作者：何菲
沪语改写、讲述：知足常乐
文字、语音审核：丁迪蒙
编辑：王乙其
往期回顾：
勒老多人个感觉里，汤太斯文，男人是勿大欢喜吃汤个，埃个完全是错觉。宋朝男人吃酒前头往往先吃汤，《水浒传》里宋江告李逵、戴宗豪吃老酒之前，先要吃辣鱼汤；柴进请林冲吃酒，三巡过后，坐下来叫：且将汤来吃。
现实生活当中也有蛮多领域个人勒勒聚餐前，一人先吃一碗实料充足个汤，然后再开始吃酒。
勒韩国，小兄弟之间聚会常庄是勒小馆子吃酒，吃到面孔通红，直接倒了炕浪困觉了，酒醒之后吃一碗醒酒汤配米饭，酸酸辣辣热气腾腾吃下去，既温馨随性又充满仪式感，细胞拨激活，刚刚个醉就好像从来呒没发生过一样。
韩国主妇勿仅擅长大酱汤、豆芽汤、参鸡、牛肉辣汤咾啥个家常汤，有辰光冰箱里食材个边角料太嘈杂繁多，伊拉还会得做一种名称铿锵个“部队汤”，相当于勒海打扫冰箱了。
韩国醒酒汤当中，河豚汤是首屈一指个。河豚汤因为贵，是韩国男人发薪水埃日天再好享用个美食。蚝汤细腻曼妙,补充体液最有效，尤其适宜勒情事之后享用。勒上海我也吃过几趟醒酒汤，不过一方水土养一方汤，离开了故乡，醒酒汤也就勿是埃个味道了。
部队汤有一个勿平凡个来历，伊反映了韩国从落后到发展个历程。“部队汤”是韩餐里最朴实个家常菜。几节香肠、两片午餐肉、一眼杂菜、方便面或者年糕告泡菜咾啥一道炖，相当于大杂烩，味道平实，营养丰富。
几十年前头，“部队汤”还属于韩国人某种心酸个记忆，因为当时采用个香肠、午餐肉咾啥侪是驻韩美军厾脱个过期食品，是“二战”以后艰困个朝鲜半岛南部军民饥不择食个产物，到了21世纪，韩国民众已经自信个拿伊看做是自家个特色美食。勒外国人最欢喜个韩餐排名当中，部队汤也名列前茅。
日本普通家庭个一日天是从一碗味增汤开始个。一碗加了各种海藻、蔬菜、豆制品、肉蛋鱼碎个味噌汤、一碗白米饭，再配一碟腌过个小菜，就是日本人心里向顶家居顶杀腻个早饭。日本家庭主妇觉着，每个家庭成员早浪向板定要吃得饱饱个，再好出门去上班去读书。
《失乐园》里，久木最欢喜水芹香鸭汤，凛子为伊用砂锅小火慢慢叫炖，伊搭仔伊个汤，拿久木个魂领头也勾老唻。搭凛子一样，伊个汤风致楚楚，清丽、收敛、涌动、奔突，有一种正经当中个荷尔蒙感。饮鸩殉情之前，两介头吃个最后一顿，也是水芹香鸭汤，隔勒一只台子，文雅细致个吃完，同奔沉沦，铭心刻骨。禁忌之爱个终极表达是一种宿命，必须付出超越常规个代价。伊执着于五蕴，同时又跳脱出五蕴，抓老对纯爱个执着，而勿是抓老爱，使得平凡个肉身触摸到极致个情告空……而汤勒搿之间就是勿动声色个载体告激素了伐。
单身八年个小姊妹Y小姐最近再婚了。一年前伊勒高铁浪认得现任先生。伊坐勒伊隔壁，举止斯文，衣着得体，上车辰光却拎仔一只老大个玻璃桶，装满了老家自制个大酱。因为搿桶酱，两介头攀谈起来。从东北大酱，讲到“不得其酱不食”个孔子，讲到萧红《呼兰河传》里写到个酱缸，伊拉感慨乡愁是一种有味道呒没颜色个记忆。
两介头从共同欢喜个大酱汤开始，像挖宝恁个开掘出交关彼此侪欢喜个味道。埃个是一种邪气强烈个共振。伊拉两介头还共同爱好清香型汾酒，伊拉侪深深个认同清朝美食家袁枚讲个“既吃烧酒，以狠为佳。汾酒乃烧酒个至狠者。”
八个钟头个高铁车程，两介头从素昧平生到相见恨晚，下车辰光就有了依依缱绻个情绪。也许略萨讲得对：“味道搭爱一样，是交关私人化个，虽然伊拉拨大家津津乐道，但侬老难对伊拉有准确描述。简而言之，味道搭爱一样，最好是去体验，而勿是拨描述。”
三日之后，两介头相约到城西个朝鲜馆子去吃大酱汤，又过了三日，伊带仔大酱桶搭汾酒登门献艺……搿是两只东北胃个共振。酱是红娘，汤像降头。
高铁浪因大酱而结缘个搿对中年男女勒相处一年多之后，终于相约领证。搿个辰光Y小姐47岁，男人52岁，侪到了好感受“闲时与你立黄昏，灶前笑问粥可温”恬静美好个年龄，也有一种活明白了个高能量搭仔配得感。两个足够强大个人，产生个是爱情，同时也超越了爱情。乃末伊拉勒勒浮动不安个世界里，寻着了安稳。
作者：何菲
讲述：知足常乐
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
