作者：柯兆银
沪语改写：边秦翌
讲述： 安娜
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
看看手表，7点半，下去走路忒早了。每日天上下半日各下去走一趟，搿是规定动作，也是伊觉着最自由个辰光。陶觉着有点倦，昨日夜到没睏够，搿歇想睏觉了。闭起眼睛，一歇歇就睏着了，醒来之后伊觉着精神好得多了。
“陶老师睏得真香啊。”关笑勒海讲。“肯定夜里没睏好，补伊觉呀。”宋讲。
“我现在比㑚睏得早，睏着了就听勿见㑚打昏涂了。”陶讲“搿歇有点习惯㑚个昏涂声了，下趟听勿着，估计会得睏勿着了。”陶讲。关哈哈大笑，伊总归笑得响；宋也跟勒海笑了。
“侬勒看啥照片啊？”关走过来，蛮感兴趣个。“儿子囡儿每年过生日，我总归要搭伊拉合影个，搿是廿年个合影。”陶讲。“噢，让我唻欣赏欣赏。”关拿照片看“啊，真有意思个！陶老师，侬勒伊拉身浪花了交关心血呀！”“娘嘛，应该做个。”陶讲。
“我等歇要到八楼去唱歌，每个号头卡拉OK开一天。”关看看手表，蛮期待个讲，“陶老师，一道去伐？”“我五音勿全个。”陶摆摆手。
关拿手机看；宋下床，两只手趴勒窗台浪朝远处望。陶没事体，无聊，走到对过房间去看看黄老太，伊勿勒海；一床个方老太躺勒床浪，李莉勒帮伊揩身体。
“我覅来，儿子硬劲要送我来，勒屋里没人照顾。”三床个朱老太手抱脚馒头坐勒床浪向讲。“慢慢叫会得习惯个。”陶安慰伊。“我要转去，要转去呀。”朱老太勒自言自语。
陶一回自家房间，就看到焦丽英急匆匆走进来，对牢宋哇啦哇啦讲：“宋老师，侬有儿子伐？”陶搭关侪一呆，老惊讶个看牢宋。“哪能啦？”宋问。
“侬有儿子伐？”焦丽英又问，“刚刚有人打电话来，问侬阿是住勒此里；我问伊是啥人，伊讲是侬儿子，从美国来。寻勿到侬，就寻到派出所，再寻到居委会，最后寻到了此地。”“嗯，算是有伐，”宋蛮尴尬个，老急个问“伊讲点啥？”“伊问了地址，讲要来看侬。”焦丽英老奇怪个“宋老师，侬勿是孤老吗？”“几十年没联系了，有等于无。”宋冷冷个讲。“哦。”焦丽英转身急匆匆个走了。
陶搭关交换了惊讶个眼神。宋坐勒椅子浪勿响，捂牢仔面孔哭起来了。关走到伊门前，关心个问伊：“宋老师，侬哪能啦？”“宋老师，有啥事体需要阿拉帮忙伐？”陶也走过去了。宋没回答，只管自家哭。
“宋老师，侪是自家人，有啥难处尽管讲出来，作兴阿拉可以出力呢，陶老师肯定可以为侬出出主意个。”关主动个讲。宋阿萍收起哭声，眼泪汪汪个看关搭陶，再拿餐巾纸揩眼泪，有点犹豫，摇摇头：“说来话长，一言难尽。”
陶回到自家床位边，担心个看宋。啊，一直当是宋是孤老，搿歇冒出来几十年没见个儿子，是哪能桩事体呢？看伊激动个表情，确实是有个，伊还是希望看到儿子个。有儿子但是几十年没看到，有多少痛苦啊！
作者：柯兆银
讲述：安娜
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
