作者：王胜扬
沪语改写、讲述：牛美华
文字、语音审核：丁迪蒙
编辑：王乙其
“越老越像馋佬坯”，勿是讲人家，而是讲我自家。退休之后，我好像变得来越来越留意吃，越来越欢喜吃了，正勒勒朝“吃货”靠拢个我，越来越像上海人嘴巴里向讲个“馋佬坯”了。
我个上半辈子其实是勿大会吃、也勿哪能在乎吃个。各种食物摆勒面前，也勿讲究啥个色香味，只管装到肚皮里去，“吃勒肚里侪是食”。前一腔，勒《吃饭像煞畚砻糠》个豆腐干文章里，我曾经提到过50年前头勒开河个工地浪一顿要吃脱足足一斤个米饭，重体力劳动个搿种吃法，当然是狼吞虎咽了，根本谈勿上有滋有味个享受。后来，随牢仔改革开放、生活水平个提高，吃饱、吃好虽然勿是问题，只不过迭个辰光人个心思大部分摆勒工作浪，老少有辰光去研究食材、调料、烹调、菜系唠啥个。
退休以后、人生角色转换，“吃”勒我个生活当中个地位发生了老大个变化，我慢慢叫感悟到了“民以食为天”个深厚内涵，觉着舌尖浪个享受勒人生当中有得稳如泰山个重要位置。现在，只要到闵行区“万”字当头个万科、万象、万达咾啥大型购物中心，勒各类高档日用消费品个柜台前头，我个目光是茫然、暗淡个，搿些物品，我觉得伊拉已经搭我勿大有关系；而看到伊些挂仔五颜六色招牌个饮食店、食品超市、菜肴柜台个辰光，我个眼睛会得像探照灯一样个扫描伊些琳琅满目、色泽诱人个食品，想勒海搿趟到粤菜店去，下趟到川菜店去，今朝买沙琪玛，后日买枣泥饼------，想想迭个世界浪还有介许多好吃个物事勒等牢自家去享受，以后个人生还是有意义，值得珍惜个。
搿能样子个认识，让我外出旅游个内容也发生了变化。以前出去旅游，只钟情于美丽个山水、旖旎个风光或者感兴趣个人文历史，现在呢，旅游则会对旅行社提出更加多个需求：勿光要有好个景点，还要有好个用餐。今年四月中旬，我搭几个老同学“烟花三月下扬州”，朋友老早勒当地预订了正宗个淮扬菜，蟹粉狮子头、大煮干丝、软兜长鱼（黄鳝）……，尽兴个领略了一番扬州菜。
我欢喜吃，想吃得好，但嘴巴勿刁，勿挑食。啥个生煎咾、锅贴咾、河南烩面、韭菜盒子咾，侪可以是我碗里个菜。记得有位外国哲人曾经讲：越勿挑食就越幸福。欢喜吃个食物多一样，侬个幸福就多一分。我蛮同意伊个观点个。当然，日常生活当中吃得最写意个，还是自家烧个家常菜，一荤一素一汤，配香喷喷个白米饭，就是适适意意一顿饭了。
今年临近端午节，92岁高龄个老娘搭往年一样，已经老早为小辈包好三角肉粽了。粽子吃到嘴巴里，又香又糯又鲜，搿味道是没啥食品好告伊媲美个，我还勒享受老娘带来个满满幸福感。
勿挑食，勿等于我对美食呒没追求。前几日勒微信抖音浪看到一段视频，评论传统个中国八大菜系，一一点评了粤菜、川菜、苏浙菜咾啥现在个地位。我注意到，除脱传统个八大菜系之外，云南个滇菜也值得关注，因为云南伊面各种各样个食材无论是荤菜、还是素菜侪特别好，只是滇菜个烹调技术还有待精细化。假使烹调技术上去，滇菜完全可以走进八大菜系个前列。看到迭个视频，我又勒兴奋个盘算啥辰光到云南去旅游，再去光临昆明个《菌王府》，品尝宜良烧鸭、白油鸡枞、汽锅鸡、大救驾，“过桥米线”搿些美食，心里想想也是开心个。
没办法，年纪越大，搿馋劲越是挡勿牢，怕真个成为了个勿折勿扣个馋佬坯，改勿脱了呀。
讲述：牛美华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
