作者：柯兆银
沪语改写：边秦翌
讲述：胡敏鸣
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
朱老太咬了口葱油饼，开心了：“真个好吃。”伊又咬了一口，看到黄红梅进来了，就浑身发抖，马上拿手去遮牢葱油饼，勿拨伊看到。
黄拿拖蓬拖地板，朱老太搭陶讲“我要回去，侬好带我回去伐？”“伊从进来开始就一直要回去。”黄搭陶讲，又搭朱老太讲，“侬囡儿儿子侪要上班，日里没人照顾，只好拿侬送到此地来，侬就蹲勒此里伐。”
“啊呀，我要回去呀，我勒屋里已经七八十年了，啥道理要赶我出来啊？”朱老太老悲哀个，“儿子囡儿四个侪覅我了，送我进来就再也呒没来过。陶老师，人家侪讲侬好， 我儿子拉下趟来，侬要帮我说服伊拉、接我回去，我先谢谢侬哦。”“我讲闲话勿会有用个呀。”陶讲。
“侬要每日天过来看看我，搭我讲讲闲话噢。”朱老太要求。陶看牢仔朱老太邪气同情，为伊悲哀，伊迓迓叫庆幸自家就要离开养老院了。
“侬哪能勒床浪向偷吃葱油饼啊？被头弄龌龊了又要我来汏。”黄斥责伊。“对勿起！对勿起哦！”朱老太全身发抖。
“下趟再搿能介，我就拿葱油饼抢过来厾勒垃圾桶里。”黄老凶狠个。
陶回到自家房间，关也回来了，宋看牢仔窗外头发戆。
黄老太个丈夫老张突然走进来，搭陶伤心个讲：“我刚刚勿敢告诉侬。我老婆个检查结果出来了，肺癌晚期，已经扩散了。”
“真个啊？”陶依嘉问“还勿送医院？”“儿子讲等伊来了再讲，今朝夜到乘高铁到。”老张讲好就走了。“哎呀，没几天了呀。”宋讲。“可惜，伊人老好个。”关讲。
“唉，我最近常庄听到认得个人过世，老底子老少听到个。”陶蛮伤感个“说明阿拉老了呀！”“邪气快要轮到阿拉了。”宋老悲哀个。“葛，还早伐。”关咪咪讲。
“人活勒海真个没意思。”宋感慨。
“阿拉有缘来，还是要珍惜只有一趟个机遇。”陶讲，“人生就是个过程，阿拉要让迭个过程开心，活勒当下，过好当下，快乐当下，搿就是人生个意义。”
“陶老师讲得好，勿要为未来瞎操心，未来啥样子啥人也勿晓得，行动勿能自理了哪能办？生毛病躺勒床浪勿好动了哪能办？老年痴呆了哪能办？管伊唻，尽情个活勒当下，开开心心活勒海。”关同意。
“老人拨人家嫌比，要开开心心个活也难个呀。”宋老伤感个，“陶老师，哪能再好开心个活呢？”
“我觉着哦，60岁到80岁初老辰光，大多数人思路还是活跃个，心智是健全个，生活基本能够自理，迭段美好辰光要重新开始‘第二春’，搿能再好快乐个活。”陶讲。
“侬当是自家没老，但人家就拿侬当老人了。”宋讲，“刚刚退休辰光，单位组织舞会，我也要一道去，但是年轻人侪讲‘宋老师，舞会结束会得老晏个，侬先回去伐’。伊拉勿带我了。辰光一长，所谓年轻人个事体侪搭我无关了，我勿老也老了。”“哎，宋老师讲得有道理，人家侪拿阿拉当老人，阿拉也只好拿自家当老人。”关讲。
作者：柯兆银
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
