作者：柯兆银
沪语改写：边秦翌
讲述：安娜
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
“芳芳讲得有道理个。”梅赞同。
“姆妈要做啥，阿拉无权干预。噢，应该养娘个人却勿愿意养，还勿让伊到其他地方去养老，有得搿种道理伐？”阿珍看了阿明一眼，撇撇嘴巴。
“姆妈只有我一个儿子啊？”阿明勿客气个回过去。
“申教授，侬也要贡献意见呀。”阿霖搭一直勒看手机个申江涛讲。“噢，事发突然，我勒考虑呀。”申讲。
“侬是张家个女婿，勿好拿自家当外头人，张家个事体就是侬个事体，侬要积极参与呀。”阿珍推推伊。“晓得了。”申态度蛮好个。
“哪能介阻止姆妈到周老师屋里去养老呢？”阿霖讲，“我想，一是劝姆妈；两是断姆妈个路，搭周老师谈，逼伊勿接受姆妈，搿要阿明出马个。”“大阿哥真个是诸葛亮！”季翘起大节头，“介有本事个人我还没看到过。”“阿里啊，侬讲得过分了。”阿霖满面孔笑容。
“确实，只有周老师改主意，姆妈就会得继续留勒养老院。但是周老师勿好对付个，再讲我去寻伊老勿合适个。” 阿明蛮为难个。
“侬个能力搭大阿哥没办法比，要靠大阿哥出马。” 季朝阿明迓迓叫眨眨眼睛。
“还是阿明去伐。劝姆妈进养老院多少难啊，阿明成功了，我是自叹勿如。”阿霖笑笑，“阿明，覅讲侬寻周老师勿合适，我认为更加合适，前丈母娘搭前女婿谈事体总归要客气点伐。”“大阿哥讲得有道理。”阿珍马上附和，伊就等勒海看好戏。
阿明勿断个摇头，拿了粒葡萄想吃，结果落勒地浪。伊低头去寻，季已经伸手拾起来，厾到果盆里了。季想，阿霖狡猾，阿明根本勿是伊个对手。伊讲：“我建议大阿哥搭阿明一道去，阿珍有空一道去更加好，搿表明子女个一致看法。”
“我勿去，阿明搭芳芳一道去更加好，芳芳足智多谋，临场发挥绝对好。”阿珍带了点嘲讽。“哎，搿闲话有道理。”梅勿晓得阿珍闲话个意思，马上附和。
“我去没问题——但是，新妇出场合适伐？”季问。
“侬已经嫁到张家几十年了，张家个事体侪是侬勒主持、参与，有啥勿合适？”阿珍勿客气了。“芳芳，阿拉就一道去伐？”阿明讲。季心里勒骂阿明戆，伊笑笑“老婆到丈夫个前妻伊面提要求，侬想合适伐？”
“搿倒是个，芳芳讲得有道理，”梅讲“还是阿霖搭阿明去好。”“大阿嫂讲得有道理。”季赞扬，梅笑了。阿珍勿屑个朝梅看看，心里想，只戆大，拨芳芳卖脱了还开心得数钞票唻。“好个，我搭阿明一道去。”阿霖讲。
“大阿哥出马，以一当十，”季搭阿明讲“侬跟勒海好好叫学习。”
阿明笑了，搭大家讲：“吃茶，吃葡萄。” 季搭阿霖递香烟、点火。
“现在，讲讲侬要发个红包？”梅搭阿霖讲。“好好好，搿关系到阿拉在座每个人个切身利益。”阿霖吐烟圈，故弄玄虚，停了停。
“覅卖啥关子了，有闲话就讲，有屁就放。”梅催伊。大家侪笑了。
阿霖拿香烟屁股厾进烟灰缸，吃了口茶，看大家一眼讲：“我先问只问题，假使阿拉每家人家勿出1分洋钿就好赚100万，是正当途径获得个，大家要伐？”全场一阵笑声。“我第一个要。”阿珍举手。“大阿哥勒开玩笑伐。”阿明讲。
作者：柯兆银
讲述：边秦翌
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
