作者：褚半农
沪语改写：朱枫
讲述：顾卫芳
文字、语音审核：丁迪蒙
编辑：王乙其
上海某大学专门研究方言个研究生Z君发来微信，问我顾戴路个“戴”字，勒上海方言里应该读“d哎”还是读“da”？搿原本勿是个问题，而现在却成为问题了。
顾戴路，原来是上海西南乡下头个一条勿常拨人提起个小马路。随牢仔1990年代马路拓宽，房地产业个升温，马路两旁边建造了大量个商品房，一个新名词常庄拨市民提起——顾戴路板块。就勒大家赶过去购房置业同时，有人开始拿“顾戴（d哎）路”读成功“顾戴（da）路”了。我听到之后第一个感觉是老勿习惯个。
勒普通话里，“戴”可作名词或者动词，侪读“dài”。勒上海话里，“戴”也可以作名词或者动词，但有得两读，勒作姓氏(名词)用个辰光，应读“d哎”；勒作动词用个辰光，应读“da”，像“戴帽子”。
1956年修个顾戴路，西起七宝、莘庄交界处个顾司徒庙（原来个庙址勒现在七莘路庙桥港河北富丽公寓东区内），东面到梅陇镇个戴家祠堂（或称戴家塘），是由东西两只地名个头一个字组合而成个路名。路名当中个“戴”，是姓氏、是名词，理应读“d哎”。顾司徒庙搭戴家祠堂因为同属于“四旧”，老里八早就拨拆得精打光了，但是，“戴”勒此地作为名词个性质是勿会“拆脱”个，况且，祠堂所在地个戴家塘、老长一段辰光里一直立勒路个着着东面。
自从有了搿条路之后，社会浪也从来侪是只读“顾戴（d哎）路”而勿读“顾戴（da）路”个。十几年前出现个后一种读法，拨人有忒随意个感觉，而且大有代替前一种读音个趋势。有趣个是，读成“顾戴（da）路”个人里向、有勿少是高学历、有事业个成功人士。受迭个影响，当地个一些年轻人也置名词而勿顾，开始跟勒后头读成“顾戴（da）路”了。而当地原住民里，包括年过花甲、古稀个老爷叔、老阿姨，伊拉当中还有勿少是文盲唻，却是规规矩矩个到现在仍旧读着“顾戴(d哎)路”。
搭普通话一样，上海闲话里一字多读（有个是文白异读）个现象也邪气多，对搿些字，虽然呒没《普通话异读词汇编》之类个正音书来正音，但也应当遵守一般规则。勿可理解个是，伊个一些读“顾戴（da）路”个，勒碰着“戴望舒”“戴高乐”搿些人名辰光，仍旧拿“戴”读成（d哎）。既然搿能介，拿一只读音正确个字来个异读、又有啥个理由搭必要呢？
2014年起，为了顺应保护方言个潮流，开过伊面并设有“顾戴路”车站个公交车侪新增了上海闲话报站内容，其中“顾戴（d哎）路”已经全部拨读成“顾戴（da）路”了。公交车报站因发音次数多、受众面广量大，产生个影响是邪气大个，伊必定会让读“顾戴（da）路”个人越来越多。按照迭个趋势，“戴（da）”个迭只读音是勿是因再也无法纠正而成为上海闲话新个“规范”读音、或者又一个“两读”了？
但马上又有一个新问题，“戴”做姓氏辰光应该读啥个音？按照“顾戴（da）路”现在个读音，“戴”姓自然也要读成“da”。葛末，“戴安澜”、“戴季陶”个“戴”字也侪要读成功“da”了？上海有个大画家戴敦邦，是否也要称呼伊为“da敦邦”了？还有外国人“戴高乐”、“戴安娜”搿类名字里个“戴”字，也侪要读成“da”了？是勿是有点怪啊。不过，我已经听到有人搿能读了。搿种人为改变语音个现象，作为上海方言研究者，我有必要勒此地记录下来、以方便后人查阅。
讲述：顾卫芳
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
