作者：柯兆银
沪语改写：边秦翌
讲述：仇蔚菁
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
“㑚来吃西瓜呀。”黄红梅勒吃饭台子浪拿西瓜切成功好几片，拿了其中一块大个就一大口一大口吃起来了。
“陶老师，宋老师，来来，吃西瓜。”关招呼道。“我就勿吃了。”陶讲。
“我下半日再吃伐，刚刚吃了中饭，吃勿落了。”宋讲。
“黄红梅，我带回来个鸡、鱼搭肉，麻烦侬热一热，拨关老师搭宋老师吃，侬搭李莉也留一份。”陶对黄讲。黄呆脱仔一歇，看牢陶没回答。
陶看伊个表情有点古怪，又重复了一遍。“我吃光了。”黄理所当然个讲。“吃光啦？”陶邪气惊讶。“忒香唻，我就熬勿牢吃光了，真好吃，我从来也没吃过介好吃个物事。”黄红梅开心得笑了。
陶依嘉走过去拿冰箱门开开，打包盒子真个侪没了。伊个面孔沉下来了，“侬哪能可以自说自话吃我个物事啊？”
“侪是剩菜呀，有啥了勿起。”黄勿以为然。“黄红梅，没经过我同意，侬哪能可以吃我个物事呢？”陶严肃个讲。“啥？吃了侬个物事？”焦丽英齐巧路过，就走进来了。黄面色尴尬，神情紧张。
“哦，昨日仔小姊妹请我吃饭店，我带转来一些菜，黄红梅没经过我同意，就全部吃光了。”陶毫勿客气个讲。伊想，我再也勿会为忘恩负义个黄打掩护。再讲，反正我也要离开了，用勿着担心伊报复了。
“陶老师讲得对伐？”焦丽英质问黄，伊低头勿响。
“黄红梅搭陶老师熟悉了，关系好，像自家人了。”关婉转个为黄讲情。宋看看黄，没讲闲话。“国庆节发奖金，扣脱200块。”焦白了黄一眼，用手节头点点伊，讲好就急匆匆走了。
“乃末侬开心了伐？”黄气呼呼讲。“咎由自取。”陶勿客气个讲。“啥叫咎由自取？”黄反问。“就是苦头是侬自家寻个。”陶依嘉冷笑。
“前楼卖了多少钞票啊？”阿霖老严肃个问。“马马虎虎伐。”阿明勿作正面回答。
“啥叫马马虎虎啊，到底卖了多少钞票啦？”阿珍盯牢仔勿放。“150万。”阿明无奈个讲。
“侬要拨阿拉有机会赚100万，阿明已经赚了150万，超过50%。”阿珍拿手里个葡萄“啪”厾进果盆里，对阿霖冷笑，“侬还好让阿拉赚100万伐？”
申江涛看勒海阿明，面色邪气惊讶、而且勿开心。
“啊，150万啊？”梅凤妹生气个看勒海阿霖讲“没想到，前楼已经卖脱了呀。”
“迭桩事体姆妈是晓得个。”季芳芳含含糊糊讲，拨人个感觉是卖房子娘同意个，甚至是娘安排个。
阿霖个笑容消失了，伊点起香烟狠狠叫吃勒一口，脑子勒勒急速个飞转。阿明结婚用房是姆妈拨个，已经搨到大便宜了，搿歇居然老宅个前楼也独吞了。让人更加气愤个是，阿明拉得了好处，还寻借口赶娘出去。我刚刚还反对姆妈住到周老师个屋里去，错了，应该支持姆妈去，就让阿明啦难堪，就要让伊拉见勿得人。阿珍一直讲芳芳坏，看来阿珍是有眼光个。但是，我已经表态了呀，哪能调头呢？还有，重要个是，勿好让阿明拉独吞老宅，搿应该侪是遗产啊！
“大阿哥，阿拉吃亏就认输伐。阿拉斗勿过人家个，就甘拜下风伐。”阿珍阴阳怪气个挑拨。
“阿明啊，老宅个户主变成功侬个名字，是侬搭姆妈提出来个伐？侬承诺了啥呢？譬如为伊养老咾啥。另外，是姆妈同意了侬再卖房子个，还是侬卖脱了房子之后再告诉姆妈个？”阿霖恢复了平静，笃悠悠个盯牢仔阿明问。
作者：柯兆银
讲述：仇蔚菁
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
