作者：柯兆银
沪语改写：边秦翌
讲述：高仁
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
突然，一阵熟悉个乐曲飘过来。伊拉抬头张，前头有密密麻麻一大群人，围成功只大圈子。陶叫“好听”，自家一家头加快脚步跑过去。周跟勒后头“侬走慢点，慢点呀。”
“噢，我忘记脱㑚了。”陶脚步放慢了点，但是马上又加快了。伊勒人群外头停下来，透过人个空档朝里向张，啥也看勿到。伊一面讲“对勿起”，一面侧身从人群个空档里用力朝里轧。一个老年男性，白衬衫，带根领带，立勒圈子当中唱《红梅赞》：
红岩上红梅开，千里冰霜脚下踩。三九严寒何所惧，一片丹心向阳开……
四周围个人勒一道唱，歌声像煞是奔腾个大海波涛，气势磅礴；也像煞是树浪向黄鹂个鸣叫，婉转动听。陶勿由得热血沸腾，情勿自禁个朝伊个歌唱者走过去，没想到踏了只空，一记头掼倒了，周围个人侪叫起来了，唱歌声搭音乐伴奏声马上停下来了。叶璐奔过来拿伊扶起来：“陶老师，要紧伐？”陶连连摇头，讲“覅紧”，伊掸掸裤子浪个灰尘，搭唱个人讲“对勿起！对勿起噢！请侬继续唱！”“没关系个。”歌唱者讲。
“我实在是欢喜搿只歌，年轻辰光一直唱个。”陶讲。“葛末，请侬搭我一道唱好伐？”歌唱者发出邀请。陶一呆，大家朝陶拼仔命拍手。陶讲“好个呀”， 就老大方个走到歌唱者旁边立好。人们热烈鼓掌，周搭叶也穷拍手了。音乐声又响起来了，陶依嘉搭伊位男个一道放声唱：红梅花儿开、朵朵放光彩，昂首怒放花万朵，香飘云天外。唤醒百花齐开放，高歌欢庆新春来、新春来……
陶依嘉放开声音唱，还有手势动作。伊唱得忘记脱了自家，忘记脱了周琴心母女，忘记脱了周围个人。等伊唱好，全场观众侪勒热烈鼓掌。陶看看周围，发觉有三四个人勒拉手风琴，还有人勒敲扬琴。
“侬是第一趟来伐？”男性歌唱者问伊。“第一趟来，我激动了，对勿起，打扰侬了。”陶勿好意思。“没关系，来此地就是寻找过去，寻寻开心个。”伊位唱歌个搭大家讲“各位朋友，阿拉邀请搿位女士为阿拉独唱一只好伐？” 全场侪叫“好，好个”。
“啊……”陶依嘉觉着邪气意外，有点勿晓得哪能。“覅紧个，来伐。”男性歌唱者鼓励伊。好几个人一道叫：来一只，来一只。
“好伐，我唱《草原之夜》！”陶用老大个声音回答。全场欢呼，周琴心一直勒叫好，叶璐拿手机拍视频。随牢仔音乐声响起，陶依嘉放开声音唱了：
美丽的夜色多沉静，草原上只留下我个琴声。想给远方的姑娘写封信，可惜没有邮递员来传情。等到千里冰雪消融，等到草原上送来春风……
陶唱个辰光，有对五十几岁个自发走上来伴舞。交关人拿手机拍照、拍视频，还有更加多人跟勒一道唱。陶唱好，全场再次响起热烈个掌声。
“搿位女士唱出感情了。”男性歌唱者搭大家讲。大家侪发出一片赞美声。
作者：柯兆银
讲述：高仁
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
