作者：张左之
沪语改写：知足常乐
讲述：王邦基
文字、语音审核：丁迪蒙
编辑：王乙其
1
搿是写天平路南段个第三篇。
搭北段告中段个、基本保留了几十年前头个原貌勿大相同，南段勒勒八十年代中期就拨划进了徐家汇商圈个发展范围，三十年来，搿只地块发生了翻天覆地个变化，从天平小区到天平宾馆，从巾帼园到衡山坊，从徐家汇公园到国贸汇，差勿多侪是新建筑；留下来个树德坊，伊个三分之一搭衡山邨一道拨改造成了衡山坊，成为了邪气少个拨保留下来个老建筑。
写了树德坊里居住个“树德堂”后人个故事，又写了树德坊里住过个其他名人贤士个上篇，挨下来写下篇，写个具体人物。有得辛一心、许国保、张玉泉告伊先生费康、赵志道搭仔朱孔阳。
辛一心
辛一心：1912-1957年，造船学家、教育家，中国造船工程学会个创建者之一，当代中国船舶设计搭仔科学研究机构个创始人，创建了中国第一座船模试验池。伊也是交通大学造船系个创始人之一，为中国个造船搭仔航运界培养了大批专业人才。伊对船舶流体力学搭结构力学侪有老深个造诣，为开创当代中国个船舶设计、科学研究搭仔教育事业作出了卓越个贡献。
1931年，辛一心勒江苏省立南京中学以第一名成绩毕业。江苏省教育厅保送伊进中央大学，伊自动放弃入学机会，决定报考当时辰光全国录取最严个国立交通大学电机专业。1934年，辛一心以名列前茅个成绩毕业。大学毕业之后，伊应聘担任上海公用局技士、襄理工程师兼播音组长。1936年，公费留学到英国纽卡斯尔杜伦大学皇家学院攻读造船工程，两年之后毕业，获得硕士学位。通过外交途径个争取，辛一心突破中英庚款公费留学期限勿超过三年个规定，获批延长十个号头。
勒英国学习个辰光，伊勒1938年转到英国格林威治皇家海军学院攻读造舰工程。期间，伊先后进行了《航空母舰个甲板烟漫》《16000吨重巡洋舰个设计》咾啥个课题研究，勒船舶科学研究方面做出了贡献。皇家海军学院力学教授海格博士勒伊自家个论文当中好几趟提到辛一心，还引用了伊个研究成果。
1940年，辛一心学成回国，28岁受聘为国立西北工学院正教授，两年之后，伊兼任搿个学院个机械系主任。伊学识广博精深，当时辰光系里其他教师开勿出个课程，伊统包。勒西工埃段辰光里，伊先后开过“应用力学”“材料力学”“弹性力学”“机械力学”“机动力学”“机械振动学”“兵工学”“造船学”“原动力厂”搭“原动力厂设计”等十门课。
1944年，辛一心到了重庆，历任招商局工程师兼工程课长、船务处副处长兼机器厂厂长、船务处处长，同时还担任交通大学造船系教授并代管系务。从埃个辰光起，辛一心开始了一面从事科技搭仔管理工作，一面勒大学讲课个生涯，直到去世，从来呒没中断过。
受聘招商局工作以后，伊负责组建改造了船舶修造厂电台，规划实施了招商局六大江轮个大修工程，包括全部重新绘制并建立船舶技术图纸、技术资料档案搭船籍证书咾啥。1944年搭1948年，辛一心分别当选为中国造船工程学会第三届理事搭第五届常务理事兼总干事，主持会务工作，创办了《中国造船》会刊。
1945年抗战胜利之后，辛一心回到上海，地方变、工作却呒没变，仍旧勒招商局搭交通大学任职。49年，伊选择留勒大陆，迎接新政权。49年之后，担任上海市军事管制委员会航运处修理打捞委员会主任委员。1950年6月，中央人民政府重工业部船舶工业局勒上海成立，伊历任设计处处长、技术处处长兼副总工程师，还担任船模试验所筹备处主任。1957年10月，作为一机部个代表，辛一心参加国务院组织个访英经济技术考察团，考察英国个造船工业搭科学技术，考察期间，伊拨发现生癌了，回国之后病情恶化，1957年12月16 日凌晨逝世，年仅45岁。
辛一心一家门勒1950年搬到树德坊居住，太太搭子女一直勒埃面生活，直到兴建衡山坊辰光树德坊部分动迁。
辛一心既学造船工程又学造舰工程，既有教学天赋又写仔交关著作，既做行政管理又好主导设计，是个勿可多得个复合型人才。伊个英年早逝是中国造船界个重大损失。
2012年8月，勒辛一心诞辰一百周年前夕，上海交大出版社出版了辛一心第二个儿子辛亨复写个《辛一心传——一个中国造船科学家个奋斗》，里向详细叙述了伊短暂而又老勿平凡个一生。
王选院士生前个秘书、后来是王选纪念陈列室主任、北大计算机科学技术研究所副研究员丛中笑，勒伊个《王选个世界》里向转述过王选认为对伊早年最有影响个四位亲眷，辛一心就是其中之一。王选讲，伊之所以会选择一个当时人家侪勿愿意学个冷门专业，就是受了伊表姐夫辛一心选择冷门专业、错位竞争个影响。勒介绍“中国核潜艇之父”黄旭华个文章里，伊提到辛一心是黄个恩师之一，黄从行政转做专业个辰光，勒船舶工业管理局跟牢仔辛一心从事船舶设计搭制造工作，正是辛一心传授拨勒黄旭华个三条造船规矩：“船勿好翻，勿好沉，要开得起来。”
作者：张左之
讲述：王邦基
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
