作者：魏福春
来源：三亚日报
沪语改写：朱枫
讲述：王浩峰
文字、语音审核：丁迪蒙
编辑：王乙其
老倪讲：“春天到了，我伲出去走走。”老董讲：“好个呀，吃辛吃苦介许多年了，是应该过过自家欢喜个日脚了。”老倪笑了：“就搿能定下来了。”“耶！”两家头一击掌，开心得像小朋友。
老倪搭老董，30多年个朋友。同一天退休，当天夜里，到伊拉常庄去个小饭店，第一趟点了一台子菜。一直吃到半夜，再相互搀扶着走出店门。
伊个一日是哪能转去个，两家头云里雾里。老倪讲我搀侬上个车，老董讲我送侬到屋里个。迭个话题重复了交关趟，到现在也呒没弄明白。
老倪搭老董，每个礼拜小聚一趟。勿讲派头，饭店清爽点就好，酒各带各个。老倪欢喜白酒，儿子每个号头侪备好茅台个兄弟——反正是茅台镇浪个酒。老董欢喜黄酒，自然也是儿子孝敬个——绍兴花雕。讲起儿子，两家头侪是一面孔个骄傲。老倪搭老董从认得到交往，也是因为伊拉个儿子。
小囡进幼儿园、读小学，侪是老倪老董接送。伊拉个儿子勒同一只幼儿园，老倪个儿子大1岁，中班；老董个儿子小，小班。埃歇横里，只是有点面熟而已。想勿到小学也勒同一只学堂。
伊个一日大清老早，老倪像往常一样拿儿子送到学堂，调转助动车准备去上班，迎面碰着老董搭伊坐勒助动车浪个儿子，呆仔一呆。下半日接小囡，老倪看见老董已经勒学堂门口，两家头闲聊了起来……
老倪讲：“大热天到了，寻只地方避避暑伐。”老董讲：“庐山还是海南？”老倪讲：“庐山好，‘日照香炉生紫烟，遥看瀑布挂前川。飞流直下三千尺，疑是银河落九天。’搿世人生勿去，是一大遗憾。”老董讲：“海南美，勿是有一首歌么，‘请到天涯海角来，这里四季春常在，海南岛上春风暖，好花叫你喜心怀。’恨勿得明朝就去。”老倪哈哈一笑：“明朝？做侬个大头梦伐！”老董回：“葛末侬定只辰光，我听侬个”讲完两只眼睛拨瞪拨瞪望仔老倪，一副只等伊确定日脚拔脚就走个样子。老倪有眼尴尬，举起酒杯：“吃酒！”老董嘿嘿一笑，像赢仔铜钿一样得意个端起酒杯。
从退休个一天起，老倪搭老董就勒盘算，春夏秋冬，每3个号头寻只地方度个假。以前也有机会，伊拉大多放弃了——总归放心勿下儿子。现在伊拉个小囡侪大了，而且事业有成——老倪个儿子成了一家律师事务所合伙人，老董个儿子是一家企业副总经理。熟悉个朋友侪讲，做爷个劳苦功高。又讲，还是伊拉成功，儿子是最好个证明。
老倪老董心里只有儿子。读小学辰光，想着了初中；读初中辰光，打听起高中；刚进高中眼睛已经瞄上了211、985，比伊拉个家主婆还费心思。
老倪讲：“总算熬出头了！”老董讲：“我伲也应该快活快活了。”老倪认真起来：“啥辰光好好规划规划。”老董笑着举杯：“不负时光，不负人生。”老倪也举杯：“一口闷。”“一口闷！”黄酒杯白酒杯，发出一声脆响，两家头吃了一大口。
老倪讲：“要么法国去伐，埃菲尔铁塔下留只影。”秋天到了呀。老董讲：“对个呀，金秋十月，我伲法意瑞深度游，罗马斗兽场、万国宫、少女峰……一个也覅错过。”老倪讲：“好主意！杀杀搏搏白相一趟。”老董讲：“看看，阿里一家旅行社牢靠？”老倪讲：“侪差大勿多，无非看性价比。”老董开心个讲：“讲定了，法意瑞！”老倪也兴致勃勃：“讲定了！”
眼看约好个辰光要到了，老倪讲伊走勿开，孙子读小学，每日天要接送。老董讲巧了，孙子还勒幼儿园。儿子工作侪忙，老倪老董，还有倪夫人董夫人，观点一致：现在还呒没到放手个辰光。
冬天快到了，老倪老董吃点小酒个辰光，又计划起春天个旅游。两家头不约而同问对方：
搿趟侬想到阿里去？
作者：魏福春
讲述：王浩峰
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
