作者：柯兆银
沪语改写：边秦翌
讲述：王邦基
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
“陶老师，侬年轻辰光肯定蛮风流个，追侬个人肯定有交关。”黄笑嘻嘻个讲。大家侪穷笑八笑了。“啥体介开心啊？”李莉走进来。关拿陶唱歌个视频搭照片拨伊看。
“陶老师个歌唱得真好听。”李莉搭关讲“侬拿视频发拨我，哦，还有照片，让我欣赏欣赏。”讲好急匆匆走了。
黄走过来，搭陶讲：“轮到侬了，剪指掐。”“手指甲我自家剪，脚趾掐请侬帮帮忙。”陶讲。“陶老师好自家来个就自家来。”关夸奖伊。
黄为陶剪脚节掐，用力忒大，陶痛“哦哟”了一声，黄有点无所谓，讲了声“对勿起”。急匆匆剪好就走了。
陶依嘉看牢伊个背影摇摇头。烫伤风波过去之后，黄个殷勤、巴结侪消失了，当然咾，还呒没恢复到原来对伊施加冷暴力个程度。
“陶老师今朝红光满面，精神邪气好。我也要到到鲁迅公园去唱歌。”关老有兴致个讲。“有机会阿拉一道出去白相。”陶讲。伊想拿自家个好消息告诉伊拉，犹豫了一下没讲，伊勿想破坏现在和谐个气氛，再讲，子女拉对搿桩事体上啥态度还勿晓得。
“侬搿白兰花真香啊。”关看牢陶胸前头个白兰花讲。“我已经老长辰光没戴过，还有栀子花了。”宋讲。
关拿电视机开开来，伊搭宋开始看新闻节目。
陶静静叫个等阿明个电话。有交关闲话要讲，公园唱歌实在忒兴奋了，还有照片搭视频也要发拨伊欣赏欣赏。当然，最重要个是要讲，住到周琴心个屋里去。
七点钟敲过一刻钟了，阿明个电话没来。陶熬勿牢，迓迓叫发信息：“侬勒做啥？”一分一秒过去了，没回复。“阿明电话还呒没来啊？”关问。
“可能刚好有事体。”陶回答。伊问“宋老师，侬好伐？”“噢，就混混伐。”宋回避，老明显个，伊勿想谈有关儿子个话题。
陶个手机响了，微信是阿明发个：姆妈，没啥重要事体，我就勿打电话了。再会。
陶邪气勿开心。没啥重要个事体，但是讲讲闲话也是要紧个啊。阿明啊，搭侬每日天打电话，是我个一份期待搭仔乐趣。侬工作、生活个点点滴滴，侬讲个大大小小个事体，我侪是感兴趣个。听到侬个声音就觉着充实，觉着还搭㑚生活勒一道。我勒养老院最大个期盼，就是有子女好牵挂，是有子女好讲闲话。阿霖、阿珍勿讲了，侬迭个奶末头儿子，我从小就宠侬，但是，侬现在让我老老失望个。决定住到周琴心屋里去是对个，要勿要现在就搭伊讲呢？
电视机屏幕浪出现健康养生节目，关搭宋一道老专心个看。
陶想了想，勒微信浪留言：阿明，过两日我就要离开养老院，到周琴心老师屋里结伴养老了，特此告知。姆妈。即日。手机马上就响了，是阿明来个，伊极吼拉吼个问，是真个伐，陶肯定个回答：是个。
“啊呀……”阿明一记头呆脱了。
（后首来哪能了，请听下头一章。）
作者：柯兆银
讲述：王邦基
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
