作者：柯兆银
沪语改写：边秦翌
讲述：漫真
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
“我出房租，三室一厅做画室也是好个啊。”顾讲。“三室一厅租了五六年，每个号头房租一万二千，我一塌刮子拿到过一万块，介许多钞票到阿里去啦？还有，侬问我借50万，当初讲好半年就还拨我个，现在一年多过去了，一分洋钿也没还。现在，侬讲出房租，叫我哪能相信侬呢？”关讲。“唉！”顾叹了口气。“我寻侬来，听说侬要离婚了？”关问，“是玲玲勒电话里告诉我个。”“噢，侬晓得啦？我要离婚，要搬出去，反正儿子也结婚了。”顾老激动个。“我问侬，侬阿是勒外头有女人了？”“嗯，搭个女个好了，我觉着伊真个懂我。”
迭个辰光，窗门外头传来“哗啦啦”老老大个响声，一道霍险拿天照得老亮，挨下来就是是老老大个雷声，暴雨落下来了。
“侬搭我详细讲讲伊个情况，职业、婚姻状况、还有收入。”“比我小，安徽人，勒家公司工作。”“勒上海住个房子是伊买个还是租个？”
“租个。我让最欣慰个，是伊最懂我个画。我勒屋里画图，老婆总规骂我拿房间弄得介龌龊，让伊看我创作个作品，伊总归讲看勿懂，勿晓得勒瞎涂点啥，看也覅看，还讲，看了我个画，再晓得外头个画家卖出来个物事侪是勒骗人个。我个画有点抽象，葛是艺术才华个展示呀。作品拨勒张小姐看，伊会得看个半日天，勿停个讲赞个呀赞个呀，还鼓励我。姆妈，我碰到知音唻！”
“哈哈哈哈，好笑伐，侬忒要听好闲话了。就因为迭个要离婚？”“是个。我要开始新个人生。姆妈，侬借拨我30万，我要结婚派用场，侬要帮我一把个。”
“啊？借钞票？等侬还了50万再讲伐；借房子，勿来三，我勿好支持侬离婚，再讲，万一我阿里天要勿蹲养老院，万一生毛病要用大钞票，房子就是我个退路，是我个经济来源。”
陶看顾，看到伊呆笃笃朝关看。伊勿擅言词，搭伶牙俐齿个玲玲形成了鲜明个对照。
有人进来叫关槎麻将，伊摇摇手“儿子勒海，今朝勿白相了”。又问儿子：“侬老婆肯离伐？”“伊随便哪能也勿肯，除非我净身出户，我已经答应了。姆妈，我今朝就没地方可以去了，侬拿房子借拨我好唻。”伊勒勒求娘。“房子搿歇勿是有房客个嘛？侬也住勿进去呀。”关讲。“我已经搭房客谈过了，礼拜天伊就搬脱。今朝开始，我住两天宾馆。”“啊？没得到我同意，侬就让房客搬脱了？假使我勿同意拨侬住呢？”伊问。“勿可能个，侬是姆妈呀。”顾憨嗨嗨个笑了。关拿茶杯吃茶，面孔看勒窗外头，好像老勿开心个。“姆妈，侬就让我住好唻。”顾讲。
“侬有啥资格让房客走呢？房子所有者是我搭侬阿伯，阿伯走脱，房子就是我个。”顾讲。“侬个房子将来也是我个。”顾讲。
“啥人讲个？还有囡儿唻，”关翻了伊一记白眼“再讲，我也好拿房子捐拨社会个呀。”“姆妈，侬总勿至于看儿子落难，见死勿救伐？”伊个口气软下来了。
“房子勿好让侬住，让侬住就是支持侬离婚。海海，侬要快点刹车，马上搭张小姐断绝关系。蛮好个家庭哪能好拆散脱呢？下趟来，侬拿房产证还拨我。还有，要借30万，呒没个。”关美娟态度邪气鲜明。顾海海呆脱了，面色邪气难看，讲勿出闲话。
作者：柯兆银
讲述：漫真
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
