来源：海上文苑
作者：王建运
沪语改写、讲述：王邦基
文字、语音审核：丁迪蒙
编辑：王乙其
勒旧社会，人刚刚到一个地方去谋生，有得需要“拜码头”个讲法，也就是要拜访当地个地头蛇或者强势个人物，送笔厚礼再好安生。据说，迭个拜码头源自旧上海码头工人个营生。伊歇辰光，沪上个每只码头侪有强势人物把持，侬想进迭个地方谋生就要有人引见，后来，迭个说法延伸开来，就是想投靠某个势力门下个侪叫拜码头。
葛末，旧上海码头浪个伊眼人搭事体又是哪能桩事体呢？大家顺牢本文去了解一二伐。
浦江客货码头密集
一条黄浦江，最早拿上海搭仔全国各地乃至全球联结起来，使得申城成为了东西接攘、南北通衡个水陆码头城市，自宋代以来，上海就有了内河搭海洋相衔接个航运业个兴起。黄浦江，从吴淞口到外滩迭段黄金水道，以无可替代个地理位置优势，成为了航运业不可缺少个重要停泊点。据资料统计：上海从开埠开始，迭段水域个两岸几乎侪是公私专用码头，勒勒复兴岛、杨树浦临江一带工业区，勿管是洋人开办个企业，还是民族资本兴办个工厂，几乎侪拥有属于伊拉自家个专用码头。
进入中心城区之后，密集个客货两用码头，又成为了上海迭座临海城市个特有个风景线，从小东门十六铺码头到南码头勿到两公里个路段，竟然汇聚了28只码头。除脱以上水域地段个码头，假使再加上前后繁如辰星一样分布勒浦江两岸个大小码头，每天来往接送个人流搭仔货物，可以讲是浩瀚如繁星、不可计数。
受尽盘剥个码头工人
货运轮船进入上海港之后，挨下来就是装缷货物。伊个辰光装卸货物几乎侪靠人力，使用个工具极其简陋，除脱跳板、箩筐搭仔少量个人力板车、手推车之外，工人还要带杠棒、绳子搭仔搭肩布，有辰光，上千斤重个货物也要靠杠棒搭仔人力搬运，劳动条件邪气艰苦、恶劣个。
中外货轮当时勒上海码头抛停个辰光，一般侪勒8到10天，装缷货物个码头工人，扛大包几乎勿需要技能，只要年轻有力气就可以了，因此，勒码头浪做生活侪是采用计件个包工制，做一日生活算一曰，呒没生活做就没收入。于是，大大小小个包工头就应运而生，迭个行业就有了强势力搭仔恶霸个“大鱼吃小鱼，小鱼吃虾米”个盘剥现象。凡是想勒码头浪做生活个，就要经过熟人或者以乡籍为人脉来引见，从经过大包工头个手，再转到下头个小包工，再好进作业区去做生活，通常，工人每日天个收入经过盘剥，也就剩勿了多少了。
据当年统计：上海民国时期各港口码头工人大约有二万多，大体分为杠棒、肩扛、堆装、轮船装卸等几只工种。劳动强度大，作业条件差，收入微薄。伊拉伊歇辰光几乎食不果腹，衣不蔽体，生活是饥寒交迫，夜里向则大多数露宿街头。
外滩老底子有条小弄堂叫元芳弄，是当年有名个“穷窟”，码头工人每日天夜里向拆轧满。金陵东路两面个“过街楼”下头也常庄拨码头工人轧满。一到冷天，伊拉几乎侪到公共厕所去过夜，轧勿落了就露宿勒马路浪，每趟寒潮来临侪会有人拨冻煞脱。
包工头为了掌控勒勒码头个势力，组织各种流氓团体，名目繁多，像卅六股党、五虎一豹、九条龙、十三太保咾啥。有个包工头利用乡土观念，按工人勿同籍贯搭仔地区，组成苏北帮、湖北帮、宁波帮咾啥，伊拉各占一方，压迫、剥削。包工头里勿单有黑社会势力为后台，有点介还勾结军警搭仔各种强权势力，对码头实施为所欲为个统治。
作者：王建运
讲述：王邦基
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
