شاھيار ئۇنىڭ تەمكىن ھالىتىگە قاراپ نىمە دىيىشىنى بىلمەي ئۇنىڭ ئاغزىغا تىكىلدى ، ئەلى ئىغىر ئۇھسىنىپ گىپىنى باشلىدى :
- ياش ۋاقتىمدا زۇمرەت ئىسىملىك بىر ئايالنى ياخشى كۆرۈپ قالغان ، ئالىي مەكتەپنىڭ ئوقۇش پۈتتۈرىدىغان يىلى ئۇنىڭ دادىسى مىنى ئىزدەپ كىلىپ قىزى بىلەن ئالاقەمنى ئۈزۈشۈمنى ئىيتتى، شۇنداقلا ماڭا تەھدىدمۇ سالدى ، مەن ئامالسىز ئوقۇش پۈتتۈرمەيلا مەكتەپتىن چىكىنىپ يۇرتقا كەتتىم، كىيىن يەنە ئۈرۈمچىگە قايتىپ كىلىپ تاساددىبىي زۇمرەت بىلەن ساۋاقداشلار يىغىلىشىدا ئۇچىرىشىپ قالدىم ، شۇنىڭ بىلەن بىزنىڭ مۇناسىۋىتىمىز يەنە باشلاندى ، ئۇ ماڭا، مەن مەكتەپتىن چىكىنگەن يىلى قورسىقىدا قىلىپ بالىنى ئاتا-ئانىسىدىن يۇشۇرۇن توغۇپ تاشلىۋەتكەنلىكىنى ئىيتتى ، كىيىن سۈرۈشتۈرسەم ئۇ بالا تۆت ياش ۋاقتىدا ئۆلۈپ كەتكەن ئىكەن ، مەن ئاشۇ بالا دەردى ۋە ئاشۇ ئايالنىڭ دەردىدە بىر ئۆمۈر توي قىلماي بويتاق ئۆتۈشكە مەجبۇر بولدۇم ، ئۇنىڭ بولسا بىر بەخىتلىك ئائىلىسى، ئوماق بىر قىزى بار ئىدى ، زۇمرەت شۇنداقتىمۇ مىنى ئىزدەپ يۈردى ، كىيىنچە ئۇ ئائىلىسى بىلەن بولۇپ ماڭا ئانچە پەرۋا قىلماس بولىۋالدى ، ئەللىۋەتتە مەنمۇ ئۇنىڭغا ئاۋارىچىلىق ئىپ كەلمىدىم ، كىيىن ئۇنىڭ قىزى ئابىدە قەشقەرلىك دىلمۇرات ئىسىملىك يىگىت بىلەن تونۇشۇپ توي قىلماقچى بوپتۇ ، زۇمرەت بۇ ئىشقا قارشى بولغاچقا يەنە مىنى ئىزدەپ كەلدى ، ئۇ ماڭا نەچچە رەت ئۇ يىگىتكە تەھدىد سىلىپ، ئۇلارنىڭ شىركىتىدىن ھەيدىۋىتىشىمنى ئىيتقان، مەن بىر قىتىم ئۇنىڭ دىگىنىدەك ئۇ يىگىتنى شەھەر سىرتىدىكى يولدا ئادەم ياللاپ ئۇرغۇزدۇم ، بىراق ئۇ يىگىت جاھىللىق بىلەن ئابىدە بىلەن توي قىلىشقا پۈتۈشۈپتۇ، زۇمرەت ئۇنىڭ ئارقا كۆرىنىشىنى ماڭا تەكشۈرتۈپ، ئۇنىڭ باشقا بىرى ئەمەس، بەلكى ئەكبەر ئەپەندىنىڭ بۇرۇنقى لايىقى رەنا ئىسىملىك ئايالدىن بولغان بالا ئىكەنلىكىنى ئىنىقلاپ چىقتىم ، زۇمرەت دىلمۇراتنىڭ مەقسەتلىك شىركەتكە كىلىپ ئابىدەنى دەستەك قىلىپ دادىسىدىن ئۆچ ئالماقچى ئىكەنلىكىنى بىلىپ، يەنە مىنى ئۇ يىگىتكە قول سىلىشقا بۇيرىدى ، مەن بىر دەرتمەن ئەر ، ئەللىۋەتتە ئۇنىڭ دىگىنىنى قىلىمەندە ، توي كۈنى مەن ئادەم ياللاپ ئۇنىڭغا يالغاندىن تىلفۇن قىلىپ، ئۇنى ئالداپ شەھەر سىرتىغا ئاچىقىپ ياردىن چۈشۈرۈپ ئۆلۈم ۋەقەسى سادىر قىلدىم ، كىيىن ساقچىلار دىلمۇراتنىڭ جەسىدىنى تاپالماپتۇ ، ماشىنا كۆيۈپ كىتىپ ماشىنىدىن پەقەت بىر ئادەم پۇتى ۋە دىلمۇراتنىڭ ئۇششاق نەرسە-كىرەكلىرى ۋە بىر تال ئۈزۈك چىقىپتۇ، مەن ئۇنىڭ ئۆلمەي قىلىشىدىن ئەنسىرەپ ئادەم ئەۋەتىپ جىلغىنى ئاختۇردۇم ، بىراق ئۇنىڭ جەسىدىنى تاپالمىدىم ، شۇڭا ئۇنىڭ كۆيۈپ ئۆلگەنلىكىگە ئىشەندىم ، كىيىن مەن خاتا قىلغانلىقىمنى ئويلاپ، ئۇ يىگىتنىڭ ئەكبەرنىڭ راست ئوغلى ياكى ئەمەسلىكىنى تەكشۈرۈپ، ئۇنىڭ رەنا بىقىۋالغان بالا ئىكەنلىكىنى بىلدىم .
- نى نىمە ؟ بىقىۋالغان بالا ؟! شاھيار ئۇنىڭ گەپلىرىنى ئاڭلاپ بەزى ئىشلار غۇۋا يادىغا كىلىۋاتاتتى .
- شۇنداق، بىقىۋالغان بالا ، ئۇ رەنا ئىسىملىك ئايالنىڭ بىقىۋالغان بالىسىكەن ، بەلكىم ئۇ يىگىت ھايات ۋاقتىدا ئەكبەر ئەپەندىنى دادام دەپ ئويلاپ قالغاچقا ئۇنىڭغا يىقىنلاشقان بولسا كىرەك ، مەن ئىلگىرىكى ئىشلىرىم ئۈچۈن پۇشايمان قىلىمەن ، ئاشۇ بىگۇناھ يىگىتنى بىھۇدە ئۆلتۈرگىنىم ئۈچۈن ئۆكىنىمەن ، مەن دائىم ئۇ يىگىتنىڭ قەبرىسىگە بىرىپ يوقلاپ تۇرىۋاتىمەن، ئۇ گاھىدا چۈشۈمدە ئايان بولۇپ مىنى بەكلا قىينايدۇ ، شۇڭا ئۇنىڭ ئۈچۈن ياخشى ئىش قىلىپ بەرسەم دەيمەن ، بۈگۈن بۇلارنى سىزگە دىيىشىمدىكى مەقسىدىم، سىز بىلەن دوستىڭىزنىڭ قىساسىنى بىللە ئىلىش ئۈچۈندۇر ، بۇ ۋىجدان ئازابى مىنى ئۇزۇن يىل قىينىدى ، ئەمدى ئۇنىڭ قىساسىنى ئالىدىغان ۋاقىتمۇ كەلدى ، ئەگەر خالىسىڭىز يىڭى ھايات شىركىتىنى ۋەيران قىلىپ، زۇمرەتنى تىگىشلىك جازاسىغا تارتىشتا سىزگە ياردەم قىلغۇم بار . شاھيار ئۇنىڭ گەپلىرىگە بىر ئىشىنىپ بىر ئىشەنمەي جىمىپ قالدى .
- گىپىمگە ئىشەنمەيدىغانلىقىڭىزنى بىلىمەن .
ئۇ تىلفۇنىدىن بىر نەچچە پارچە سۈرەتنى چىقىرىپ شاھيارغا كۆرسەتتى ، شاھيار ئىكراندىكى ئابىدە بىلەن دىلمۇراتنىڭ بىللە چۈشكەن سۈرىتىنى كۆرۈپ :
- بۇ بۇ…
- بۇ دىلمۇراتنىڭ ھايات ۋاقتىدا ئابىدە بىلەن بىللە چۈشكەن سۈرىتى .
ئەلى يەنە زۇمرەتنىڭ ئۆزىگە تىلفۇن قىلىپ دىلمۇراتنى تەكشۈرۈش توغرىسىدا ئىيتقان گەپلىرى ۋە ئۆلتۈرۈشكە بۇيرىغان بارلىق ئۈن خاتىرىلىرىنى شاھيارغا قويۇپ بەردى ، شاھيارنىڭ بۇ ئۈن خاتىرىلىرىنى ئاڭلىغۇچە پۇت-قوللىرى تىتىرەپ يۈرىكىگە ئۆچمەس نەپرەت ئورناپ كەتكەندەك چىشلىرى كىرىشىپ، مۇشتلىرى چىڭ تۈگۈلدى .
- مەن ھامان بىر كۈنى بۇ ئىشنىڭ ئاشكارلىنىدىغانلىقىنى بىلگەچكە بۇ ئۈن خاتىرىسىنى ساقلاپ قويغان ، ئەمىلىيەتتە مىنىڭمۇ ئۇ يىگىتنىڭ قىساسىنى ئالغۇم بار ئىدى ، بىراق نەچچە رەت يىڭى ھايات بىلەن تىركەشكەن بولساممۇ، ئۇلارغا تەڭ كىلەلمىدىم ، شۇڭا تەكشۈرۈپ سىزنى تاپتىم، دەرۋەقە ئادەمنى خاتا تونىۋالماپتىمەن ، ئالدىنقى بىر مەزگىلدە سىزگە يىقىنلىشىش ئۈچۈن چىشىڭىزغا ئازراق تىگىپ قويدۇم ، ھەتتا باش تور بىتىڭىزنىمۇ سىتىۋالماقچى بولدۇم ، مەقسىدىم يەنىلا سىزگە يىقىنلىشىپ سىزنىڭ دىلمۇرات بىلەن بولغان مۇناسىۋىتىڭىزنى ئىنىقلاش ئىدى .
شاھيار چىداپ بولالماي ئورنىدىن تۇردى، ۋە تىتىرەك ئاۋازدا :
- مەن قايتاي، بۈگۈنكى ئىش بىزنىڭ ئارىمىزدا قالسۇن ، مەن سىزنىڭ گىپىڭىزگە ئاساسەنلا ئالدىراقسانلىق قىلسام بولمايدۇ ، ئەگەر گىپىڭىز راست بولسا مەن سىز بىلەن ھەمكارلىشىشقا رازى .
- ماقۇل ، مەنمۇ سىزگە ئويلىنىشقا ۋاقىت بىرەي ، ھەر قاچان تىلفۇنىڭىزنى ساقلايمەن .
شاھيار بۇرادەرلىرى تۇتۇپ تۇرغان سىرىق چاچنىڭ يىنىغا كىلىپ ئۇنىڭغا ئاچچىق نەزەردە تىكىلدى :
- ئاڭلاپ تۇر ! قانداقلا بولمىسۇن سەنمۇ جىنايىتىڭدىن قۇتۇلالمايسەن ! بۈگۈن ئەلى ئەپەندىنىڭ يۈزىنى قىلىپ سىنى ۋاقىتلىق ئەركىن قالدۇراي ، بىراق ھەقىقىي جىنايەتچى تۇتۇلغاندا سەنمۇ قانۇننىڭ جازاسىنى تارتىسەن ! شاھيار بۇرادەرلىرىگە قاراپ :
- بولدى، ئۇنى قويىۋىتىڭلار، بىز قايتايلى !
سىرىق چاچنى تۇتۇپ تۇرغان يىگىتلەر ئۇنى قويىۋىتىپ شاھيارنىڭ ئارقىسىدىن چىقىپ كەتتى، سىرىق چاچ يەرگە سەت تۈكۈرگىنىچە ۋالاقلىدى :
- ھۇ ئۆلگۈر ! سەن قانچىلىك نىمىتىڭ ؟ تىخى مىنى جازالارمىش، ئۇخلاپ چۈشۈڭ ! ئەلىنىڭ چىرايى بىردىنلا كۈلدۈرمامىلىق يامغۇر بۇلىتىدەك تۇتۇلدى :
- ئاغزىڭنى يۇم ! ھەممىنى قىلغان سەن ، ئۆزۈڭنى خەقكە بۇنچە ئاسان ئاشكارلاپ قويمىغان بولساڭ، مەنمۇ ئاسان تىلغا چىقىپ قالمايتىم .
- خو خوجايىن، كەچۈرۈڭ، مەنمۇ شۇ…
- بولدى بەس ! بۇمۇ بىر ھىساپتا ياخشى بولدى ، بىز بۇ يىگىتتىن پايدىلىنىپ بىر چالمىدا ئىككى پاختەك سوقساق بولغۇدەك ، ھەي زۇمرەت، ھەي زۇمرەت، ئەمدى ئەدىۋىڭنى بىرىدىغان بىرسى چىقتى ، ئەللىۋەتتە، مەن بۇ قۇرال ئارقىلىق سىنىڭ بارلىق نەرسىللىرىڭنى تارتىۋىلىپ، ئۆلۈپ كەتكەن ئوغلۇمنىڭ قىساسىنى ئالىمەن ، ياشلىغىمدا قولدىن بىرىپ قويغان بەخىتنى سەندىن ھەم ئائىلەڭدىكىلەردىن تارتىۋالىمەن ! ئەلى زەھەرخەندىلىك بىلەن كۈلۈمسىرەپ قويدى .
- خوجايىن، مەن، مەن قانداق قىلىمەن ؟ ئەگەر راستىنلا بۇ ئىش ئاشكارلانسا مەن تۈرمىگە كىرەمدىمەن ؟ ئەلى سىرىق چاچقا قاراپ مەسخىرىلىك كۈلدى :
- خاتىرجەم بول ، ۋاقتى كەلسە ساڭا ئىغىر جازا كەلمەيدۇ ، بىز ئۇلارنى ئۆز ئۇسۇلى ئارقىلىق ۋەيران قىلىمىز ، سەن ۋاقتىنچە ھىچكىمنىڭ كۆزىگە كۆرۈنمەي تۇر ، ئەڭ ياخشىسى، بۇ يەردىن كىتىپ تۇر . ئەلى يانچۇقىدىن بىر بولاق پۇلنى چىقىرىپ ئۈستەل ئۈستىگە تاشلىدى .
- ھە، ھە ماقۇل خوجايىن، ئەتىلا باشقا جايغا كىتىپ پاناھلىنىپ تۇراي . سىرىق چاچ پۇلغا قول ئۈزىتىۋىدى، ئەلى ئۇنىڭ قولىغا پاققىدە بىرنى ئۇرۇپ :
- بۇ ئىشنى ھىچكىمگە تىنما ، ئەگەر بۇ گەپ سىرتقا يىيىلىپ كەتسە، مەن سىنى… ئەلى قولى بىلەن بويۇن تەرىپىنى شەرەتلەپ قويدى .
- ھە، بى بىلىمەن خوجايىن ، ئەمسە مەن قايتاي .
سىرىق چاچ پۇلنى ئىلىپ ئالدىراش چىقىپ كەتتى، ئەلى بىر ھازا جىمجىتلىقتىن كىيىن بىرسىگە تىلفۇن قىلدى :
- ۋەي، سىرىق چاچنى جايلىۋىتىڭلار ، ھەرگىز يىپ ئۇچى قالمىسۇن، ئىشنى چىرايلىق تۈگىتىڭلار
ھە ھە، ئۇ ھازىر ماڭدى ، قانچە تىز ھەم مەخپىي بولسا شۇنچە ياخشى .
ئەلى تىلفۇننى قويۇپ ئالدىدىكى ھاراقتىن بىر رومكا قويۇپ سەت ھىجايغىنىچە ئاۋايلاپ بىر نەچچە يۇتۇم ئوتلىدى .
شاھيار بۇرادەرلىرى بىلەن ئارامگاھ ئالدىغا چىقىپ كەينىگە بىر رەت قارىۋەتتىدە، ياردەمچىسىگە قاراپ :
- مەن بۇ ئەلى ئىسىملىك ئادەمگە ئانچە ئىشەنمەيمەن، سەن دىلمۇراتنىڭ قانداق ئۆلتۈرۈلگەنلىكى ۋە يىڭى ھايات شىركىتىدىكى بارلىق ئىشلىرىنى مەخپىي تەكشۈرۈپ باق ، يەنە ھىلىقى ئەلى بىلەن زۇمرەت ئىسىملىك ئايالنىمۇ تەكشۈر ، مىنىڭچە بۇ يەردە بىر مەسىلە بولىشى مۇمكىن .
- ماقۇل ئاكا ، ئەمسە بىز قايتايلى، بەك كەچ بوپ كەتتى .
- ماقۇل، يولدا ئىھتىيات قىلىڭلار، ئەلى سىلەرنىڭ مەخپىي تەكشۈرىشىڭلارنى سىزىپ قالمىسۇن ، ئۇ ئادەم بەكلا ھىيلىگەركەن ، ئۇ ئۆزىچە مىنى قۇرغان قاپقىنىغا چۈشىدۇ دەپ ئويلاۋاتىدۇ .
شاھيارنىڭ ياردەمچىسى بىشىنى لىڭشىتىپ بۇرادەرلىرى بىلەن ماشىنا چىقىپ كىتىپ قالدى، شاھيار ئەتراپىغا بىرەر قۇر قارىۋەتكەندىن كىيىن بۇ يەردىن ئايرىلدى ، ئۇ قاراڭغۇلۇققا تولغان كوچىلاردا جىمجىت خىيالچان كىتىپ باراتتى .
- ئەلىنىڭ دىگەنلىرى راستمىدۇ ؟ مەن زادى كىم ؟ مىنىڭ بىقىۋالغان ئاپام، ئۇ زادى قەيەردە ؟ ئۇنى تاپساملا بارلىق ئىشلارنىڭ سەۋەبىنى بىلەلەيمەن .
شاھيار رەنانى شۇنچە ئويلاپمۇ يادىغا ئالالمىدى ، تۇيۇقسىز چوڭ يولغا قايرىلىدىغان دوقمۇشتا شاھيارنىڭ ماشىنىسى قارشى تەرەپتىن كەلگەن ماشىنا سىگىنال ئاۋازىدىن چۆچۈپ جىددىي تورمۇز بەردى ، ئەسلىدە چوڭ يولدىن ئۆتۈپ كىتىۋاتقان نىفىت ئايرىش ماشىنىسى بولۇپ، ئۇ ماشىنا ئاللىقاچان شاھياردىن يىراقلاپ كەتكەن ئىدى، شاھيار رولنى چىڭ تۇتقىنىچە ئىغىر-ئىغىر تىنىپ :
- نىمىشقا بەزى ئىشلار تولۇق ئىسىمدە يوق ؟ پەقەت ئادىلەنىلا ئەسلىيەلەيمەن ، نىمىشقا ئاپام يادىمغا كەلمەيدۇ ؟
شاھيارنىڭ بىشى چوڭقۇر ئويلىنىش سەۋەبىدىن ئاغرىشقا باشلىدى ، تۇيۇقسىز كەينى تەرەپتىن بىرىلگەن ماشىنا سىگىنالى بىلەن شاھيار ئارقىسىغا قاراپ، غۇۋا چىراغ يورىقىدا ھىلىقى سىرىق چاچنىڭ ماشىنىسىنى كۆردى، شاھيارنىڭ ئاچچىقى غۇژژىدە كەلگەندەك بولۇپ ماشىنىدىن چۈشتىدە، ئارقىدىكى ماشىنىنىڭ يىنىغا كىلىپ ئىشىككە قولىنى ئۇزارتتى .
دىرىزە چۈشۈرۈلۈپ كۆزلىرى قىسىلغان سىرىق چاچ سەت ھىجايغىنىچە :
- ئوھۇي شاھيار ئۇكام، ماشىناڭ بۇزۇلۇپ قالغان ئوخشىمامدۇ ؟ بىرەر ياردىمىم كىرەكمۇ-قانداق ؟
- ئۆلگۈر ئەبلەخ، سەندىن سوراپ باقاي ، بايا خوجايىنىڭ ئىيتقان گەپلەر راستمۇ ؟
- ھاھاھا… ئەللىۋەتتە راست بولىدۇدە، مەن دىگەن بۇيرۇق بويىنچە ئىش قىلىدىغان ئادەم ، ئەلى خوجايىن زۇمرەت ئىسىملىك ئايال ئۈچۈن جىنىنى بىرىشكىمۇ رازى . شاھيار ئۇنىڭ مەسخىرىلىك كۈلكىسىگە سەۋىر قىلىپ سالماق ئاۋازدا سورىدى :
- ئۇنداقتا دىلمۇرات ئۆلگەندىن كىيىن ئۇنىڭ ئانىسى رەنا ھەدە نەگە كەتتى ؟ مىنىڭچە سەن بۇ ئىشنى بىلىسەنغۇ دەيمەن ؟
- ھەي، بۇ ئىشنى مەن راستىنلا بىلمەيمەن، بىراق خوجايىننىڭ ئاغزىدىن تاساددىبىي ئۇ ئايالنىڭ ئۆلۈپ كەتكەنلىكىنى ئاڭلىغان .
- نىمە ؟ ئۆلۈپ كەتكەن ؟! سەن، سەن مىنى ئالدىمايۋاتقانسەن ؟
- ياقەي، مەنمۇ شۇ ئاڭلىغىنىمنى دىدىم ، بىلىشىمچە ئۇ ئايال ئاغرىپ قىلىپ دوختۇرخانىدا ياتقان ئىكەن، كىيىن زۇمرەت خانىم ئۇنى كۆرگىلى كىرىپ ئۇزۇن ئۆتمەيلا ئۇ ئايال ئۆلۈپ كىتىپتۇ ، خوجايىن ئۇ ئايالنىڭ ئۆلىمىنى زۇمرەت خانىم قىلدى دەپ قارايدىكەن ، ئەگەر ئىشەنمىسەڭ تەكشۈرۈپ باقساڭ بولىدۇ .
- ئەمسە ئۇ ئايالنىڭ جەسىدى قانداق بىر تەرەپ قىلىنىپتۇ ؟ ياكى يۇرتىغا دەپنە قىلىنىپتىمۇ ؟
- بۇنى مەن بىلمەيمەن، بەلكىم مۇشۇ يەرگە دەپنە قىلىنغاندۇ ؟ ئۇ ئايالنىڭ ئوغلى ئۆلۈپ كەتتى، ئۇنىڭ يا بىرەر ھامىيسى بولمىسا ئۇنى كىم يۇرتىغا ئىلىپ كىتىدۇ ؟ مىنىڭچە قەبرىسى ئۈرۈمچىدە بولىشى مۇمكىن . سىرىق چاچ سائىتىگە قارىدى :
- شاھيار ئەپەندى، بەك كەچ بوپ كىتىپتۇ ، مەن قايتىپ ئۇخلىمىسام بولمايدۇ ، ھىلىمۇ ساڭا كۆپ ئىشلارنى ئىيتىپ بەردىم ، ئەمسە مەن ماڭاي .
- ھەي ھەي توختا !
سىرىق چاچ شاھيارنىڭ توۋلاشلىرىغا پەرۋاسىز ماشىنىنىڭ دىرىزىسىنى چىقىرىپ كىتىپ قالدى، شاھيار ئۇنىڭ قارىسى يۈتكىچە قاراپ تۇرغاندىن كېيىن ماشىنىسىغا چىقتى :
- ئاپام، ئاپام ئۇ ئۆلۈپ كىتىپتىما ؟ بۇ، بۇ زادى قانداق ئىش ؟ بۇ ئىشلارنى زادى كىمدىن سۈرۈشتە قىلسام بولار ؟ شاھيار بىردىنلا ئادىلەنى يادىغا ئالدى:
- توغرا ، ئۇ ھەممىنى بىلىدۇ ، بەلكىم ئۇ دىلمۇراتنىڭ قانداق ئۆلۈپ كەتكەنلىكىنىمۇ بىلىشى مۇمكىن . شاھيار ماشىنىسىنى ھەيدىگەچ :
- ئامال قىلىپ ئادىلە بىلەن يەنە بىر قىتىم كۆرۈشۈپ باقاي ، دەپ ئويلىدى .
شاھيار سائەت بىردىن ئاشقاندا ئۆيگە قايتىپ كەلدى ، ئۇ ھارغان بولسىمۇ كەيپىياتى دىگەندەك ياخشى ئەمەس بولغاچقا، قۇيۇق كىرپىكلەر ئارىسىدىكى قوي كۆزلىرىدىن ئۇيقۇ قاچقان ئىدى .
ئادىلە ئۆيگە كىرىپلا بايا كەلگەن نۇمۇرغا تىلفۇن قايتۇردى ، ھايال قالمايلا تىلفۇندا بىر ئەر كىشىنىڭ ئاۋازى ئاڭلاندى :
- ئادىلە، بايا…
- ھە، بايا يىنىمدا بەختىيار ئاكام بار ئىدى، ھازىر ئۆيگە كەلدىم .
- ھە شۇنداقمۇ ؟ ئادىلە يىقىندىن بۇيان سالامەتلىكىڭىز قانداقراق ؟
- ياخشى ، جەۋلان بايا ئالدىڭىزدا سەل خىجىل بوپ قالدىم .
- ھىچقىسى يوق ، ئەمىلىيەتتە مەن ئالدىڭىزدا خىجىل ، قاھار سىزگە كۆپ ئاۋارىچىلىق تىپىپ بەردى .
- مەن كۆڭلۈمگە ئالمىدىم ، مەن پەقەت ، پەقەت شۇ…
- ئادىلە، مەن سىزدىن ئايرىلىپ قىلىپ بەك ئازاپلانغان، ئەمىلىيەتتە سىزنىڭ بەخىتلىك بولىشىڭىز مەن ئۈچۈنمۇ بىر خۇشاللىق، ئەگەر بەختىيار بىلەن توي قىلىپ خۇشالىققا ئىرىشەلىسىڭىز مەنمۇ سىزگە بەخىت تىلەيمەن .
ئادىلەنىڭ كۆزلىرىگە ياش ئولاشتى ، ئۇ نىمە دىيىشىنى بىلەلمەي :
- كەچۈرۈڭ ، سىزگە يۈز كىلەلمەيمەن، دىدى تىتىرەك ئاۋازدا .
- كۆڭلىڭىزنى يىرىم قىلماڭ ، بىز يەنىلا دوست ، ئەگەر خالىسىڭىز داۋاملىق دوست بوپ ئۆتسەك بولىدۇ .
- خالايمەن، ئەللىۋەتتە خالايمەن، ئەگەر سىز مەندىن رەنجىمىسىڭىزلا مىنىڭ سىز بىلەن يىقىن دوست بوپ ئۆتكۈم بار .
- ماقۇل، ئەمسە مۇشۇنداق كىلىشتۇق ، لىكىن بەختىيار بىلەن توي قىلىپ بىئارامچىلىق ھىس قىلسىڭىز ھەر ۋاقىت مىنى ئىزدىسىڭىز بولىدۇ .
ئادىلە ئۆزىنى تۇتىۋالالماي تىلفۇننى ئۈزۈپلا ياستۇقىنى قۇچاقلاپ ئۆكسۈپ يىغلاپ كەتتى، جەۋلان تۇيۇقسىز ئۈزۈلگەن تىلفۇنغا قاراپ جىمجىت خىيالغا پاتقىنىچە ئاستا كۆزىنى يۇمدى .
كىچە ھەر كىمگە جىمجىتلىق ، ئاسايىشلىق بىر يىڭى دۇنيانى مەنزىل قىلغان بولسا، يەنە قانداقتۇر يامان كۈچلەرنىڭ تەسىرىدە مەلۇم جىمجىت كوچىلار كىشىلەرنىڭ ئاھۇ-زارلىرى بىلەن تولغان ئىدى . ئەلى ئەۋەتكەن بىر نەچچە ئادەم سىرىق چاچنى شەھەرگە كىرىش ئىغزىدا تۇتىۋىلىپ، ئۇنىڭ ئاغزىنى ئىتىپ پۇت-قوللىرىنى باغلىغىنىچە جىمجىت شەھەر قوينىدىن ئايرىلدى .
تاڭ يورۇش بىلەن شەھەر قوينى قايتا جانلاندى، دوختۇرخانا زالىمۇ ئۆچرەت ۋە نۇمۇر ئالىدىغان ئادەملەر بىلەن لىق تولغان ئىدى، ئابىدە دىليار بىلەن ئاپىسىنى ئادەتتىكى كىسەلخانىغا يۆتكىدى، ئابىدە دىليارنى يولغا سىلىپ تۈنۈگۈن چۈشتىن كىيىن ئىسمىنا ئالماشقان سىستىرانى ئىزدەپ سىستىرالار پونكىتىغا كەلدى .
- ھەي، تۈنۈگۈن كەچ يىگىتىم بىلەن كىنۇ كۆرگىلى بارغان ، بەك قىززىق كىنۇكەن ، ھەي ئەپسۇس، كىنۇنىڭ ئاخىرىنى پەقەتلا ياقتۇرمىدىم .
- قانداق دەيسەن ؟ ئاخىرى ئىچىنىشلىقمىكەن ؟
- ھەئە دەيمەن ، ئايال پىرسۇناژنىڭ بۇرۇنقى ئاشنىسى ئۇ ئايالنى دوختۇرخانىدا ئۆلتۈرىۋىتىدىكەن ، بەكلا رەھىمسىزكەن ، كۆرۈپ يۈرىكىم ئىچىشىپ كەتتى .
ئىككى سىستىرا ئولتۇرۇپ پاراڭغا چۈشكەننىڭ ئۈستىگە ئابىدە كەلدى .
- سىستىرا خانقىز، تۈنۈگۈن سىز ئاپام زۇمرەت خانىمغا مەسئۇل بولغانغۇ دەيمەن ؟ گەپ سوقاۋاتقان سىستىرا بىشىنى كۆتۈرۈپ ئابىدەگە قارىدى، ۋە سۇس كۈلۈمسىرەپ :
- ھەئە ، خانقىز بىرەر ئىش بارمىدى ؟
- تۈنۈگۈن ئاپامنىڭ تۇيۇقسىز ئۆزگىرىپ قىلىپ جىددىي قۇتقۇزۇلغانلىقىنى بىلەمسىز ؟ ئۇ كىسلاتالىق يىمەكلىكتىن زەھەرلىنىپتۇ .
- ھە ! سىستىرا يىنىدىكى قىزغا قاراپ قويدىدە، ھودۇققان ھالدا :
- كەچۈرۈڭ ، بۇنى مەن بىلمەيدىكەنمەن ، مەن ئىسمىنا ئالمىشىپ سائەت بەش يىرىمدا ئىشتىن چۈشۈپ كەتكەن .
- ئەمسە سىزدىن سوراپ باقاي ، تۈنۈگۈن بىرەرسى زۇمرەت خانىمنى يوخلاپ كەلدىمۇ ؟ سىسىتىرا بىشىنى چايقىدى :
- ئۇنداق ئەمەسقۇ دەيمەن ؟ تۈنۈگۈن بىمارلار بەكلا كۆپ، مەن بەلكىم دىققەت قىلمىغان بولسام كىرەك . ئابىدە بۇ جاۋاپتىن كۆڭلى پەرىشان ھالدا سىستىراغا تىكىلدى :
- ئەگەر بىرەر ئىش ئىسىڭىزگە كىپ قالسا مىنى ئىزدەڭ .
ئابىدە سىستىرالار پونكىتىدىن ئايرىلىپ مىڭىشىغا بايىقى سىستىرا ئۇنىڭ ئارقىسىدىن يىنىدىكى قىزغا قاراپ كۇسۇرلىدى :
- ھەي، ئاڭلىشىمچە، زۇمرەت خانىم بۇرۇنقى ئاشنىسى بىلەن تۇتۇلۇپ قالغاچقا يولدىشى ئۇنىڭغا ئانچە پەرۋا قىلمايدىكەن ، يىڭى ھاياتتەك شۇنچە چوڭ شىركەت خوجايىنىنىڭ ئۆيىدە بۇنداق سەتچىلىك يۈز بەرسە قىزى بولغان ئادەم قانداقمۇ خاتىرجەم يۈرەلىسۇن ؟
ئابىدەنىڭ قۇلىقىغا كىرگەن بۇ يىقىمسىز گەپلەر ئۇنىڭ قەدىمىنى توختاتتى، ئۇ ئارقىسىغا بۇرۇلۇپ بايىقى ئىككى سىستىرانىڭ يىنىغا كەلدى .
- بايا نىمە دىدىڭىز ؟ ئابىدە يالغاندىن ماتىريال كۆرىۋاتقان سىستىراغا تىكىلدى .
- مەن، مەن ھىچنىمە دىمىدىم ، شۇ، شۇ ئۆزىمىزنىڭ پارىڭىنى قىلدۇق . يىنىدىكى سىستىرامۇ كۆزىنى قىسىپ قويۇپ ئىچىگە كىرىپ كەتتى .
- ئاڭلاپ تۇرۇڭ ، بۇ دوختۇرخانا ، باشقىلار ئۈستىدىن شىكايەت قىلىدىغان ئورۇن ئەمەس ، بۇدۇ يەنە مۇشۇنداق شۆپۈك ئىغىزلىق قىلغىنىڭىزنى كۆرۈپ قالماي ، بولمىسا… ئابىدە سىستىراغا سىنجى كۆزلىرى بىلەن قاراپ قويدى ، ئۇ ئارقىسىغا بۇرۇلدى :
- ھازىرقى ئادەملەرنىڭ نىمانچە ساپاسى يوقتۇ دەيمەن ؟ نەدىن ئاڭلىغاندۇ بۇ ئۆسەك گەپلەرنى ؟
ئابىدە ياتاققا كىرىپ ئاپىسىنىڭ يوقلىقىنى كۆرۈپ چىرايى بىر قىسما بولۇپ كەتتى :
- ئاپا ! ئاپا ! ئابىدە جىددىيلەشكىنىدىن ياتاقنىڭ تازلىق ئۆيى دىگەندەك جايلىرىنى تەپسىلىي ئاختۇرۇپ زۇمرەت خانىمنى تاپالمىدى .
- ئاپام نەگە كەتكەندۇ ؟ ئەجەبا…
ئابىدە ئوقتەك يۈگۈرۈپ كارىدۇرغا چىقتى، كارىدۇردا سىستىرا ۋە بىر قىسىم بىمارلار مىڭىپ يۈرگەن بولۇپ، زۇمرەت خانىم كۆرۈنمەيتى .
- ئابىدە خانقىز !
تۇيۇقسىز كەينى تەرەپتىن كەلگەن ئەر كىشىنىڭ ئاۋازى بىلەن ئابىدە ئارقىسىغا بۇرۇلۇپ ساۋاقدىشى مالىكنى كۆردى ، ئۇ ئۈستىگە ئاق خالات كىيىۋالغان بولۇپ، ئابىدە ئۇنىڭغا قاراپ دەماللىققا تونۇيالماي تىڭىرقاپ قالدى .
- نىمە ؟ ساۋاقدىشىم مىنى تونىيالمىدىڭىزما ؟
- مالىك ؟ سىز مالىكما ؟
- ھەئە، ئاخىرى تونۇدىڭىز .
- ۋۇي، سىز بۇ يەردە نىمىش قىلىسىز ؟
- مەن بۇ دوختۇرخانىغا يۆتكىلىپ كەلگىلى بىر ئاي بولغان ، ئازراق يۆتكىلىش ئىشلىرى بىلەن ھايال بولۇپ بۈگۈن ئىشقا چۈشتۈم .
- ھە ياخشى بوپتۇ ، كۆرۈشمىگىلىمۇ ئۇزۇن بوپتۇ ، سەل سەمىرىپ قاپسىز .
- شۇنداق، دوستلۇرۇممۇ سەمىرىپ قاپسەن دەيدۇ . ئۇ ئابىدەگە تەپسىلىي قاراپ چىقتى :
- سىز بۇرۇنقىدىنمۇ چىرايلىق بوپ كىتىپسىز ، توردا دائىم سىزنىڭ خەۋەرلىرىڭىزنى ئاڭلايمەن ، سىز بەك قالتىس جۇمۇ !
- مالىك ، ئاپام دوختۇرخانىدا ئىدى ، ئىغىر كۆرمىسىڭىز ماڭا ئىزدىشىپ بىرەمسىز ؟
- ھە ماقۇل ، قايسى ياتاقتىكى بىمار ئىدى ؟
ئابىدە ياتاقنىڭ نۇمۇرى ۋە زۇمرەت خانىمنىڭ كىسەللىك ئەھۋالى توغىرلىق ئۇنىڭغا بىر قاتار سۆزلىگەندىن كىيىن مالىك مەنىلىك كۈلدى :
- ھە خاتىرجەم بولۇڭ ، كىسلاتالىق يىمەكلىك ئاشقازاننى تازلىسىمۇ ئادەمنى بەكلا بىئارام قىلىدۇ، بۇنداق بىمارلارنىڭ نەپەسلىنىش سىستىمىسىمۇ ئىغىر بۇزغۇنچىلىققا ئۇچرايدۇ ، بەلكىم دوختۇر ئاپىڭىزنى داۋالاش ئۆيىگە ئىلىپ كەتكەن بولىشى مۇمكىن، يۈرۈڭ بىز بىرىپ قاراپ باقايلى .
ئابىدە بىشىنى لىڭشىتىپ مالىكقا ئەگىشىپ ئادەتتىكى داۋالاش ئۆيىگە كەلدى ، مالىك ئىچىگە كىرىپ بەش مىنوتقا قالماي كارىدۇردا ساقلاۋاتقان ئابىدەنىڭ يىنىغا چىقتى :
- پەرزىم توغرىكەن، ئىچىدىكى بىمار ئاپىڭىزكەن، بايا دوختۇر سىزنى تاپالمىغاچقا سىستىرا بىلەن ئاپىڭىزنى داۋالاش ئۆيىگە ئىلىپ كىتىپتۇ ، بەك ئەنسىرەپ كەتمەڭ .
- مالىك، سىزچە ئاپامغا بىرسى قەست قىلغانمىدۇ ؟ تۈنۈگۈن B رايۇنغا مەسئۇل سىستىرا مەندىن بىر ئىشنى يۇشۇرىۋاتقاندەك قىلىدۇ ، مەن شىركەتتە ئالدىراش بولغاچقا ئاپامنى سىستىراغا تاپشۇرغان ، تۈنۈگۈن چۈشتىن كىيىن ئۇ تۇيۇقسىز ئۆزگىرىپ قاپتۇ .
- ھە مۇنداق دەڭ ، بۇ ئىشنى مەن سۈرۈشتۈرۈپ باقاي ، مەن بۈگۈن B رايۇنغا مەسئۇل . ئابىدە مىننەتدارلىق تۇيغىسى بىلەن كۈلۈمسىرەپ قويدى :
- رەھمەت سىزگە ، بۇ ئىش بەك مۇھىم ، ئەمسە سىزگە تاپشۇردۇم .
- خاتىرجەم بولۇڭ ، يەنە ئازراق ئىشىم بار ئىدى، بىز كىيىن كۆرىشەيلى . مالىك ئابىدە بىلەن خوشلىشىپ كىتىپ قالدى .
