作者：柯兆银
沪语改写：边秦翌
讲述：黄燕琼
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
“我想回屋里，回自家个屋里。”陶个眼神暗下来了“但是，我只有后楼一小间，一个人住勿来三。呒没屋里就没做人个感觉了，像煞是乘条小船飘勒海里，看勿到岸，没一丝灯光，勿晓得船会得飘到阿里，也勿晓得啥辰光会得沉没；又好像是部飞机勒天空浪，呒没机场好降落，机油用光就只好落下来，走向死亡。”
“侬忒相信阿明，拿老房子过户拨伊，伊迓迓叫拿前楼卖脱，真上勿应该个。”周讲伊。“侪是伊个女人忒坏。唉，其实也勿好侪怪芳芳，主要责任阿明要承担个，伊没脑子个啊？”陶讲，“我现在身体还可以，困难、麻烦还好克服，将来自理能力没了，乃末真个是人生个末日了。”
“依嘉，我有个要求，想请侬帮忙。”周看看囡儿，叶璐拨了伊只鼓励个眼神。
“啥事体啊？侬讲呀。”陶依嘉老干脆个讲。“侬住到我屋里来，阿拉结伴养老可以伐？”周问。陶一呆，看牢周，又看看叶璐。“我讲个是真心闲话。”周认真个讲。
“侬再讲一遍！”陶显然勿敢相信。“我希望侬搬到我屋里来，阿拉抱团养老。”周讲“搿能，我个生活也就更加充实了。”
“我也欢迎陶老师来。我是陶老师看勒海长大个，侬一直关心我，像我姆妈一样个。”叶璐讲。“琴心，侬考虑成熟了伐？搿勿是一日两日呀。”陶对周讲，语调里有感激搭仔期盼。
“军中无戏言。”周认真个讲，“阿拉屋里三室一厅，先生走脱之后，我搭叶璐两个人住，一间一直空勒海。侬来，阿拉一人住一间。”“陶老师搭姆妈住朝南个，我住朝北个。”叶璐讲。
陶依嘉感动得出眼泪了，伊立起来，张开臂把要搭周拥抱，周快点立起来，两个人抱勒一道，叶璐快点用手机拍照。
“阿拉娘两家头讨论好几趟了，预估了可能出现个各种问题。我个看法是，既然阿拉是交往超过半世纪个好朋友，侬勿想住养老院，阿拉屋里还有空房子，为啥勿好住勒一道呢？既然是好朋友，我帮侬勿但是应该个，也是我邪气愿意个。而且也是帮我呀，侬来了，我个生活就更加丰富多彩了。”周讲。“侬来，我也多个老师，多了个道伴。”叶璐讲。
“阿明伊拉勿会同意个，伊拉要面子，即使勿想为我养老，也勿愿意让人家讲闲话。”陶摇摇头，有眼担心。
“伊拉勿愿意接侬回去，就没资格讲啥。侬覅管伊拉，要听自家内心个想法。”周讲，“侬只要通知伊拉一声就可以了，勿是请示，是通知；勿是审批，是备案。”
“阿明搭叶璐有过段历史，我常怕芳芳会作梗。”陶讲。“伊还有资格讲啥？”周冷笑，勿客气个讲，“侬老底子勿肯嫁拨吕老师，因为怕人家讲闲话，因为要照顾子女，结果拿自家个最重要个人生幸福牺牲脱了，侬还想搿能做啊？”陶触动了，呆呆叫个看勒海周。
“侬愿意勒昏涂声里翻来翻去啊？侬愿意一直蹲勒养老院啊？”周问伊。
作者：柯兆银
讲述：黄燕琼
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
