڭ بولاتتى . - مەن توي قىلمايمەن . تۇيۇقسىز ئىيتىلغان سۆزدىن جەۋلان چۆچۈپ كەتتى : - ساراڭمۇ سەن ! ئىككى تەرەپ پۈتۈشۈپ بولغان ئىشنى سەن بىر ئىغىز گەپ بىلەن يوق قىلماقچىما ؟ - مىنىڭ ھاياتىم ئاللىقاچان نابۇت بوپ بولغان، بەخىتتىنمۇ تامايىم يوق، مەن ھازىر ھىلىقى ئەلى دىگەندىن ئۆچۈمنى ئالساملا ئاندىن ئاچچىقىم چىقىدۇ . قاھار خۇمارلاشقان كۆزلىرىنى جەۋلانغا تىكتى : - ھە راست، سەن ئادىلەدىن مىنىڭ قاشتىشى تۇمارىمنى ئىپ بەر، ئۇ نەرسە ماڭا لازىم . - نىمە تۇمار ؟ جەۋلان چۈشەنمىگەندەك قاھارنىڭ ئاغزىغا تىكىلدى . - ئەخمەق، مەن ساڭا دىگەنغۇ، ئەينى چاغدا ئادىلەنى شىركەتكە تەكلىپ قىلىش ئۈچۈن ئۇنىڭغا بىر تال قاشتىشى تۇمار بەرگەن، ئۇ تۇمارنىڭ ساختىسىنى مەن ئەلىنىڭ ئاسارە-ئەتىقە دۇكىنىدا كۆردۈم، ئەگەر ئادىلەدىكى تۇمارنى قولغا چۈشۈرۈپ، ئۇنىڭ ساختا ياكى ھەقىقىسى ئىكەنلىكىنى بىلسەملا ئەلىنىڭ ئاسارە-ئەتىقە دۇكىنى تۈگىشىدۇ . قاھار ئۆز ھۆكىمىدىن مەغرۇرلانغاندەك كۈلۈپ كەتتى . - قاھار، ئەلىنىڭ قانداق ئادەملىكىنى ئوبدان بىلىسەن، ئەگەر ئۇ سىنىڭ ئارقىسىدىن بىرەر ئىش قىلغىنىڭنى بايقاپ قالسىلا، ساڭا ھەم بىزگە ياخشى كۈن يوق، سەن ئاۋۋال بۇ ئىشلارنى قويۇپ نادىرە بىلەن تويۇڭنى قىلىۋال، ئەلىنىڭ ئىشىنى مەن بىر تەرەپ قىلاي، ئادىلەگە كەلسەك، سەن ھازىرچە ئۇنى ئاۋارە قىلما، مەنمۇ شۇنداق، بىر مەزگىل ۋاقىت ئۆتسۇن . - يەنە قاچانغىچە ساقلايمىز ؟ ئەلى ئىنىقلا قانۇنسىز تىجارەت قىلغۇچى تۇرسا ئۇنى بوش قويىۋەتسەك بولامدۇ ؟ - ھازىر قولىمىزدا ھىچقانداق ئىسپات يوق، ئەڭ مۇھىمى ئۇنىڭ تۇمشۇقىدىن ئىلىنغۇدەك بىر ئىسپات يوق، ئۇ ئادەم بەك ھىيلىگەر، سەن ھازىرلا ئۇنىڭغا قۇرالسىز ھوجۇم قىلساڭ ئۆلىدىغىنى ئىنىقلا سەن . - توغرا دەيسەن، بىراق… - بولدى، سەل تەڭشىلىپ قاپسەن، سىنى ئۆيگە ئاپىرىپ قوياي، قالغان ئىشلارنى ئۆزۈم بىر تەرەپ قىلىمەن، سىنىڭ ھازىرقى ۋەزىپەڭ نادىرە بىلەن تويۇڭنى ۋاقتىدا قىلىپ، ئەنقەر تاغامنى ھەم جاھانتاي تاغامنى خاتىرجەم قىلىش . - ماقۇل، سەن دىگەندەك بولسۇن . قاھار ئاخىرقى بىر رومكا ھاراقنى ئىچىۋەتتى : - ماڭايلى، سەل چارچاپ قالدىم . جەۋلان ئۇنى يۆلەپ تەسلىكتە ماشىنىغا ئىلىپ چىقتى، ئۇ قاھارنى ئۆيىگە ئاپىرىپ قويۇپ ئۆزى مۇھىم ئىش بىلەن يەنە سىرتقا ماڭدى . ئادىلە داچىغا كىلىپ مەدىنەنىڭ گۈللۈكتە يالغۇز ئولتۇرغىنىنى كۆردى، ئۇ تىۋىش چىقارماي ئۇنىڭ يىنىغا كىلىپ : - مەدىنە ! دەپ چاقىردى كۈلۈمسىرەپ . مەدىنە بىشىنى كۆتۈرۈپ ئادىلەگە قاراپ ئانچە ھەيران بولمىغاندەك يەنە گۈل تەرەپكە قاراپ جىمجىت ئولتۇردى، ئۆزىگە تۇتقان پوزىتسىيەسى تۇيۇقسىز ئۆزگىرىپ قالغان ئادىلە مەدىنەنىڭ يىنىدا ئولتۇرغاچ سورىدى : - خىلى ياخشى بوپ قالدىڭىزمۇ ؟ مەدىنە بىشىنىمۇ كۆتۈرمەستىن : - ھەئە ياخشى، دىدى ئادىيلا قىلىپ . ئادىلە مەدىنەنىڭ تۇيۇقسىز ئۆزىگە تۇتقان مۇئامىلىسىدىن ئۇنىڭ بىر ئىشتىن خاپا بوپ قالغانلىقىنى ھىس قىلىپ سورىدى : - سىزگە نىمە بولدى ؟ مەندىن رەنجىپ قالدىڭىزما ؟ مەدىنە بىشىنى كۆتۈرۈپ ئادىلەگە تىكىلدى : - ئادىلە ئاچا، ئاڭلىسام دادام بىلەن توي قىلىدىكەنسىز، بۇ راستمۇ ؟ تۇيۇقسىز ئىيتىلغان سۆز ئادىلەنى گاڭگىرىتىپ قويدى : - نىمە ؟ بۇنى سىز قەيەردىن ئاڭلىدىڭىز ؟ - مەن تور ئوينىيالايمەن، دادام ئىككىڭلار مىنى ھىچنىمىنى بىلمەيدۇ دەپ ئويلايسىلەر، بىراق مەن ھەممىنى بىلىمەن . - سىز، سىز نىمىنى بىلىسىز ؟ ئەجەبا مىنىڭ دادىڭىز بىلەن توي قىلىشىمنى خالىمامسىز ؟ مەدىنە بىردىنلا جىمىپ قالدى . - نىمىشقا گەپ قىلمايسىز ؟ مەدىنە، مەن سىزگە چىن كۆڭلۈمدىن ياردەم قىلىشنى خالايمەن، ئەگەر خالىسىڭىز سىزگە ئاپا بولۇشقىمۇ رازىمەن . - ياق، خالىمايمەن، سىز ئاپام بولسىڭىز بولمايدۇ . مەدىنەنىڭ ھەسرەتلىك تىكىلگەن كۆزلىرى ئادىلەنى ئويلاندۇرۇپ قويدى . - نىمىشقا ؟ مىنى ياقتۇرمامسىز ؟ - ئۇنداق ئەمەس ، سىزنى ئاچام بولسىكەن دەيمەن، ئاپام ئەمەس . ئادىلە پەس ئاۋازدا سورىدى : - ئاپىڭىزنى سىغىندىڭىزمۇ ؟ مەدىنە بىردىنلا ئورنىدىن تۇرۇپ : - مەن، مەن… ئۇ تۇيۇقسىز يىقىلىپ چۈشتى . - مەدىنە ! مەدىنە !… ئادىلە سەل ئالدىراقسانلىق قىلىپ ئۇنىڭ كىسىلىنى قوزغىتىپ قويغانلىقىدىن پۇشايمان قىلىشقا باشلىدى، ئۇ خىزمەتكارلارنىڭ ھەمراھلىقىدا مەدىنەنى ھوجىرىسىغا ئەكىرىپ ياتقۇزدى . ئادىلە تاكى مەدىنە ھوشىغا كەلگۈچە يىنىدا قاراپ ئولتۇردى، قاش قارايغاندا مەدىنە كۆزىنى ئىچىپ ئادىلەنى كۆرۈپلا يانغا قاراپ يىتىۋالدى . - مەدىنە ئويغاندىڭىزما ؟ بايىقى ئىشتا سىزدىن كەچۈرۈم سورايمەن . مەدىنە ئۈندىمىدى، ئادىلە ئامالسىز ئورنىدىن تۇردى : - كەچ كىرەي دەپتۇ، مەن قايتىپ كىتەي، سىزنى باشقا كۈنى يوخلاپ كىلىمەن . ئۇ ئۈمىدسىز كۆزلىرىنى يانغا قاراپ جىمجىت ياتقان مەدىنەگە تىككىنىچە يىنىك ئۇھسىنىپ قويۇپ چىقىپ كەتتى . ئەتراپنى گۇگۇم پەردىسى ئورىغان بولۇپ، كەچكى شەپەقنىڭ ئاخىرقى نۇرلىرى داچا گۈللىكىنى سۇس يۇرۇتۇپ تۇراتتى، ئادىلە قانداق قايتىشىنى بىلەلمەي تۇرغىنىدا تىلفۇنى سايرىدى ، ئىكراندا جەۋلاننىڭ نۇمۇرى تۇراتتى . - جەۋلان ؟ ئادىلە سەل ئويلىنىپ تىلفۇننى ئالدى : - ۋەي، جەۋلان ياخشى تۇرىۋاتامسىز ؟ - ياخشى، ئۆزىڭىزچۇ ؟ - مەنمۇ ياخشى، قانداق، مىنى ئىزدەيدىغان بىرەر ئىشىڭىز بارمىدى ؟ - ھىچ، ھىچ ئىش يوق، شۇ سىز بىلەن كۆرۈشكەچ پاراڭلىشاي دىگەن ئىدىم . - جەۋلان، بىزنىڭ ئىشىمىز ئاللىقاچان… - بىلىمەن، سىزنى ئىزدىشىم ھەرگىزمۇ سىزنى بەختىيار بىلەن توي قىلىشتىن توسۇش ئەمەس، سىزدىن بىر نەرسىنى ئارىيەتكە ئالماقچى ئىدىم . - نىمە نەرسە ؟ ئادىلە ھەيران بوپ سورىدى . - سىزدە يۈرەك شەكىللىك ئاق قاشتىشى زەنجىر بارمۇ ؟ ئۇنى سىزگە قاھار سوۋغا قىپتىكەن . ئادىلە سەل ئويلىنىپ : - شۇنداق، ئۇنى ماڭا قاھار بەرگەن، بىراق ئۇ قاشتىشى زەنجىر نەگە چۈشۈپ قالدى ئىسىمدە يوق، بىر چاغ سومكامغا سىلىپ تۇيۇقسىز يۈتتۈرۈپ قويغان، ئەسلىدە ئۇنى قاھارغا ئۆز ۋاقتىدا قايتۇرۇپ بىرىشنى ئويلىغان، بىراق يۈتتۈرۈپ قويغانلىقىم ئۈچۈن بۇ ئىش ئىسىمدىن چىقىپ قاپتۇ . - ھە مۇنداقكەندە، ھىچقىسى يوق . - قاھار ئۇنى سورىدىما ؟ ئادىلە ئەجەپلىنىپ سورىدى . - ئۇ قاشتىشى ئۇنىڭغا بەكلا لازىم بوپ قاپتىكەن، پەقەت بىر نەچچە كۈن ئارىيەت ئىلىپ سىزگە قايتۇرۇپ بىرىشنى ئويلىغان، شۇڭا مىنىڭ دەپ بىقىشىمنى ئىيتقان ئىدى . - كەچۈرۈڭ، مەن ئالدىڭىزدا خىجىل بوپ قالدىم، ئۇنى يۈتتۈرۈپ قويمىغان بولسام بالدۇرلا ئىگىسىگە قايتقان بولاتتى . - بولدى ئۆزىڭىزنى ئەيىپلىمەڭ، بۇ يا چوڭ مەسىلە بولمىسا، ئەمسە سىزنى ئاۋارە قىلماي، خوش . تۇت تۇت… جەۋلاننىڭ تىلفۇنى ئۈزۈلۈش بىلەن ئادىلەنىڭ كۆڭلى بىر قىسما بولۇپ قالدى .
ئادىلە بىر-ئىككى بىسىپ داچىدىن پىيادە ئايرىلدى ، ئۇنىڭ كاللىسىدىكى مۈجىمەل سۇئاللارغا جاۋاپ يوق كۆڭلى پەرىشان ھالدا كىتىپ بارغىنىدا تىلفۇنى يەنە سايرىدى، ئادىلە تىلفۇن ئىكرانىدىكى بەختىيارنىڭ نۇمۇرىنى كۆرۈپ تىلفۇننى ئالدى : - ۋەي بەختىيار ئاكا ؟ - ئادىلە، كەچتە تاماقنى بىللە يەيلى، سىزنى ئالغىلى باراي . ئادىلە سەل دۇدۇقلاپ : - ھە، مەن بايا ئۆيدە سەل زىرىكىپ قالغاچقا مەدىنەنى كۆرگىلى داچىغا كەلگەن، بىراق ئۇنىڭ كەيپىياتى ئانچە ياخشى بولمىغاچقا قايتىپ كىتەي دەپ تۇرغان . - ھە شۇنداقمۇ ؟ بەك كەچ بوپ كەتتى، ئۇ يەردىن ماشىنا تاپالمايسىز، سىزنى ھازىرلا ئالغىلى باراي . - ھە ماقۇل . تىلفۇن ئۈزۈلگەندىن كىيىن ئۇ قەدىمىنى توختىتىپ كەينىدە قالغان داچىغا بىر رەت قارىۋەتتىدە، ئالدىغا قاراپ تىز-تىز مىڭىپ كەتتى، يىگىرمە مىنوتلارغا يىقىن ۋاقىت ئۆتۈپ ئەتراپ قاراڭغۇلىشىشقا باشلىغاندا، ئالدى تەرەپتىن كىلىۋاتقان ماشىنا چىرىغى ئادىلەنىڭ قورقۇپ تۇرغان يۈرىكىنى سەل ئورنىغا سالدى، ماشىنا يول بويىدا پىيادە كىتىۋاتقان ئادىلەنىڭ يىنىغا كەلگەندە توختىدى، بەختىيار ماشىنىدىن چۈشۈپ ئادىلەنىڭ يىنىغا كەلدى ۋە كۆيۈمچانلىق بىلەن ئۈستىدىكى چاپىنىنى سىلىپ ئۇنىڭ مۈرىسىگە ئارتتى : - ھاۋا سوغۇق تۇرسا نىمىشقا داچىدا ساقلاپ تۇرمىدىڭىز ؟ قارىڭە، چىرايىڭىزدىن قورقۇپ كەتكەندەك تۇرىسىز، بۇ يەر دالا، بىرەر ئۆينىڭ قارىسىمۇ بولمىسا نىمىشقا يالغۇز پىيادە ماڭىسىز دەيمەن ؟ ئادىلە ئۈندىمىدى، بەختىيار ئۇنى تارتىپ ماشىنىغا ئىلىپ چىقتى، ماشىنا كەڭرەك يول بۆلىكىدە قايرىلىپ شەھەر ئىچىگە قاراپ ماڭدى . شاھيار بۇ بىر مەزگىلدە شىركەتنىڭ ئىشلىرى بىلەن ئالدىراش يۈرۈپ باشقا ئىشلارغا دىگەندەك كۆڭۈل بۆلۈپ كىتەلمىدى، لالە بولسا ھىلىقى تۇتقۇن قىلىش ئىشىدىن كىيىن شەخسىي ماشىنىدىن بىرنى سىتىۋىلىپ، ئىشتىن چۈشسىلا ئۇدۇل ئۆيىگە قايتىدىغان بولدى، شاھيار ئىككىسىنىڭ ئۇچىرىششىمۇ كۈندىن-كۈنگە ئازلاپ كەتتى، شاھيار ئادىلەنىڭ توي ئىشىدىن كىيىن لالەگە ئانچە كۆڭۈل بۆلۈپ كىتەلمىگەن ئىدى، ئۇ بۇ مەزگىلدە خاتىرىسىنى ئەسلىگە كەلتۈرۈش ئۈچۈن مىڭە كىسەللىكلىرى دوختۇرخانىسىدا خىمىيىلىك داۋالاشنى قوبۇل قىلدى، بۈگۈنمۇ ئۇ يەنە دوختۇرخانىغا كەلدى . دوختۇر ئۇنىڭ مىڭە قىسمىنى تەكشۈرۈپ، داۋالاش جەريانىدا ئازراق ئۈنىمى بولغانلىقىنى ھىس قىلدى، دوختۇر ئۇنى ئانالىز ئۆيىدىكى خىيالىي سىزىم ئورۇندۇقىدا ئولتۇرغۇزۇپ چوڭ نۇر قايتۇرغۇچنى ئاچتى، شاھيار كۆزىنى يۇمۇپ بىر ئىشلارنى ئاستا خىيال قىلىۋاتاتتى، دوختۇر ئۇنىڭ ئىنكاسىغا ئاساسەن بەزى سۇئاللارنى سورىدى : - ئىلگىرىكى لايىقىڭىز نىمىش قىلاتتى ؟ شاھيار جىمجىت كۆزىنى يۇمۇپ كاللىسىغا چىرايلىق بىر قىزنىڭ سىماسىنى ئەكەلدى : - ئۇ، ئۇ مەن بىلەن بىر شىركەتتە ئىشلەيدۇ . - ئۇنداقتا سىز نىمە خىزمەت قىلىسىز ؟ شاھيار بىردەم ئويلىنىپ بىردىنلا لاپپىدە كۆزىنى ئىچىپ چىرايى باشقىچە ئۆزگىرىپ كەتتى . - بىرەر ئىش ئىسىڭىزگە كەلدىمۇ ؟ شاھيار چۆچىگەن ھالدا ئورنىدىن تۇرۇپ كەتتى : - ياق، ھىچنىمىنى ئىسىمگە ئالالمىدىم، مەن قايتاي . ئۇ دوختۇرنىڭ سۇئالىغا تومتاق جاۋاپ قايتۇرۇپلا چاپىنىنى ئىلىپ ئانالىز ئۆيىدىن چىقىپ كەتتى . شاھيار ماشىنىسىنى ھەيدەپ نىشانسىز كىتىپ باراتتى، ئۇنىڭ كاللىسىدا بولسا بايا خىياللىرىدا ئايان بولغان بەزى ئىشلار كىنۇ لىنتىسىدەك كۆز ئالدىدا ئايان بولماقتا ! شاھيار لالەنى كۆرۈپ كىلىش ئۈچۈن ئادىل ئەپەندىنىڭ داچىسىغا كەلدى، نەچچە ۋاقىتتىن بىرى كۆڭلىدە باشقا ئىشلارغا ئانچە ئىتىبار بىرىپ كىتەلمىگەن شاھيار ئادىل ئەپەندى ھەم لالەنىڭ قەلبىنىمۇ چۈشىنىپ قويۇش كىرەكلىكىنى ھىس قىلدى ، بۈگۈن يەكشەنبە بولغاچقا لالە ئۆيىدە ئارام ئالغان ئىدى، شاھيار كەلگەندە ئاتا-بالا ئىككەيلەن چۈشلۈك تاماق يىيىشكە تۇتىنىۋاتقان بولۇپ، شاھيار تاماققا ئۈلگۈرۈپ كەلگەن ئىدى . ئۇلار بىللە تاماق يىيىشتى، پاراڭلىرىمۇ ئادەتتىكى تىما بولۇپ بەك قىزغىن ئەمەس ئىدى، تاماقتىن كېيىن شاھيار لالەنى كىنۇ كۆرۈپ كىلىشكە تەكلىپ قىلغان بولسىمۇ، لالە كۆرىدىغان ماتىريالى بارلىقىنى ئىيتىپ ئۇنى چىرايلىق رەت قىلدى، لالە ھوجىرىسىغا كىرىپ كىتىشىگە، ئادىل ئەپەندى شاھيارنى مىھمانخانىدا پاراڭلىشىشقا قالدۇرۇپ، ئاشخانىدىن ئالاھىدە ئۆزى ياقتۇرۇپ ئىچىدىغان ھاراقتىن بىرنى ئىككى رومكا بىلەن ئاچىقتى ، شاھيار ئۇنىڭ ئۆزىگە دەيدىغان گىپى بارلىقىنى ھىس قىلىپ جىمجىت ئۇنىڭ ئىغىز ئىچىشىنى كۈتۈپ ئولتۇردى، ئادىل ھاراقنىڭ ئاغزىنى ئىچىپ ئىككى رومكىغا قويدى . - قىنى ئوغلۇم، تونۇشقىنىمىزغا خىلى ئۇزۇن ۋاقىت بوپتۇ ، بۇ ھاراقنى شۇنىڭ ھۆرمىتى ئۈچۈن كۆتۈرىۋىتەيلى . - قىنى ! شاھيار رومكا سوقۇشتۇرۇپ ھاراقنى ئىچىۋەتتى، ھاراقتا بىر خىل مىۋە تەمى بار بولۇپ، ئىغىزنىمۇ قورىمايتى . - شاھيار، لالە ئىككىڭلار تونۇشۇپ ئارلىشىپ يۈرگەنگە قەدەر مەن سىلەرگە ھەمراھ بوپ كىلىۋاتىمەن، ئاخىرىدا بىز يەنىلا سىزنىڭ تەلىۋىڭىز بويىنچە يۇرتقا قايتىپ كەلدۇق ، يۇرتقا قايتىپ كەلگەندىن بىرى خاتىرىڭىزدە بىر ئاز ئۆزگىرىش بولدىغۇ دەيمەن ؟ - بۇ نىمە دىگىنىڭىز ؟ گىپىڭىزنى تازا چۈشىنەلمىدىمغۇ ؟ - بولدى، بىزنى ئالدىماڭ، راستىنى ئىيتسام، سىزنىڭ كىم ئىكەنلىكىڭىزگە ئانچە قىزىمايتىم، پەقەت قىزىم ئىككىڭلارنىڭ ياخشى ئۆتۈپ كىتىشىنى ئۈمىد قىلاتتىم ، يىقىندىن بۇيان ئۇيقۇم ياخشى ئەمەس، دائىم غەلىتە چۈش كۆرىۋاتىمەن، خۇددىي لالە سىزدىن ئايرىلىپ قىلىپ مىنى تاشلاپ كىتىدىغاندەك تۇيغۇدا بولىۋاتىمەن . ئۇ شاھيارغا مۇنداقلا قاراپ قويدىدە، ئۇلۇغ كىچىك تىندى : - شاھيار، لالە ھادىسسىگە ئۇچىرىغاندىن بىرى ئۇنىڭدىن خاتىرجەم بولالماي قالدىم ، لالەنىڭ ئىشى يۈز بىرىشنىڭ ئالدىدا مىنى بىر يىگىت ئىزدەپ كەپتىكەن ، ئۇ سىزنىڭ ئىشلىرىڭىزنى مەندىن سورىغان ، يەنى، سىز بىلەن قانداق تونۇشۇپ قالغان ؟ سىزنىڭ نەدىن كەلگەن ۋە باشقا ئىشلىرىڭىز دىگەندەك… مەن سىزنىڭ بۇرۇنقى ئەسلىمىڭىزگە مۇناسىۋەتلىك بىرەرسى بولسا كىرەك دەپ ئۇ يىگىتكە ھىچنىمە دىمىدىم، سىزنى پەقەت گۇاڭجۇدا بىقىۋالغان ئاسىراندى ئوغلۇملا دەپ ئىيتتىم، ئۇ يىگىت گىپىمگە تازا ئىشەنمىدى ، تىخى نەچچە كۈننىڭ ئالدىدا يەنە باشقا بىر ئەرمۇ سىزنىڭ كىملىكىڭىز توغرىسىدا لالەنى ئىزدەپ كەپتىكەن، لالە ھىچنىمە دىمىگەن بولسىمۇ سەل ئەنسىرەپ قاپتۇ . - كىم كىمكەن ؟ ئۇ يىگىتنىڭ تەقى-تۇرىقى قانداقراقكەن ؟ يەنە ئۇ كىملىكىنى، نىمىشقا مىنى سۈرۈشتە قىلىدىغانلىقىنى ئىيتتىمۇ ؟ - ياق، ئۇ يىگىتنىڭ تەقى-تۇرىقىدىن قارىغاندا بىرسىنىڭ ھاۋالىسى بىلەن كەلگەن چىغى، گەپ-سۆزلىرى سەل گۇمانلىق، مەن سىزگە مۇناسىۋەتلىك ھىچنىمە دىمىدىم ، لالەمۇ ئالدىنقى قىتىملىق تۇتقۇن قىلىش ۋە ناتونۇش كىشىنىڭ سىزنى سۈرۈشتۈرۈش ئىشلىرىدىن سەل ئەنسىرەپ قاپتۇ . ئادىل شاھيارغا تىكىلدى : - شاھيار، بىزگە راستىڭىزنى ئىيتىڭ ، خاتىرىڭىز ئەسلىگە كەلدىمۇ ؟ - ياق، بۇرۇنقى ئىشلار غۇۋا ئىسىمدە ، بىراق تولۇق ئىسىمگە ئىپ بولالمىدىم ، كىملىكىم توغرىسىدا ھىچقانداق بىر نەتىجىمۇ يوق ، ئەگەر خالىسىڭىز ماڭا ئىلگىرىكى كىسەللىك ئارخىۋى لازىم . - بۇ بۇنى مەن بىلمەيمەن، سىز لالەدىن سوراپ بىقىڭ ، ئەينى چاغدىكى داۋالاش ئارخىۋى ئۇنىڭ قولىدا ئىدى . - ئەمسە مەن لالەدىن سوراپ باقاي، ھە راست، ئەگەر ناتونۇش كىشىلەر يەنە سىزنى ئىزدەپ مىنى سۈرۈشتۈرگىدەك بولسا قارشى تەرەپنىڭ كىملىكى ۋە باشقا مۇھىم تەرەپلىرىنى سورىۋىلىڭ . ئادىل بىشىنى سۇس لىڭشىتىپ قويدى . شاھيار لالەنىڭ ياتىقىغا كىرگەندە لالە كومپىيۇتىر ئالدىدا خىزمەت قىلىۋاتقان ئىدى، شاھيار ئۇنىڭ يىنىغا كىلىپ ئولتۇردى . - لالە، يىقىندىن بۇيان سىزگە كۆپ ھەمراھ بولالمىدىم، مەندىن رەنجىگىنىڭىزنى بىلىمەن، بىراق شىركەتتىكى ئىشلار… - بولدى، ماڭا چۈشەندۈرمىسىڭىزمۇ بولىدۇ، مەن ناھايىتى ياخشى، ھازىر خىزمەت ئورنۇمغىمۇ كۆنۈپ قالدىم ، باشقا ئىشلار مەن ئۈچۈن ئانچە مۇھىم ئەمەس . شاھيار يىنىك بىرنى تىنىپ : - ھە راست ، سىزدە مىنىڭ ئەينى چاغدىكى داۋالىنىش كىسەللىك ئارخىۋىم بار ئىدىغۇ دەيمەن ؟ ماڭا شۇ ماتىريالنى بىرىپ تۇرسىڭىز ؟ لالە قىلىۋاتقان ئىشلىرىنى قويۇپ شاھيارغا تىكىلدى : - شاھيار، مەن پەقەت ھۆسۈن تۈزەش دوختۇرى، سىزنىڭ داۋالىنىش ماتىريالىڭىزغا كەلسەك، ئۇنى باش دوختۇرخانا ئىپ قالغان ، مەندە ئۇ ماتىريال نىمىش قىلسۇن ؟ - بىراق سىز، ئۇ ماتىريالنى دوختۇرخانا باشلىغىدىن ئىلىۋالغان دىمىگەنمىدىڭىز ؟ سورىدى شاھيار ئەجەپلىنىپ . - مەن سىزنى ئالداپ قويغان، مەن پەقەت سىزنىڭ خاتىرىڭىزنىڭ تىزراق ئەسلىگە كىلىشى ئۈچۈن بەزى ئىشلاردا سىزنى ئالدىغان، بۇلارنىڭ ھەممىسى سىز ئۈچۈن… لالەنىڭ ئاچچىق بىلەن تىكىلگەن كۆزلىرىدە ئۈمىدسىزلىك چىقىپ تۇراتتى، ئۇ جىمجىت ئولتۇرغان شاھيارغا قاراپ : - سىز ئىلگىرىكى شاھيارغا ئوخشىماي قالدىڭىز، يۇرتقا كەلگەندىن بىرى شىركەتنىڭ ئىشلىرىنى دەپ ماڭا ئازراقمۇ كۆڭۈل بۆلمىدىڭىز ؟ ئىككىمىزنىڭ توي ئىشىنىمۇ بىر چەتكە قايرىپ قويدىڭىز ، ھەتتا، مەن ھادىسسىگە ئۇچىرىساممۇ ماڭا كۆڭۈل بۆلۈش ئۇياقتا تۇرسۇن، ئۆزىڭىز خالىغان ئىشنى قىلدىڭىز، ئىيتىڭە، مەن زادى نىمىگە ھىساپ ؟ لالە ئۆزىنى تۇتىۋالالماي يىغلاپ تاشلىدى، شاھيار ئۇنىڭ گەپلىرىنى ئاڭلاپ سەل خىجىللىق ھىس قىلدى : - كەچۈرۈڭ، كەچۈرۈڭ لالە، مەن شۇ… - بولدى سۆزلىمەڭ، سىز قايتىپ كىتىڭ، ئەتە ئىشقا چىقىسىز، ئارام ئىلىشىڭىز كىرەك . شاھيار لالەنىڭ قايتا-قايتا قوغلىشى بىلەن ئۇنىڭ ھوجىرىسىدىن چىقىپ كەتتى، ئادىل ئۇنىڭ سۇلغۇن كەيپىياتىنى كۆرۈپ : - شاھيار، بۈگۈنچە قايتىپ كىتىڭ ، مەن لالەگە گەپ قىلاي، ئۇ سىزگە بۇنداق قوپاللىق قىلمىسۇن، نىمىلا دىمىگەن بىلەن سىلەر توي قىلماقچى بولغان بىر جۈپلەر، ھەمىشە يوق جىدەل ئۈچۈن بىر-بىرىڭلارغا ئازار بەرسەڭلار بولمايدۇ . - كەچۈرۈڭ تاغا، مەن لالە ئىككىڭلارغا ئانچە كۆڭۈل بۆلۈپ كىتەلمىدىم ، ئالدىڭىزدا خىجىلمەن . - ھىچقىسى يوق بالام، مەن لالەگە تەربىيە قىلاي، كەچتە بىللە كىنۇ كۆرۈپ كىلىڭلار، سىز ھازىرچە قايتىپ تۇرۇڭ . - ماقۇل . شاھيار سالپايغىنىچە داچىدىن خوشلىشىپ چىقىپ كەتتى . شاھياا ئىشىكتىن چىقىپ كىتىشىگىلا لالە كۆزلىرىنى ياشلىغىنىچە ھوجىرىسىدىن چىقىپ، مىھمانخانىنىڭ دىرىزىسى تۈۋىگە كەلدى ، ئۇ گۈللۈكتە ئاستا قەدەم بىلەن كىتىۋاتقان شاھيارغا قاراپ كۆز ياشلىرىنى تۆككىنىچە : - كەچۈرۈڭ شاھيار، ھەممىسى مىنىڭ سەۋەنلىكىم ، مەن سىزگە زىيانكەشلىك قىلدىم، دىدى ئالقانلىرى بىلەن ئاغزىنى ئىتىپ ئۆكسۈپ يىغلىغاچ.
