作者：何菲
沪语改写、讲述：知足常乐
文字、语音审核：丁迪蒙
编辑：王乙其
黄梅天，适合吃汤，熏香脱仔放飞思绪。
勿管勒啥地方，汤侪是一种叫人有搭家庭归属感个食物。
南方人侪是汤迷，还有一套博大精深个汤学。
江南人欢喜吃鸡汤、鸭汤、腌笃鲜、鱼头汤，勒迭个基础浪，上海本地人还欢喜三鲜砂锅；南京人欢喜吃鸭血汤，后来镇江人勒勒鸭血汤里向加一眼线粉，勿知勿觉，鸭血粉丝汤就变成了南京个顶流小吃；苏州人呢，伊拉来得个欢喜鲃肺汤。
前抢把，宁波镇海老家个钱兄弄着一条老老大个野生大黄鱼，带仔迭条活宝伊马上出发，经过连绵个山，隧道，河姆渡遗址告杭州湾大桥下头波涛滚滚个东海，夜快头我下班个辰光，已经好到伊上海会所吃迭只透骨鲜美个咸菜大汤黄鱼了。钱兄搭我盛了一碗又一碗，伊讲“多吃点，介大个黄鱼，老家个黄鱼，鲜啊。”
1949年12月，蒋介石撤到中国台湾。后首来年纪越来越大，思乡情结也越来越浓。他最欢喜吃个菜，是故乡个咸菜黄鱼；最欢喜个汤，是故乡宁波个扁尖炖鸡汤。搿个侪勿是四物汤、骨肉汤、台南牛肉汤咾啥个台湾汤品好替代个。
基因，是老玄妙个物事，年龄越往上越明显。假使用十分钟做只快手汤，祖籍宁波个我，肯定是做紫菜开洋虾皮汤，嘴巴里好像已经有了眼海洋个鲜味道了。假使有廿分钟，葛末就好烧一只贝类汤了。青口、蛤蜊、姜搭一茶杯清酒，焖脱一歇，撒一把葱花，原料交关简单，也买得着，样子呢稀疏平常，味道却是鲜得来落眉毛。
作为第五味觉，“鲜”其实老难描述搭定义个，东亚人对鲜味道个感知能力顶强，埃个是儒家文化圈特有个审美，西方人就老少有搿种感知力了。
粤港澳人对老火靓汤个鉴赏鞭辟入里，天下世界恐怕呒没人好搭伊拉比。
伊拉煲汤，食材搭配恣意汪洋，烹调手法严谨考究，充满创意又蕴含格律，力求清鲜淡美。
关于粤港澳地区个老火汤是勿是好吃，搿倒是见仁见智，不过至少大家侪承认，老火汤属于治愈系，有深刻个食疗调养搭仔社会人伦功能。
五陵南面个广州，是顺珠江岸线、水系变迁发展而来个，岭南湿热，为了避免受湿热瘴疠个苦，岭南人就地取材，用煲汤药膳来清热祛湿，“宁可食无肉，不可餐无汤”，是广府个名谚。
男士假使呒没应酬，常庄勒下班前头打只电话拨太太，用一句“今晚饮乜汤呀”来代替情话，老人呢常庄交代子女“周末返来饮汤啊”，搿里就有眼“常回家看看”个意思。每日天下半日四点钟左右，各家人家个厨房侪慢慢叫有了动静，一锅私房汤个打造开始了。此地既包含老火汤，又有以五谷菜蔬搭配海鲜肉类，好勒比较短个辰光里烧出来个滚汤，也有甜品糖水。馥郁旖旎个汤味道混合了万家灯火，悬浮勒勒珠江个半空当中，成为广府之间相认个密码。
老火汤意味着家庭个归属与呵护。煲三炖四，就是讲煲汤三个钟头，炖汤四个钟头，勿是屋里人，啥地方来介好个耐性啊。
好朋友之间常庄混勒一道吃酒、饮茶、打球甚至把妹，不过吃汤却只是勒勒私人领域搭自家人分享个仪式。
粤港澳人个精明搭慎重渗透到生活中个点点滴滴，比方饮食，比方穿着，比方生意搭交际，还比方婚姻。女人是勿是美女并勿讲究，有勿有才华更加勿会考核，但是会得煲一手靓汤绝对是核心技术。当地女小囡出嫁之前，姆妈会得偷偷叫塞拨伊一份家传煲汤个配方秘笈，作为嫁妆个一部分，绝对称得上非物质文化财产。据说讲是阿二（就是小老婆或者外室）为了争取男人个欢心，索求更多个爱意，煲一手好汤水，始终来抓牢男人个心搭胃，著名个“阿二靓汤”就是迭能得名个。搿个1994年创立到现在30年个汤馆，是广州人个集体记忆。心搭胃个距离，其实邪气近。
不过，广东中学生尿酸高个蛮多，吃汤个习俗功不可没。
河南人一般勿拿自己看做北方人，而是中原人。勒开封，名号里最掼得响个是糊辣汤，摆个是黑胡椒颗粒，邪气浓郁邪气有劲，一碗一碗吃得停也停勿下来。
洛阳个老汤客欢喜吃驴肉汤、杂碎汤咾啥。
不过到北京，到河北，到新疆，本地小店里侪是酸辣汤、疙瘩汤、西红柿鸡蛋汤个天下了，考究点个就是牛羊肉汤。
山西有一种邪气滋腻个汤，名字叫：头脑。“头脑”又叫八珍汤，是山西特有个清真靓汤，由肥羊肉、藕、山药、煨面炖成汤糊个样子，佐料加黄酒、黄芪搭酒糟咾啥，北方干冷，“头脑”温热，只是味道讲勿出，比老北京个豆汁还要一言难尽。
东北人吃汤，勿像粤港澳人，只吃汤。我勒东北吃个排骨汤，里向四分之三是排骨，四分之一再是汤。排骨勿是汤渣渣，而是滋补个物事，吃汤个主要目的变成功吃排骨了。东北人还欢喜牛肉炖萝卜，其实也是干货超级多个牛肉萝卜汤，搿是东北八大炖之一，东北人个养生圣品。
作者：何菲
讲述：知足常乐
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
