来源：上海老年报2024-06-06
作者：何振华
沪语改写：飞飞
沪语讲述：何振华
文字、语音审核：丁迪蒙
编辑：王乙其
小个辰光，寿祥里唐家伯伯养个一只黑猫，也是我个道伴。直到我21岁屋里搬场、离开寿祥里埃些辰光，伊还活勒嗨。伊虽然拨驐脱了，但是威武丝毫勿减，外人根本近不了身。一看见陌生人，伊马上跳到亭子间门口头乌漆墨黑个扶梯口，一双碧碧绿个眼睛炯炯发光。唐家伯伯吃饭个辰光，黑猫就勒八仙桌下头蹲勒勒。我读个小学就勒勒靠近寿祥里个恒安坊，每天放学回来，一个转弯，就进了自家后弄堂，经过唐家门口，老远就可以看见黑猫要么蹲、要么坐、要么趴，望好我勒嗨。等我到伊眼门前，伊“喵呜喵呜”，亲热个勒我裤脚浪蹭来蹭去。别人侪勿敢引伊白相，勒伊个心目里，我就是伊最要好个道伴。
一直以来，我就想领养一只玄猫。搿一趟，勒宠物店看见4个号头大个加菲小黑妹。伊朝我又是眨眨金黄色个眼睛，又是伸过小爪子搀搀我个手。我相信缘分，当场就叫宠物店老板娘搭伊汏浴，闪送到屋里。
呒没想着，一看见屋里来了个新成员，三只原住民猫咪异口同声，朝小黑妹勿停个“唬”，邪气勿欢迎。反应最大个是老三布布，伊前前后后，一刻勿停个跟老小黑妹，监视伊个一举一动，几乎寸步勿离。小黑妹像煞小公主，摆出一副根本不拿自家当外头人个样子，也呒没猫科动物侪有个领地意识。平常辰光日里向，迪迪、汤团、布布界限分明个沙发椅子、角角落落，伊想坐就坐，想睏就睏，布布睏惯个单人沙发，一夜天功夫就成了小黑妹个宝座。
辰光老快，春节一过，就抱小黑妹去做绝育手术。爱人告诉我，勒医院里向，小黑妹孵了伊胸口头，邪气温顺。体检，抽血（化验），打针，一点勿强，一声勿吭；手术之后麻醉一醒，回屋里路浪也是一声勿响。到仔屋里，该睏睏，该吃吃，该喝喝，勿闹勿皮，蛮晓得保养，也勿舔创口。几天工夫，伊就上蹿下跳，生龙活虎。每天大清老早，小黑妹学姐姐布布个样，跟老伊到我睏高房间个门口头“喵喵”叫早，小爪子勿停地叩门。
玄猫历来有“辟邪之物”个美誉，开始，我告爱人还猜测，一身乌黑锃亮个小黑妹，以后会勿会得长成我伲屋里最威武个猫，甚至像我小辰光白相个道伴玄猫一样，让人看见仔有眼吓丝丝。从小黑妹进门直到乃，我告爱人最最在意个，是布布个感受。每日天第一个抱个肯定是布布。虽然就只是抱一抱，放伊下来，它满房间个奔，跳上跳下，开心勒勿得了。
原来最得宠个布布，就此长大了。伊拿出姐姐个气度，不告妹妹争。交关辰光，布布待小黑妹，有一份天然个姊妹情。勒勒布布面前，调皮个小黑妹懂得收敛。勿像两个哥哥，仍旧告小黑妹保持一定个距离。偶尔相向而过，还会得朝小黑妹“唬”个两声。小黑猫丝毫不介意迪迪搭汤团个敌意，坚持勿懈个告两个哥哥示好。两个大哥哥总算拨小妹妹个真诚、礼貌搭仔尊敬感动了，慢慢叫慢慢叫，开始会相互靠近了。勒熟悉个气息里，伊拉勿再警惕对方，建立了彼此之间个信任。
作者及讲述：何振华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
