作者：柯兆银
沪语改写：边秦翌
讲述：郭健
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
关个手机响，伊拿起手机听，讲：“伊勒海。”拿手机摆下来讲“玲玲电话。”
“伊勿做好事体个。”顾极吼拉吼个讲“姆妈，侬再考虑考虑，迭个房子我反正是要住个。姆妈，侬搿把年纪了，还好活几年呢？为啥硬劲抱牢房子、票子勿肯放呢？将来毕竟要靠阿拉个，就勿为自家留条后路啊？”
“我再重复一遍，房子勿借个，钞票我也呒没个。”关讲。
顾老失望个看关，又看看窗外头“好，雨停了，我走了。”伊气鼓鼓个立起来往外头走，走仔两步想起来包忘记脱拿了，又转回来拿包，气呼呼个朝关美娟白了一眼，旁若无人个走出房间。
“人老了，侪来欺负了。”关老生气个“好好叫个家庭要拆散，要抢我房子，还要借钞票。勒子女眼睛里，父母个一切侪是伊拉个，而子女个一切侪是伊拉自家个。”
陶平常辰光看到关总归是笑嘻嘻个，今朝第一趟看到伊生气。难怪，儿子忒勿像腔了。“男人有了婚外恋，就会得勿顾一切个。”宋讲。陶刚想讲点啥，就看到关突然捂牢仔面孔哭起来了，哭得邪气伤心。陶一时头浪勿晓得讲点啥好，宋也呆脱了。关哭了一歇停下来，到卫生间揩了把面出来，呆呆叫躺勒床浪向想心事。
陶看看窗门外头，天色老亮，雷阵雨停了。伊穿好运动鞋，轻轻叫走出房间，乘电梯下去散步。伊走回来，电梯到 3楼走出来，就听到关个朗朗笑声了。陶一呆，看到关已经勒槎麻将了。陶走进走廊，看到黄老太搭伊先生老张互相紧紧个搀勒海，路走得邪气个慢。
“哪能啦？”陶有点惊讶。“就是没力气。”黄老太有气无力个讲：“睏仔好几天，撑起来走两步。”“听说侬到医院去了，医生哪能讲啊？”陶问。“诊断结果还可以。”老张讲。“噢，要保重噢。”陶笑咪咪个讲。“谢谢陶老师。”黄老太讲。
伊拉走进307室，陶跟进去。方老太个小囡儿从卫生间出来，对立勒方老太床边个头个中年妇女讲：“阿姐，水放好了。”“我要汏浴，汏浴适意。”方老太搭陶讲。
“阿拉今朝约仔一道来，就是来搭侬汏浴呀。”大囡儿小咪咪个搭方老太讲。“噢，晓得了。”方老太笑了。
迭个辰光，方老太个大囡儿拿了只葱油饼拨勒朱老太：“呶，我搭侬带来了。”
“哎呀，我是讲讲白相相个呀，还真个买来了。谢谢侬噢。钞票拨侬。”朱老太讲。
“覅得个，送拨侬吃。”大囡儿讲。“噢，噢，谢谢侬哦。”朱老太讲。
两囡儿搀方老太进卫生间。“方老太福气好。”陶讲。“我没人管呀，我有洁癖个，搿歇身浪个味道自家也觉着难闻，告咾黄红梅嫌比。”朱老太老伤心个，“侬闻闻看，难闻伐？”“还可以呀。”陶屏牢仔呼吸，伊身浪个味道真个邪气难闻。
作者：柯兆银
讲述：郭健
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
