作者：柯兆银
沪语改写：边秦翌
讲述：朱枫
文字、语音审核：丁迪蒙
编辑：王乙其
往期回顾：
我去养老院了 第四章：入驻养老院（一）
“伊讲最近忙，书展之前勿来看我了。”陶依嘉讲。伊有点失落。“书展还有一个多号头唻。我进养老院五个号头，阿霖、阿珍来过两三趟；阿明开始每礼拜来，搿歇来得越来越少了，近抢把人影子也难得看到；现在伊来了也没心思，两三句就急匆匆走了。”
周琴心看了陶一眼，勿响。
伊拉边吃边聊，主要是讲养老院个事体。陶依嘉拿心里个怨气吐了出来，痰盂打翻脱之后季芳芳对伊牢伊个哇啦哇啦，新妇要赶伊走个电话，阿霖、阿珍个拒绝轮流让伊蹲，等等。还讲了养老院生活个枯燥、还有呒没尊严个遭遇，提到夜到个昏涂声让伊睏勿着咾啥，眼泪水是淌淌渧呀。
周琴心眼圈红了。
“琴心，我没想到会介苦，搿辈子为小囡拉吃个苦侪白吃了。”陶接过叶璐递过来个餐巾纸揩眼泪“最痛苦个是子女个冷淡、遗忘。我总归迓迓叫搭自家讲，人老了，要自度难关，要习惯搭子女保持一定距离。覅拿亲情看得忒重，否则受伤害个只是自家。”
“侬勒养老院苦我晓得个，听侬搿歇一讲，比我想象个还要苦，我真个心痛。”周琴心邪气同情。叶璐个眼眶也湿了，迓迓叫勒揩眼角。
“季芳芳迭只女人真勿是个人，阿明搭伊结婚眼睛真个瞎脱了。”陶讲。伊邪气愤怒。“人老了真是可怜，侪勿好自家作主了！想当初，侬也是有想法个，看上去文静，但是柔中有刚，啥事体侪难勿倒侬个，搿歇，唉！唉！” 周摇头叹息，邪气感慨。
“子女小辰光围牢爷娘转，爷娘是有求必应，全身心付出，心甘情愿个；老了就要围牢子女转，要看子女个面色，甚至要吓丝丝搭子女讲闲话。唉！”陶讲。伊邪气伤感，“唉，好为子女做事体就有发言权，就是伊拉个爷娘；老了要子女照顾了，呒没利用价值了，连得子女也覅侬了。”
“噢，我想起桩事体。伊年侬带班到南汇学农，小囡托付拨我一个号头。出发之前伊天下半日，阿拉带阿霖、阿明、阿珍，还有叶璐，一道到虹口公园去白相。”周琴心讲“侬还记得伐？”
“噢，对个对个。”陶想起来了“哎呀，日脚过得忒快了！”伊个一年，陶要到南汇学农，儿子囡儿寄养勒周琴心个屋里。伊日下半天，伊约周琴心带小囡到虹口公园白相。伊拉勒湖里向划船，周琴心拍照。白相好了伊拉勒四川路浪个饭店一道吃夜饭。夜到，陶送儿子囡儿到周琴心屋里，离开个辰光，阿霖突然抱牢仔伊个大腿哇啦哇啦哭：“侬勿要走呀！我勿要侬走呀！”阿珍拉牢伊个手叫“姆妈，我勿要侬走嘛。”阿明最小，干脆哇啦哇啦大哭头。
“一个号头，姆妈就会得来接㑚个。姆妈勿去就没工资，呒没钞票就勿好买物事拨㑚吃，勿好买衣裳拨㑚着，也勿好搭㑚付学费，㑚就勿好读书唻。”周耐心个劝。
“阿拉覅买物事，阿拉侪勿要，阿拉就要姆妈。”伊拉讲。
陶依嘉落眼泪了，伊劝了一个多钟头，伊拉还是勿让伊走。夜到10点多了，伊拉侪吃力得睏着了，陶依嘉再快点离开。
作者：柯兆银
讲述：朱枫
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
