ئازاپ كوچىسىدىكى ئايال 167-قىسىم

يولدىشىم تۇرغاندىن كېيىن يانچۇقىدىن چۈشۈپ قالغان پورتمالنى ئېلىپ توۋلىماقچى بولۇپ ئۈستىدىكى بوۋاينىڭ سۈرىتىنى كۆرۈپ تۇرۇپ قالدىم. بوۋاينىڭ سۈرىتىنى قولۇمغا ئېلىپ ئاستىدىكى رەڭسىز سۈرەتنى كۆردۈم. سۈرەت بىر ئەر بىلەن بىر ئايالنىڭ سۈرىتى بولۇپ، ئەر بوۋايغا ئوخشاۋاتتى.

_ ماڭمامسىز؟

_ ھە، مانا كەلدىم،_ پورتمالنى يانچۇقۇمغا سېلىپ ئۇنىڭغا ئەگەشتىم.

ئۇ تاماقنى شۇنداق ئالدىراپ يەۋاتاتتى. مەن بولسام ئۇنىڭغا قارىغىنىمچە ئولتۇراتتىم. كۆز ئالدىمدىكى بۇ كىشى ئەمدىلىكتە ماڭا شۇنچىلىك سىرلىق بولۇپ كۆرۈنىۋاتاتتى.

_ نېمىش بولدى؟ ماڭا بەك قارايسىزغۇ..

_ يا..ياقەي..بۈگۈن بەك چارچىغاندەك قىلىسىز..قورسىقىڭىز بەك ئېچىپتۇ-دە..

_ شۇنداق، يېقىندىن بېرى ئىككى شىركەت ئارىسىدا يۈرۈپ تاماق يېگۈدەك ۋاقىت چىقمايۋاتىدۇ..

ئۇنىڭغا قاراپ ئولتۇرۇپ ئۆتكەن ئىشلار ئېسىمگە كېلىپ قالدى. ئۇنىڭ بوۋاي تۇرغان يېزىدا ئۆي سېتىۋېلىشى. بوۋاينىڭ شىركىتىگە كىرىپ ئىشلىشى، بوۋاينىڭ ئۆلۈپ كېتىش ئالدىدا ئۇنىڭ قولىنى مېنىڭ قولۇمنىڭ ئۈستىگە قويۇشى..ھەممىسى كۆز ئالدىمدىن قايتا ئۆتۈشكە باشلىدى.

_ مەنمۇ ئۇنچىلىك پۇلدار ئەمەس..دادامنىڭ بىر ئاز پۇلى بار ئىدى، كېيىن شۇ پۇلنى مەبلەغ سېلىپ شىركەت ئاچتىم..دادام ئۆلۈپ كەتتى..ئاپاممۇ خېلى يىللار بۇرۇن ئۆلۈپ كەتكەن..مەن ئۇنچە بەختلىك ئەمەس.. دادام خېلى ۋاقىتقىچە مېنى ئېتىراپ قىلمىغان.. كېيىن ئېتىراپ قىلدى..

« ياق. بۇ مۇمكىن ئەمەس» دەيتتىم ئۆزۈمگە. لېكىن ئۇنىڭغا قانداقلا قارىسام بوۋايغا ئوخشاۋاتاتتى.

_ ئاچا، ساڭا بىر ئىش بولدىمۇ؟ مىجەزىڭ يوقمۇ؟

_ ياقەي..باشقا ئىش يوق.. سەن بالىلارغا ھەمراھ بول..

سىڭلىم كىرىپ كەتكەندىن كېيىن يولدىشىمغا قارىدىم.

_ بۈگۈن چارچاپ قالدىڭىزمۇ؟

_ ياقەي. ئۇنچە ئەمەس..تاماق يەپ سەل ھاردۇقۇم چىقىپ قالدى..

_ ۋاقتىڭىز بولسا پاراڭلىشايلىمۇ، بۇ يەر ئەپسىز، ماشىنىدا سىرتقا چىقىپ پاراڭلىشايلى..

_ بولىدۇ.. ماقۇل.. ماشىنا بىلەن سىرتنى ئايلىنىپ كەلمىگىنىمىزگىمۇ ئۇزۇن بوپتۇ..

يولدىشىم يانچۇقىدىن ماشىنىنىڭ ئاچقۇچىنى ئېلىپ يانچۇقىنى سىيلاشقا باشلىدى.

_ ئاچقۇچنى ئالدىڭىزغۇ..يەنە نېمىنى ئىزدەيسىز؟

_ پورتمالىم. پورتمالىم يوق تۇرىدۇ..

ئۇ ئۈستەلنىڭ ئاستىنى ئاقتۇرغاندىن كېيىن ھويلىغا چىقىپ كەتتى. ئۇ ھويلىدىكى ئۈستەل ئەتراپىدىكى يەرگە قاراۋاتاتتى.

_ بۇنى ئىزدەۋاتامسىز؟_ دېدىم پورتمالنى ئۇنىڭغا كۆرسىتىپ.

_ ھە. سىز تېپىۋاپسىزدە،_ ئۇ پورتمالنى قولىغا ئېلىپ ماڭا قاراپ تۇرۇپ كەتتى.

_ شۇنداق. مەن كۆردۈم...

_ نېمىشقا پورتمالىمنى ئاختۇرىسىز..

_ مەن قەستەن ئاختۇرمىدىم. قارىسام پورتمالىڭىز يەردە ئېچىلىپ قاپتۇ..

_ ھەممىنى بىلدىڭىز شۇنداقمۇ..

_ ئاۋال باشقا يەرگە بارايلى..

يولدىشىم ماشىنىنى شەھەر سىرتىدىكى بىر ئورۇندا توختاتتى.

_ ئەمدى دەڭە، بۇ زادى نېمىش؟ سىز بوۋاينىڭ بالىسىما؟

ئۇ ئېغىر بىرنى تىنىۋەتكەندىن كېيىن ماڭا ئۆرۈلدى.

_ شۇنداق. ئەسلى بۇ ئىشنى سىزگە بالدۇرلا دەي دېگەن..

_ ئەمىسە ماڭا نېمىشقا يېقىنلاشتىڭىز..

_ سىزگە يېقىنلىشىشىمنىڭ دادام بىلەن مۇناسىۋىتى يوق...

_ ئەمىسە نېمىشقا مەندىن بۇ ئىشنى يوشۇرىسىز..دېرىكتور سىزنىڭ ئۆز ئاكىڭىزما؟

_ ياق. ئۇ مېنىڭ ئەشەددىي دۈشمىنىم..

_ بۇ قانداق گەپ، سىز بوۋاينىڭ ئوغلى بولسىڭىز ئۇ سىزنىڭ ئاكىڭىز بولىشى كېرەكقۇ..

_ قان بويىچە ئېيتقاندا ئۇ مېنىڭ دادا بىر ئانا باشقا ئاكام..لېكىن مەن بۇنى ئېتىراپ قىلمايمەن..

_ ئاراڭلاردىكى زادى قانداق مۇناسىۋەت ماڭا دەڭە..

_ ئۇ مېنىڭ ئاپامنى ئۆلتۈرگەن ئادەم..

_ بۇ..بۇ..

_ ئاپام دادامنىڭ ئىككىنچى ئايالى، مەن دەل ئۇ ئايالنىڭ بالىسى..ئۇ مېنى يامان ئالغانلىقتىن مەن يالغۇز سىرتتا ياشىدىم.. ئۆيدىن ھەيدەلدىم..كېيىن ئۇ ئاپامنى قەستلەپ جېنىنى ئالدى..

_ توختاڭ، مەن بىردەم ئويلىنىۋالاي..

تۇيۇقسىز دېرىكتورنىڭ دادىسىنىڭ ئىككىنچى ئايالى توغرىسىدا ئېيتقان سۆزلىرىنى ئېسىمگە ئالدىم.

_ مەن ئۇ ئايالنى ياقتۇرمايتتىم..ئاپامدىن باشقا ھەرقانداق ئادەمنىڭ ئۆيىمىزگە كىرىپ ھالاۋەت سۈرىشىنى خالىمايتتىم..مەن ئۆيىمىزدىكى ھەرقانداق ئېسىل نەرسىلەرنى تىقىپ قوياتتىم، ئۇنىڭ كىيىملىرىنىڭ ئارىسىغا مەينەت نەرسىلەرنى، ھەتتا چاشقانلارنى تىقىپ قوياتتىم. ئۇنى ئۆز ئاپام ئورنىدا كۆرمەي كەلگەن.. چوڭ بولغاندىن كېيىنمۇ ئۇنى ياقتۇرمىدىم، كېيىن ئۇنىڭغا قاتتىق گەپ قىلغانلىقىمدىن يۈرەك كېسىلى قوزغىلىپ ئۆلۈپ كەتتى..بىلەمسىز ئۇنىڭ دورىسى يېقىنلا ئورۇندا ئىدى، مەن دورىنى بەرمىدىم..

_ دادام كىرگەندە ئۆگەي ئاپام جان ئۈزۈپ بولغان، ئۇ ئەزەلدىن مېنىڭ ئۆگەي ئاپامغا ئۆچمەنلىك قىلىشىمنى توغرا چۈشىنەتتى، لېكىن ياندىكى دورا قۇتىسىنى كۆرگەندىن باشلاپ ماڭا ئۆچلۈك قىلىشقا باشلىدى. ئۇ مېنىڭ قۇتقۇزۇش ئېھتىماللىقىم بولسىمۇ قۇتقۇزمىغانلىقىمنى بىلەتتى. دادام بىلەن ئىككىمىزنىڭ ئاتا-بالىلىق مۇناسىۋىتىمىزمۇ مۇشۇنىڭ بىلەن تۈگىدى، ئۇ ماڭا يەتكۈدەك پۇل بېرىپ مۇناسىۋەتنى ئۈزدى.

_ ياق ياق. بۇ قانداقمۇ مۇمكىن بولسۇن..ياق... مەن ئىشەنمەيمەن..

_ كەچۈرۈڭ. مەن سىزدىن يوشۇرۇپ كەلدىم.. مەن ئەسلى ئۇنىڭدىن ئۆچۈمنى ئېلىش خىيالىدا يۈرگەن، لېكىن سىز ئۇنىڭ بىلەن يېقىن ئۆتىدىكەنسىز. شۇڭا ئىزچىل ئۇنىڭدىن ئۆچۈمنى ئالالمىدىم..

_ مەن ھەرقانداق ئېھتىماللىقنى ئويلىغان بولساممۇ، لېكىن سىزنىڭ دېرىكتورنىڭ ئىنىسى بولىشىڭىزنى ئويلاپ باقمىغان..بۇ قانداق گەپ.. ياق..بۇ يالغان شۇنداقمۇ..يالغان دەڭە..

_ ئۇ كىچىكىدىن ئاپامنى ئېتىراپ قىلمىغاچقا ئۇلار مېنى ئۆيدە تۇرغۇزمىغان.. شۇڭا مېنى كىچىكىمدىلا باشقا يەرگە ئوقۇشقا ئەۋەتىۋەتكەن.. مەن كىچىكىمدە نۇرغۇن يالغۇزچىلىق تارتقان، يا ئاپام يا دادام يېنىمدا يوق ئىدى.. ئىسمىمنىمۇ ئۆزگەرتىۋەتتىم..مەن ئوقۇۋاتقاندا ئاپام ئۆلۈپ كەتتى، ئۆي خىزمەتچىسىدىن ئاڭلىشىمچە ئۇ ئاپامغا قاتتىق گەپ قىلغاچقا يۈرەك كېسىلى بىلەن ئۆلۈپ كېتىپتۇ..مەن ئۇنىڭدىن نەپرەتلىنىمەن..

_ ئەمىسە دادىڭىزنىڭ سىزنى ئېتىراپ قىلماسلىقى نېمە گەپ؟

_ دادام دەسلەپكى مەزگىللەردە مېنى ئېتىراپ قىلغىلى ئۇنىمىغان..چۈنكى ئۇنىڭ باللىرى ئاپام بىلەن ئىككىمىزگە قارشى ئىدى..كېيىن مەن قايتىپ كېلىپ دادامنىڭ شىركىتىدە ئىشلىدىم..ئۇ يۈرىكىدە مېنى ئېتىراپ قىلسىمۇ لېكىن باشقىلارغا بۇ ئىشنى ئاشكارلاشنى خالىمىدى..

_ نېمىشقا؟ ئاھ..مەن بۇ ئىشلارنى بۇنچە مۇرەككەپ دەپ ئويلىماپتىكەنمەن...

_ چۈنكى مەن كىچىمدىلا ئاشكارلانمىغان بالا ئىدىم..باشقىلارنىڭ نەزىرىدە دادامنىڭ پەقەت ئۈچ بالىسى بولغان، دېرىكتورىڭىز، ئۇنىڭ ئاكىسى ھەم سىڭلىسى..مېنى ھېچكىم ئېتىراپ قىلىپ باقمىغان.. مەن ئۇلارنىڭ ئائىلىسىدە قېقىلىپ سوقۇلۇپ ياشىغان..

_ دېرىكتور ماڭا بىر ئىنىسىنىڭ بارلىقىنى دېمىگەن..

_ ئەلۋەتتە دېمەيدۇ-دە..ئۇلار مېنى ئېتىراپ قىلمايدىغان تۇرسا..

_ سىزنىڭمۇ بۇنداق جاپادا چوڭ بولغىنىڭىزنى بىلمەيدىكەنمەن..

_ سىزگە دېيىشنى خالىمىدىم. بۇ ئىشلارنى ئەسلى مۇشۇنداق تۈگەپ كەتسۇن دەپ ئويلىغانتىم..

كۆزلىرىمدىن ياش ئېتىلىپ چىقىپ كېتىشكە ئاز قېلىۋاتاتتى.

_ مەن كىچىكىمدىن تولىمۇ يالغۇزلۇقتا چوڭ بولغان، ئۇلار ئۈچى مېنى بوزەك قىلاتتى. ئاپام مېنى ئۆيدە قويالماي مومامنىڭ ئۆيىگە ئەكەپ قوياتتى. كىچىكىمدىن چەتكە قېقىلغاچقا باشقا ساۋاقداشلار بىلەن گەپلىشىشنىمۇ خالاپ كەتمەيتتىم. لېكىن سىزنىڭ بىر نەچچە قېتىم يالغۇز يىغلىنىڭىزنى كۆرۈپ ياردەم قىلغۇم كەلدى، بىر قېتىم سىزگە ئىلغۇچ بەرگىنىم ئېسىڭىزدىمۇ..

_ ھەئە، ئېسىمدە بار، سىز ئىلغۇچ بېرىپ سومكامنى ئېتىۋالغاچقا مومامنىڭ تىلىدىن قۇتۇلۇپ قالغانىدىم..

ئىككى كۈلىۋېتىپ تۇيۇقسىز يىغلاشقا باشلىدۇق. بۇ قېتىم ئىككى غېرىپ قەلىپ ھەققىىي ئۇچراشقاندەك قىلاتتى.

_ ئەسلى سىزمۇ مەندەك يالغۇزلۇق تارتىپ چوڭ بولغاچقا ماڭا شۇنداق ياردەم قىپتىكەنسىزدە..

_ شۇنداق. مېنىڭ سىز بىلەن ياخشى دوست بولغۇم بار ئىدى. لېكىن كېيىن سىز ماڭا قارىماي قويدىڭىز..

_ مېنى كەچۈرۈڭ. مەن سىزنى پەقەت مېنى كەمبەغەل دەپ ئىچ ئاغرىتتى دەپ ئويلاپتىكەنمەن..

_ لېكىن تەلىيىم باركەن. چوڭ بولۇپ يەنە سىزنى ئۇچراتتىم..

_ شۇنداق. مېنىڭمۇ تەلىيىم باركەن. كىچىكىمدە مېنى ياخشى كۆرگەن ئادەمنى ئۇچراتتىم..

ئۇ قولۇمنى تۇتتى.

_ سىزنىڭ قانچە قېتىم توي قىلغىنىڭىز ياكى بالىڭىز بار يوقلىقىغا قىزىقمايمەن.. چۈنكى ئادەم توغرا ئادەمنى ئۇچراتقۇچە نۇرغۇن خاتا ئادەمنى ئۇچرىتىدۇ..لېكىن، مېنىڭ يېنىمدىن كەتمىسىڭىز، راستىمنى ئېيتسام سىز يېنىمدا پەيدا بولغاندىن بېرى تۇرمۇشۇمنىڭ ھەقىقىي مەنىسى بولدى..

_ لېكىن، مەن سىزنى نۇرغۇن خاتا ئىشلارنى قىلىشقا زورلىدىم..بالا ئەپ قېچىشىمغا ھەمراھ بولدىڭىز، باشقىلاردىن ئۆچ ئېلىشىمغا ھەمدەم بولدىڭىز، ئەسلى سىزگە توغرا نەرسىنى يەتكۈزسەم بولاتتى..

_ ياق. مەن بۇ ئىشلارنى سىزنىڭ خاتالىقىڭىز دەپ قارىمايمەن..چۈنكى بۇلارنىڭ ھەممىسى سىز خالىمايدىغان لېكىن قىلىشىڭىز كېرەك بولغان ئىشلار..

_ شۇنداق. مەن ئەسلى شۇنداق مېھرىبان ئايال ئىدىم..لېكىن دەل مېھرىبان بولغىنىم ئۈچۈن باشقىلارغا بوزەك بولۇپ كۆرۈندۈم..

_ مەن سىزنىڭ غەزەپلىرىڭىزنىڭ كەينىكى ئازابلىرىڭىزنى، ئۆچ ئېلىشتىن كېيىنكى پۇشايمانلىرىڭىزنى كۆرىمەن..سىز ھەقىقىي ئەسكى ئايال بولغان بولسىڭىز بۇنداق قىلمىغان بولاتتىڭىز..

_ شۇنداق..ھەر قېتىم ئۆچۈمنى ئېلىپ شۇنداق بىئارام بولىمەن.. بۇ ئىشنى قىلمايمەن دەيمەن يۇ..يەنە قىلىپ سالىمەن..ئۆزۈمنى پەقەت كونترول قىلالمىدىم..بەزىدە ئۆزۈمگە ئۆچ بولۇپ كېتىمەن..

_ ئەمىسە ماڭىمۇ ئۆچ بولۇپ قالارسىزمۇ..

_ نېمىشقا؟ سىزگە نېمىشقا ئۆچ بولۇپ قالىمەن..

_ چۈنكى مەنمۇ ئۆچ ئالماقچى، سىزنىڭ بۇرۇنقى دېرىكتورىڭىزدىن ئۆچۈمنى ئالماقچى..

_ مەن بۇنىڭ توغرا ياكى خاتالىقىنى بىلمەيمەن.. راستىمنى دېسەم ئۇنىڭغا ئۆچ ياكى ئامراقلىقىمنىمۇ بىلمەيمەن..بەزىدە ئۇ شۇنداق ياخشى ئادەمدەك بىلىنىدۇ، بەزىدە ياخشىلىقىدىن گۇمان قىلىمەن..ئۇنىڭ دادىسىنى ئىزدەپ بالىسىنى ساقايتىش ئۈچۈن كۈچەشلىرىگە قارىسام ۋاپادار ئوغۇل، مەسئۇلىيەتچان دادىدەك بىلىنىدۇ، ئۇنىڭ ياش قىزلار بىلەن ئارلىشىشىغا قارىسام يەنە ئۇنىڭدىن گۇمانلىنىپ قالىمەن..

_ ئۇنىڭ دادىسىنى قايتىدىن ئىزدىشى ۋاپادارلىقىدىن ئەمەس، بەلكى دادىسىنىڭ نۇرغۇن بايلىقى بولغانلىقىدا..ئۇ دادىسى بىلەن يۈز ئۆرىسە بايلىقتىن قۇرۇق قالىدىغانلىقىنى بىلىدۇ، ئايالى بىلەن يارىشىشى، ئوغلى بولغانلىقىدا، ئۇ ئارلىقتا باشقىلارغا بۇزۇلغان، كېيىن ئۇ ئايالى تۇغمىدى، شۇڭا بۇ ئايالى بىلەن يارىشىشقا مەجبۇر بولدى. يەنە كېلىپ ئۇنىڭ ئايالىنىڭ پۇلى بار.. ئۇنىڭ بىلەن ياراشسا قولىغا يەنە نۇرغۇن پۇل كېلىدۇ..

_ ھەي. ئەگەر ئارىمىزدىكى مۇناسىۋەتلەرگە پۇل ئارلاشمىغان بولسا بۇنداق دۈشمەنلىشىپ كەتمەس بولغۇيتتۇق ھە..

_ شۇنداق. شۇڭا بەزىدە پۇل دېگەن نەرسىگە ئۆچ بولۇپ قالىمەن..

_ ئۇنداقتا بوۋاينىڭ پۇلىغا سىلەرنىڭ قايسىڭلار ئىگە..

_ دادام شىركەتنى ماڭا ئۆينى ئۇنىڭغا قالدۇرۇپتۇ..

_ دېمەك ئۇ سىزنى بىلىدىكەندە..

_ مېنىڭ بارلىقىمنى بىلىدۇ، لېكىن ۋەسىيەتنامىدىكى يەنە بىر مىراسخورنىڭ مەنلىكىمنى بىلمەيدۇ..

_ سىزنى قانداقسىگە تونىمايدۇ..

_ مەن ئوقۇشقا كەتكەندە ئارانلا 11 ياش تۇرسام، ئەلۋەتتە بىلمەيدۇ-دە.. ھازىر مەن 38گە كىردىم.. ئۇ بولسا 40 نەچچىگە كىردى..

_ ھەي..بۇ ئىشلارنى قانداق چۈشىنىشنى بىلەلمەي قالدىم..

_ سىزگە دېسەم ساقچىلار بالىڭىزنى ئىزدەيمىز دېگەن كۈنى ئۇنىڭ يېنىدا ئەسلى پۇل باركەن، لېكىن ئۇ تولۇق بەرگىلى ئۇنىمىدى..شۇنىڭ بىلەن مەن يېرىمىنى چىقاردىم..ئۇ ئاغزىدا مېھرىباندەك كۆرۈنگىنى بىلەن، چوڭ يەرگە كەلگەندە ئۆزىنىڭ ھەقىقىي ماھىيىتىنى چىقىرىدۇ..

_ مەنمۇ شۇ چاغدا ئۇنىڭ تازا رازى ئەمەسلىكىنى ھېس قىلغان. ئۇ پۇلنى ئارقىغا سۈرمىگەن بولسا بەلكى قىزىمنى ئۇلار ئەپ كەتمىگەن بولاتتى..بولدىلا، ئۆزۈڭدە يوق ئالەمدە يوق..ئۇنىڭدىن ئاغرىنساممۇ توغرا ئەمەس..

_ ئۇ ئايالىنىڭ گېپىنى يىرالمىغۇدەك يەردە ئەمەس. پەقەت سىزنىڭ باھانىڭىزدە ئەگەشكۈچىلەرنى يىغىپ بولدى، ئەمدى سىزگە يۇقىرى ھەق بېرىپ ئىشلىتىشىنىڭ ھاجىتى يوق..شۇڭا بۇ باھانىدە سىزنى شىركەتتىن ھەيدىدى. بۇنى«سەن ئۇرغان بولغان مەن يىقىلغان بولاي» تاكتىكىسى دەپ ئاتايمىز. ئۇلارنىڭ تىلى بىر..

_ بايا تېخى ئۇنىڭ ئايالىغا ئىچىم ئاغرىپ قالغانتى..

_ ئىچىڭىزنى ئاغرىتماڭ. ئۇ يولدىشىنىڭ قانداقلىقىنى بىلىدۇ..ئىككىسىنىڭ بىللە ئۆي تۇتىشىمۇ ماس كەلگەنلىكىدىن، ماس كەلمىگەنلەر بىر ئۆيدە تۇرالمايدۇ..

_ بەلكى سىزنىڭ دېگىنىڭىز توغرىدۇ..

_ لېكىن ئۇلارنىڭ يىقىلىشىغىمۇ ئاز قالدى. مەن تەكشۈرۈپ باقتىم، ئۇنىڭ ئايالىنىڭ مەبلەغچىلىك شىركىتى بىر تۈرگە مەبلەغ سېلىپ ۋەيران بوپتۇ..ئاڭلىسام بۇ شىركەتتە ئۇنىڭ سىڭلىسىنىڭمۇ پېيى باركەنتۇق..

_ شۇنداقمۇ، ئۇنىڭ يەنە باشقا شىركىتىمۇ بار ئىدى..سودا شىركىتى..

_ ھازىر سودا شىركەتلىرى كۆپ، ئۇلارنىڭ پۇت تېرەپ تۇرمىقى تەس، يەنە بىر شىركىتىنىڭ قەرزىنى قايتۇرغۇچە بۇ شىركىتىمۇ ۋەيران بولىشى مۇمكىن..

يولدىشىم ماڭا قولىنى تەڭلىدى.

_ مۇناسىۋىتىمىزگە يېڭى مۇناسىۋەت قوشۇلدى. مەن بىلەن ھەمكارلىشىڭ بولامدۇ.بىز بىرلىكتە ئۇلارنى يىقىتايلى..ئۇلاردىن ئۆچىمىزنى ئالايلى..

ئۇنىڭ قولىغا قاراپ ئىككىلىنىپ تۇرۇپ قالدىم.

aziza

ئەڭ يېڭى ئاۋازلىق رومان، پوۋېست ھىكايىلەر يوللىنىدۇ قوشىۋېلىڭ