来源：新民晚报
作者：金乐敏
沪语改写：边秦翌
讲述：王邦基
文字、语音审核：丁迪蒙
编辑：王乙其
兆银兄告知我，伊开始写长篇小说《我去养老院了》，搿是3年之前个事体。一年前个暑假，伊发来搿部小说个初稿，再三关照，“好好叫帮我把把关”。
开卷尝鲜，邪气快，我就拨“初稿”拖进小说设置个情感旋涡。一记头，居然忘记脱需要“把关”搿桩事体了。伊个辰光我就开始猜测，搿部小说是勿是国内第一部涉猎养老院题材个长篇呢？对老年迭个特殊年龄段个情感浓缩，对养老院独特生活圈个沉浸式透析，搿能介个小说，会得溅起哪能介个社会涟漪呢？
今年9月份，上海文化出版社勒官方微信公众号以“新书推荐”个方式，颁发了搿部长篇小说个出生证明。作为多年个老朋友，我晓得，兆银兄有得三十多年个新闻从业经历。伊是个写作极其严谨个人；伊个笔端欢喜聚焦人物特写搭仔史料溯源；伊个作品主要侧重写实。必过，《我去养老院了》，却是兆银兄近年来最大个一次“虚构”。
阿拉侪晓得，虚构是小说个本质。“捕捉人物生活个感觉经验”，是小说竭力要挖掘个艺术内容，其感觉经验越是新鲜、细微、独特、准确、深刻，就越是小说化。
兆银兄一直以来以文史真实性见长，搿趟要完成35万字体量个“虚构”，有句闲话必须讲个，搿是伊写作史浪个一趟突破。作兴，就是因为作者秉持勒以真实性写作为根基个惯性，搿也注定了搿部“虚构”小说烙印在兆银兄作品个一大特色：就是逼真：小说故事，人物性格，对话语言，侪是现实生活个“活灵活现”。
“为了写搿部作品，我有过到养老院去邪气深入个采访搭仔体验。”有趟伊搭我通电话，用邪气真切个语气、语调讲。我再晓得，小说里个一号人物——陶依嘉，搭两位室友个故事以及三个老人搭子女个矛盾冲突，侪有作者自家个亲人、朋友、邻居、朋友家属个影子。围绕“陶依嘉”展开个故事，是所有搿些影子个合成。
尽管从文字架构来看，35万字足以算得上“长篇”了。但从故事个开合搭人物个数量来看，小说紧凑得更像是部中篇。伊展现个，勿是一整棵树，而是从一棵树浪，锯出来个一长段横截面。
书名《我去养老院了》，“去”是个动态词。作者攫取陶依嘉个“去”搭仔去了之后个“住”作为横截面，演绎个是老年人个生存状态，凸显个是人生暮年个无奈搭仔悲哀，勒情节个交错当中，也展示了人性个善良搭仔包容。小说个弹性，涉及了老年人已经有或者可能有个话题。搿就是作品个“张力”。
再看整部小说个语言方式，“我讲”“侬讲”“伊讲”，故事个铺陈，老多是由人物直接个“哪能讲”来展现个。读完整篇，甚至有种看多幕话剧个感觉。也由此，又形成了小说个另一特色：故事，勿是侧重于作者讲述，而是偏好于人物个呈现。
人物个喜怒哀乐，侪一一拨呈现勒读者面前。话剧个魅力，勿就是因为舞台个呈现嘛？电视剧个魅力，勿就是因为荧屏个呈现嘛？《我去养老院了》个文字里，更多个是由人物直接个语言对话，声音化个呈现拨读者个。因此，作品一经勒喜马拉雅平台演播，邪气快就有听友反馈：“邪气好个小说，讲得既真实又有故事性，假使拍成功影视剧一定是老老赞个！”
虚构人物个真实性，激发了受众个广泛共鸣，甚至有评论者拿搿部长篇“误读”为“有得鲜明个新闻纪录特色，犹如一部长篇报告文学”。
我认为，小说无论哪能真实，侪勿好当新闻作品来读。作品当中个人物，无论哪能鲜活，侪无法寻到身份证浪个姓名。但是，既然读者个反响侪朝真实性去靠了，兆银兄，侬个创作算是成功个了。
讲述：王邦基
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
