མ་རྒན་གྱིས་ང་ལ་གནང་བ།
རྩོམ་པ་པོ། གཉན།
གང་དུ་སོང་ཡང་དེ་རུ་ཡོད་པ་ཡི། །
བག་ཆགས་ལང་ཚོ་ཐེར་ཟུག་མི་ནུབ་པ། །
དྲི་མེད་གཡའ་དག་ནམ་མཁའ་སྔོན་པོ་དེ། །
མ་རྒན་བཀྲ་ཤིས་སྒྲོལ་མ་ཡིན་ནོ་སྙམ། །
མི་གཡོ་མི་འདར་རང་བཞིན་ལྷུན་ཆགས་པ། །
གཉུག་མའི་གཤིས་ཀྱི་ངོ་བོ་མི་འགྱུར་བ། །
རྣལ་དུ་གནས་པའི་རང་བྱུང་བཀོད་པ་དེ། །
མ་རྒན་བཀྲ་ཤིས་སྒྲོལ་མ་ཡིན་ནོ་སྙམ། །
རྡུལ་ཕྲན་རེ་རེའི་ཐོག་ཏུ་བལྟས་པ་ན། །
སེམས་ཀྱི་ཕ་ཡུལ་དངོས་ནི་མཐོང་བ་ལ། །
ལྷོད་ལྷོད་འཚེ་མེད་ཞི་བའི་རིག་པ་དེ། །
མ་རྒན་བཀྲ་ཤིས་སྒྲོལ་མ་ཡིན་ནོ་སྙམ། །
★
རྩོམ་སྒྲིག་པ། རོང་པོ་རང་འཚོལ། དོ་དམ་པ། རོང་པོ་རང་འཚོལ།
