作者：柯兆银
沪语改写：边秦翌
讲述：郑玮
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
陶个头低下去，伊沉浸勒一种激动个情绪里向。
叶璐看看娘，周示意伊勿要讲闲话，让陶静一静。
陶突然手捂牢仔面孔，放声哭起来了。叶璐拿餐巾纸递拨陶揩眼泪。
“好个！我准备准备，就来搭㑚蹲勒一道，我要自家选择自家个生活！”陶含仔眼泪水讲。
“今朝日脚牢特别个，要举杯祝阿拉新生活个开始。”周讲。“忒好了！忒好了！”陶满面笑容。叶璐勒三只杯子里倒酒，三个人举仔杯子碰一记，拿酒吃光，还亮了亮酒杯。“烤肉炒饭要伐？”叶璐问。“覅了，饱了。”陶讲。“我也饱了。”周讲。
“今朝菜忒多了。”陶看看台子浪个菜。“打包，陶老师带转去。”周讲。
伊拉下半日两点钟走出餐厅，调了只咖啡店吃咖啡，直到四点半再走。乘电梯下去直接到地铁站，乘8号线直奔五角场站。出地铁站，叶璐叫了部差头让伊开到养老院，拿打包个塑料盒头递拨勒陶，周朝陶挥挥手“阿拉等侬噢！”“准备好了打电话拨我，我来接侬。”叶璐讲。
“好个好个！谢谢噢！”陶依嘉老开心个“最多一个礼拜我就搬出来。”
“阿拉期待勒海噢！”娘囡儿一道讲。
差头开到养老院，陶笑咪咪走了进去。伊回到308房间，看到关搭宋浴侪汏过了，关着件砖红色个短袖T恤，宋着条黑颜色个连衫裙，两个人头发侪是湿个。关笃悠悠个勒白相手机，黄红梅勒为宋剪指掐。陶拿冰箱开开来，拿塑料盒头摆进去。
“侬夜饭吃过了伐？”关问“阿拉刚刚吃好。”“中饭、夜饭一道吃了。”陶讲。
“吃好还带转来，佮算个。”黄红梅讲。
“有红烧肉、酸菜鱼搭茶香鸡。”陶满面孔笑容“明朝请大家尝尝味道。”
“葛忒好唻！”关讲，“陶老师侬真开心啊。”“我欢喜红烧肉，上海个红烧肉真个好吃。”黄红梅讲。“侬个小姊妹真好！难得个！也是侬个幸运！”关老眼痒个。
陶看看宋，伊个收音机勒播历史故事，但是伊只是静静叫个看牢仔窗门外头发戆，本来想问问有关伊儿子个事体。手机迭个辰光发出了有微信进来个响声。陶拿手机看， 是叶璐发得来个照片、视频：唱歌，搭周讲闲话，勒饭店搭周抱勒一道……
“㑚看我个照片，还有视频呶。”陶选了几张照片、视频发拨勒关。宋勿用微信个，伊个手机几乎从来勿用，没电了就去充，充好电就摆勒边浪。“侬也发拨我呀。”黄要求。陶有点犹豫，讲了声“好个”，也发拨黄了。关搭黄看手机，发出了赞扬声。
“陶老师唱歌风度邪气好，重阳节好上台表演表演。”
关哈哈大笑“我也要去唱歌，陶老师，侬看阿拉寻只辰光，天风凉点一道去。”“好个呀。”陶邪气爽快。“拨我看看看。”宋搭关讲。关走过去，老热心个拿照片拨伊看。
“外头个世界真美好！”宋老眼痒个。
“啊，我娘生我，阿伯要搭我取名，听到歌剧《江姐》里向个《红梅赞》，就搭我取红梅了。” 黄讲。“噢，侬个名字原来是有出典个。”关讲，“迭个名字好。”
作者：柯兆银
讲述：郑玮
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
