作者：柯兆银
沪语改写：边秦翌
讲述：徐雯俊
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
“我觉着还是观念问题。欧洲国家个人有种认知，爷娘活勒海个辰光应该尽情个享受生活，到晚年失去自理能力了，要靠药物维持生命个辰光，就干脆安乐死。迭个辰光子女勿让爷娘死，就是对老人个虐待，就是侵犯人权了。”陶笑了笑“阿拉中国勿少年轻人个观念，是小辰光听爷娘个，爷娘老了就要听子女个，子女勒爷娘生重病、失去自理能力个辰光，是可以决定老人个生活方式，甚至是老人死个方式。中国子女往往勿关心爷娘个生活质量，勿关心爷娘希望个生活方式，只关心爷娘是否活勒海。同样对待老人，中外观点邪气勿一样。”“嗯，陶老师讲得对。”关讲。
“中国人讲究‘好死勿如赖活’，我想，人老到自家也勿晓得自家个辰光，再活勒海确实没啥意义。我个态度是活得开心，死得爽快。”陶讲。“陶老师想得通透。”关大声个笑了。“葛末哪能活得开心呢？”宋问。
“我觉着一是动脑；二是动手。动脑就是要学习，从读书开始，温习老底子学过个，吸收新个知识。动手嘛，就是要学习新个技能。”陶深有体会“交关物事，譬如到饭店用二维码点菜，微信付款，支付宝付款，其实并勿难，一学就会，或者讲多学几趟就会。人个交关功能，用则进，勿用则退则废。”“嗯，讲得深刻，有普遍个指导意义。”关赞同。“陶老师讲得好，我手机勿用，微信出来，我就当是是年轻人个物事，勿学勿用，叫人装了微信，也是从来勿看勿用个。”宋感叹。
“交关六十几岁个人就觉着自家老了，好做个事体就勿做了，好勿学个新物事就勿学了。世界浪个事体就是搿能，侬认为难，就真个难了。子女也认为爷娘老了，啥事体侪勿让做，就让侬坐勒海、睏勒海，勒自家屋里蹲勒海，辰光一长就啥也勿会了，慢慢叫就拨时代抛弃，拨社会抛弃，拨子女抛弃了。” 陶深有体会，讲：“交关新物事比阿拉想象个要简单得多，阿拉个能力比自家认为个要强得多。”
“陶老师，侬讲得真好。”宋讲。“当然咾，老年人既勿要拿自家当老人，也要当自家是老人，勿适宜做个、勿好做个事体覅去做，譬如搬重物事咾啥。”陶补充。大家侪笑了。
“我想，放弃自家就是变老个开始。英国哲学家罗素讲过，‘强烈个爱好让我免于衰老’。阿拉要有爱好，要会得白相。有句世界名言讲得好‘阿拉勿是因为年老而停止快乐，而是因为停止快乐再会变老’。所以，我看书是爱好，关老师打麻将也是爱好。”
“哎，有道理个，我也要恢复自家个爱好，重新温习英语，对防止老年痴呆症有好处个呀。”宋讲。“我曾经到河南出差，特为到洛阳市东郊个白马寺去，伊面有副对联，让我印象深刻。‘天雨虽宽不润无根之草，佛法虽广不度无缘之人’，含义深长呀。”陶讲。“老好个对联呀。”宋讲。“人家讲，308个老人是最健康个，最有知识个，” 黄红梅突然出现了，哇啦哇啦叫“必过，陶老师讲个物事我听勿懂。”陶、关搭宋侪吓了一大跳，陶老勿开心，用眼睛个余光看了伊一眼，真是没知识，进来也勿打声招呼。
作者：柯兆银
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
