来源：海上文苑
作者：王建运
沪语改写、讲述：王邦基
文字、语音审核：丁迪蒙
编辑：王乙其
往期回顾：
码头盗窃屡见不鲜
旧上海码头常庄有货物搭仔客人携带个物品失窃事件，尤其是货轮装载个物品，勒装卸运输过程中被盗、失窃，可以讲是邪气平常个事体。搿眼失窃老少是工人做个，即使有也是顺手牵羊，真正做“大生活”个人，侪是勒码头浪吃得开个“白相人”所为。迭眼人派别繁多，各有倚靠个黑势力撑腰，一般货主被盗之后只好自认倒霉吃亏。伊歇辰光，迭眼专吃码头盗窃饭个团伙有：
1.水老鼠：有人事先囥勒码头港湾内档，等到货轮停泊装卸货物，先是船浪同伙拿货物抛到水里去，再接手拿货移到远个地方装小船带走。
2.外档黄牛：趁货轮吃水问题勿好停靠码头，只好停勒江面、让小驳轮缷货个辰光，拿货抛到外档水面、由同伙小船接应运脱。
3.杀猪猡：又叫“扦脚匠”，专门用尖个铁器拿货物个麻包戳破脱，使得里向个货物漏脱占有。
4.股党：迭是专门盗窃组织个名称，假使有13个人就称“十三股党”、36人称“卅六股党”，其中最有名气个是黄牛党，以专做“大票生活”出名个。
以上迭眼盗窃团伙各有势力范围，一般人无法入内，但有辰光为了共同利益、也会互相勾结合作，譬如“水老鼠”与“外档黄牛”，就少勿了要互相联络串通，再可以顺利得手。除此之外，再加上货轮浪有种水手、管理员咾啥，内外勾结、监守自盗也是常有个事体，所以，要确保货物勿拨窃盗是在是老难个。
客船浪个乘客，则要特别注意上下轮船，码头浪个小偷，尤其碰到场面乱、人轧个辰光，正是窃贼下手个好机会。常庄用个手法也有以下几种：
1.“拖墙壁”，趁人勿注意顺手牵羊，有辰光几个人围牢仔势单力薄个乘客，实施抢夺。
2.“落地扒”，由同党几个人故意搭乘客发生口角纠缠，分散伊个注意力，再由旁边个同伙趁机盗窃。
3.“套棺材”，用空纸箱或空包套牢人家个物件，堂而皇之拿走。
除此之外，码头浪还是各种恶势力、诈骗犯盘踞个地方，也是伊拉生财之道个风水宝地，伊拉吃准来往乘客多数为外埠人，或者是行程匆匆个过路客，多数人又勿熟悉周边环境，所以大行敲诈勒索、诈骗钱财个勾当，甚至公然抢夺别人财物。因此，当年只要有人乘船出远门，屋里人或者周边个熟人，侪会得叮嘱，提醒侬外出尤其乘轮船远行，上下船个辰光千万勿要轻意搭陌生人搭讪，更加勿好拿随带行李物件委托勿认得个人去搬运，那怕对方再热情、甚至免费为侬搬，侪要拒绝，因为碰到图谋不轨个地痞流氓，轻者事后敲一笔不菲个搬运费、辛苦费，重者侬个行李物件就会“老母鸡变鸭”，就此不翼而飞唻。
作者：王建运
讲述：王邦基
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
