作者：柯兆银
沪语改写：边秦翌
讲述：高仁
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
有人邀请陶“再来一只”，四周人侪齐声叫“好”。
“我迭位小姊妹住勒养老院，今朝出来散散心，谢谢㑚拨伊迭个机会，下趟来了再唱噢。”周琴心走上去搭大家讲。“没关系个，我要唱嘛。”陶坚持。
周搀勒陶个手朝外头走：“勿好忒吃力，勿好忒激动，休息休息。”“陶老师，下趟再带侬出来，有的是机会。”叶璐讲。男性歌唱者搭陶讲“葛就下趟再来唱伐。”“也好。谢谢侬噢。”陶讲。
陶跟牢仔周琴心母女往外头走，好勿容易轧出密密麻麻个人群。“哎呀，真个老开心个！” 陶邪气兴奋。“依嘉，侬唱得真个勿错。”周琴心讲，“老底子单位演出，侬也上台合唱过，必过，侬最拿手个是诗朗诵。”“侪是过去个事体了。”陶讲。
“陶老师，侬身浪湿脱了，侪是汗呀。”叶璐笑了。“没关系，一歇歇就干了。”陶迎牢仔吹过来个一阵风，老开心个讲：“风凉啊，真适意啊。”“当心伤风。”周琴心提醒伊。
陶朝四周望望，看到另外还有交关人围成两只唱歌个圈子，伊老激动个“阿拉去看看看呶。”“侬歇脱一歇伐。”周琴心讲。
陶勿顾一切走过去，一只圈子勒唱《洪湖水浪打浪》，另外一只勒唱《在那桃花盛开个地方》，里里外外立勒交关人，每个人侪勒投入个唱；有个老人坐勒轮椅浪唱，有个人拿仔歌词唱，有人摇头晃脑个哼。陶又要想轧进去，周豪扫拦牢伊：“阿拉还是寻个地方去坐坐伐。”“好个，勿唱了，我就听听。”陶依嘉讲。
叶璐看到围牢树有圈椅子，齐巧有几个人立起来，就马上奔过去，再招手：“陶老师，来来来。”陶搭周走过去坐下来，陶侧耳倾听，跟牢仔节拍哼。最后，伊还是坐勿牢了，立起来，讲“我去看看看。”就朝人群走过去了。“伊真个欢喜老歌。”叶璐讲。
“伊是怀念老底子个青春时代。”周琴心讲，“勒养老院里关得辰光忒长了。”
陶立勒人群个外围，踮起脚尖往里向看：有个中年妇女勒唱，有个老年妇女拿仔指挥棒勒指挥。有个吹萨克斯管伴奏，有个拉小提琴。《洪湖水浪打浪》《弹起我心爱个土琵琶》《北国之春》《真个好想侬》《年轻个朋友来相会》，一只接牢仔一只，全场人侪勒放声唱，陶依嘉也老兴奋个跟勒海唱。
周琴心走过来，扳牢陶个肩胛讲：“辰光勿早了，阿拉到附近去走走伐，还要吃中饭唻。”陶邪气舍勿得个离开人群，跟勒周琴心母女走到旁边个世界文豪广场。眼门前出现了文学家搭诗人个雕像：托尔斯泰、普希金、狄更斯、歌德、巴尔扎克、莎士比亚、但丁、高尔基等等，有个坐有个立，雕像个背后头是一片繁茂个梧桐树。
“搿些大文豪个作品，年轻辰光侪读过，勒伊拉个作品里，我看到了一个个精彩迷人个世界，文学作品真个是独具魅力。”陶邪气感慨“勒养老院，我有忒多个辰光，准备重读名著，读得邪气慢，可惜眼睛勿来三了。”
作者：柯兆银
讲述：高仁
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
