དཀར་གསལ་ཟླ་བ། ཞར་བཀོད་གསུམ།
རྩོམ་པ་པོ། རོང་པོ་རང་འཚོལ།
དཀར་གསལ་ཟླ་བ།
ཁོ་མོའི་བཞིན་རས་དཀལ་གསལ་ཟླ་བ་འདྲ། །
དཀར་གསལ་ཟླ་བ་འཛུམ་ཙམ་ཟུམ་ཙམ་བྱེད། །
གོར་གོར་འོ་མའི་ཐིག་ལེ་འཐུང་འདོད་ཀྱིས། །
དེ་མཐོང་ཡིད་དགའ་ལྡང་ཙམ་གཡོ་ཙམ་བྱེད། །
དཀར་གསལ་ཟླ་བ་རེས་འཆར་རེས་ནུབ་ཡོང་། །
དེ་འཐུང་ཨུཏྤལ་གཡོ་ཙམ་འགུལ་ཙམ་ཡོང་། །
རིང་སོང་ཟླ་བ་མཐོན་པོའི་དགུང་ན་གསལ། །
མཐོན་པོའི་དགུང་ན་ཁེར་བུ་རླུང་གིས་ཟ། །
མ་འདྲིས་གྲོགས་ལ་འཁོར་བའི་ཕྱི་མིག་གིས། །
ཡང་ཡང་ཞལ་ངོ་ཐང་ལ་འཕེན་བྱེད་པ། །
ཞིབ་ཏུ་བརྟགས་ན་དཀར་གསལ་ཟླ་བ་ཡང་། །
སྐྱོ་བའི་རི་མོ་དང་བཅས་རྒྱང་ལ་འགྲོ། །
དཀར་གསལ་ཟླ་བ་སྟོང་བའི་ཁམས་ནས་བཞུད། །
འཕུར་འདོད་ཨུཏྤལ་དམའ་མོའི་ས་ལ་བཏགས། །
ལམ་དེ་གནམ་སས་བཅད་སོང་སྐྱོ་ཐལ་ལོ། །
ལས་དེ་སྣང་བས་བཀག་སོང་སྐྱོ་ཐལ་ལོ། །
སྙིང་ཉེ་བའི་ནམ་མཁའ།
ཁ་སང་དང་དེ་རིང་ད་དུང་མ་འོངས་པ་དེ་དག
ཁྱེད་ཀྱི་ཕྱག་ཟུང་ལ་སྙོར་རོགས།
བྱིས་པའི་པྲ་ཚག་ནས་རྒན་པོའི་སྐྲ་དཀར།
དེ་དག་ཀྱང་ཁྱེད་ཀྱིས་བདག་རོགས།
ལམ་འདི་ནས་གཞན་དང་གཞན་ནས་གཞན་དག
དེ་དག་ཀྱང་ཁྱེད་ཀྱིས་གཟིགས་རོགས།
ང་དང་ང་ཡིར་འཁྱུག་པའི་ཡིག་འབྲུ་འདི་དག
ཁྱེད་ཀྱིས་གཅེས་སེམས་ལ་གདགས་རོགས།
མི་ཤེས་པའི་ས་དཀར་དཀར་དེ་ནས།
མི་དཔོག་པའི་ཁྱེད་ཀྱིས།
ཅིས་ཀྱང་ཕྱེད་མིག་ཅིག་འཇོག་རོགས།
ཕྱེད་མིག་དེའི་ཟུར་ན་ངའང་འཇོག་རོགས།
ཀྱེ་ཀྱེ། སྙིང་ཉེ་བའི་ནམ་མཁའ།
རྣམ་སྨིན།
འདི་ནས་རྒྱང་རིང་མ་རེད་སེམས་ཀྱི་ཐུ་སྣེ་ཞིག །
འཁྲིལ་བའི་སྒྲ་དབྱངས་མ་རེད་སྐྱོ་བའི་ལོག་མལ་ཞིག །
འུ་གཉིས་བྱ་ཡིན་མ་རེད་འཕུར་བའི་ནམ་མཁའ་མེད། །
གཏན་དུ་གཉིད་པའི་བྱ་བ་འདི་ཡང་ཚར་དུས་མེད། །
བྱམས་པས་བཤད་ན་འུ་གཉིས་འགྲོག་པ་མི་རིང་ཟེར། །
དེ་ཡང་མ་ཡིན་ད་ཆ་ཕན་ཚུན་སུན་ཅིང་མཆིས། །
མི་རེའི་མགོ་ན་ན་བུན་སྟུག་པོ་མི་དྭངས་པས། །
གཏམ་དང་བརྩེ་བ་རྡོ་ཐོག་ཆུ་ཐིགས་ལྟར་དུ་ཡལ། །
འཐོབ་བྱ་མ་མཆིས་མདུན་ཕྱོགས་གྲོང་གིས་ཅི་ཞིག་བྱ། །
འུ་གཉིས་ཆུང་འགྲོ་ཐོབ་ཐང་གླེང་བའི་གྲལ་སྟེགས་མེད། །
འདི་ན་གངས་ཡིན་དེ་ན་མེ་ཆུ་རླུང་གི་ཁམས། །
འུ་གཉིས་སྐྱིད་སྡུག་ཚ་གྲང་འཐབ་པ་དེ་ག་ཙམ། །
ལོ་ཟླ་འདི་དག
ང་རང་ངོ་མ་ངོ་མི་ཤེས་པ་ཞིག་ཏུ་གྱུར་འདུག
ངས་མེ་ལོང་དུ་རང་ཉིད་མཐོང་ཐུབ་མོད།
མེ་ལོང་ངོས་ཀྱི་ང་རང་ནི་ང་རང་གཞན་ཞིག་རེད།
ལོ་ཟླ་འདི་དག་ཏུ།
ངས་རང་ཉིད་དུར་ཐང་དུ་སྦས་སམ་སྙམ།
ང་རང་ལོ་ཟླ་འདི་དག་གི་ནང་སྙིང་དུ་བཅུག་དུས།
ངས་རང་ཉིད་བོར་སོང་།
ལོ་ཟླ་འདི་དག་དང་ལྷན་དུ་བོར་སོང་།
ལོ་ཟླ་འདི་དག
ངའམ་ངའི་ལོ་ཟླ་འདི་དག
སྐྱ་ཤར་ཤར་གྱིས་རྒྱང་རིང་གི་ཕྱོགས་སུ་བསྲིངས་འདུག་ཀྱང་།
རྒྱང་རིང་ལ་མུ་མཐའ་མེད་པས།
ངས་རང་ཉིད་བོར་སོང་།
ལོ་ཟླ་འདི་དག་ཀྱང་བོར་སོང་།
སྒྲིག་སྦྱོར་བ། རོང་པོ་རང་འཚོལ།
