作者：王国杰
讲述：叶雁
文字、语音审核：丁迪蒙
编辑：王乙其
老底子一幢石库门房子里向要蹲十几份人家，邻舍隔壁之间门对门，窗对窗，连隔壁人家放只屁也听得到个，根本谈勿上有啥个隐私。现在想想，当初迭种日脚勿晓得哪能介过来个。
或许有人要讲了，人家赚多少钞票侬晓得勿啦？葛末，侬到石库门里想去兜一圈就晓得了。
石库门个房间分三六九等，一等是前楼、厢房间。二等是客堂间，亭子间。三等是灶披间、楼梯间。住灶披间、楼梯间个，大多数勿是小皮匠，就是老裁缝。住亭子间个，侪是一眼小职员、小报记者、舞女。住前楼、厢房间个，照排头是高级职员或者老板。要是灶披间搭厢房间别苗头，厢房间要拿灶披间掼出好几条横马路了。好比两个赤膊大仙，一个脱开来身浪八块腹肌，弹眼落睛，一个脱开来廿四根肋排骨好弹琵琶个。迭个就叫“棉花店死脱老板，勿弹（谈）了。”
一到年夜头，厢房间窗槛浪挂出来个年货是火腿，咸肉、鳗鲞。亭子间挂出来个年货是一条咸鲞鱼、两串无锡油面筋。到厢房间拜年个客人侪是西装笔笔挺，皮鞋贼贼亮，到亭子间拜年个客人侪是一身藏青棉袄，脚浪向蚌壳棉鞋。侬要是想拿家底瞒瞒囥囥，葛末真个叫做睏扁头了。
有一趟，隔壁阿根鬼触臂把搭我讲：“昨日子半夜里，楼浪新娘子起来拆尿拆勒好几趟，我侪听勒清清爽爽，扎劲伐？”我搭伊讲：“下作坯，拨伊拉晓得，当心吃耳光噢！昨日侬拨㑚家主婆骂脱一顿，当我呒没听到啊？”阿根一听，滑脚溜脱了。搿种噱头噱脑个事体勒了石库门里向呒啥希奇，听过算数。
每日早上向，对面厢房间个老女人一早起来打哈欠、上马桶、着衣裳、汏面孔梳头发，搨嘴唇膏，画眉毛，统统像放老电影，看得侬背得出挨下来是啥个动作个。
有一趟，对过阿七头搭我讲：“隔壁孙阿姨个老公上班去了，刚刚我看到伊拉屋里迓进去一个陌生男人，孙阿姨马上拿窗帘拉起来了，勿相信个闲话侬到窗口头看喏！”我只当伊瞎三话四，过脱仔几日天，突然之间听到孙阿姨夫妻两家头打相打个声音，我跑到窗门前头张，孙阿姨拨伊个男人骑勒身浪穷打屁股，一边打一边骂，弄得整幢房子个人，耳朵侪竖起来了！真弄勿懂孙阿姨个男人哪能会得消息介灵通，阿会得是阿七头豁个翎子啊？
石库门里，关系好个，对牢仔对过窗口头喊一声：“王夹里，三缺一，勿来伤阴结个！”对过个窗口马上会得应一声：“来了，来了，让我上好马桶。”关系勿好个，白眼对白眼，掼矮凳，骂山门，恶势做。有一日，阿三搭我讲：“亭子间迭个白骨精顶顶凶，天天勒我个门口头生煤球炉，弄得我房间里烟雾腾腾，侬看我哪能介白相伊！”过脱一歇，就听见白骨精勒房间门口骂山门了：“阿三，侬只赤佬模子，哪能拿阿拉个煤球炉浇洇脱了?＂我推开房门一看，正好看见阿三对牢迭个女人轻轻叫个讲了句闲话，白骨精马上就缩回去了。我估计阿三肯定揭了伊个伤疤，不过还是拨伊留了眼面子。
顶顶触气个是喊传呼电话个阿姨，跑到天井里向拔直仔胡咙哇啦哇啦叫：“亭子间小陆，有个姓李个男朋友叫侬夜里向七点钟勒勒大光明电影院门口等，勿见勿散噢！”哈哈，昨日仔大家还看到后弄堂小张来约小陆出去白相，今朝哪能又出来个小李？乃末刮三唻!
石库门日脚哪能过？再勿好过，也要过个呀！
讲述：叶雁
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
