作者：巴金
沪语改写、讲述：朱枫
文字、语音审核：丁迪蒙
编辑：王乙其
为仔去看个朋友，我做了一次新宁铁路浪个旅客。我搭三个朋友一路从会城到公益，勒火车浪大约摸坐了三个钟头。辰光长，天气热，但是我并呒没觉着恹气。
南国个风物的确有种迷人个力量。勒我个眼睛里一切侪显出一种梦景般个美：茂盛个绿树，明亮个红土，一块一块个稻田，一堆一堆个房子，还有明镜一样个河水，高耸个碉楼。南国个乡村，虽然里向包含了勿少艰辛，但是表面看上去伊拉还是邪气个平静，邪气美丽个！
到了潭江，火车停下来。车轮呒没动，外头个景物却开始慢慢叫移动了。迭个勿是啥个奇迹啊。是新宁铁路浪个一段最美丽个工程。搿搭呒没桥，火车开上轮船，就停勒船浪向，拨轮船慢慢叫渡江过去。我下车，立勒轮船个甲板浪。船身并勿小，甲板浪铺仔铁轨，火车就躺勒铁轨浪喘气。左面有卖饮食个货摊，交关人围勒伊面说说笑笑。我一面走一面看。我走过火车头前头，到了右面。船浪有勿少工人。朋友告诉我，勒船浪做工个人有一百朝上。我像煞呒没看见介许多。有些工人勒抬铁链，有几个工人勒管机器。每部机器旁边至少立勒海一个穿香云纱衫个工人。伊拉管理机器，指挥轮船前进。搿些工人精神头十足，手法熟练，我看到了从心底里感动。
四周是平静个白水，远处有树，有屋。江面老宽个。搿能介个背景下头更加衬托出了工人个雄姿。机器有规律个勒勒响。火车趴勒伊面，像一条拨人制服了个蟒蛇。我看牢仔搿一切，感到了一种诗情。像煞读了一首真正个诗。于是，一种喜悦个、差勿多让我个心颤抖个感情捉牢我了。迭个机器个诗个动人力量，比任何诗人个作品侪要大得多。
诗应该拨人以创造个喜悦，诗应该散布生命。我勿是诗人，但是我却相信真正个诗人一定能够感受到机器个力量，机器工作个巧妙，机器运动个优雅，机器制造个完备。只有机器个诗再能够拨人以一种创造个喜悦。伊眼工人，伊眼管理机器、指挥轮船、拿千百个人、拿交关辆火车载过潭江个工人，伊拉立勒甲板浪，机器旁边，一面管理机器，一面望牢仔白茫茫个江面，看见轮船慢慢叫开近岸个辰光，伊拉心里个感觉，假使有人能够真实个写下来，一定是一首好诗。
我勒上海常庄看见一些大楼个修建。打桩个辰光，交关人侪围勒伊面看。有力个机器从高处拿一根又高又粗个木桩打到地底下去；一记，又一记，声音搭动作侪是有规律个，邪气快就拿木桩完全打进地底下去了，周围旁观者个面孔浪侪浮出了惊奇个微笑。地是平个，木头完全埋到地底下了。好像是难以相信个奇迹。
机器完成了奇迹，拨了每个人以喜悦。搿种喜悦个感情，也就是诗个感情。我每次看见工人造房子，就好像是勒读一首好诗。
讲述：朱枫
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
