ཇ་མཆོད་ཀླུ་དབང་གཙུག་ནོར།
རྩོམ་པ་པོ། ཀུན་མཁྱེན་པདྨ་དཀར་པོས་མཛད།
ཨོཾ་ཨཱཿ ཧཱུྃ།
འཇིག་རྟེན་ཀླུ་དབང་གཙུག་ན་ནོར་བུའི་མཆོག།
བསམ་པའི་རེ་བ་ཐམས་ཅད་སྐོང་མཛད་པ།།
མཚུངས་མེད་བླ་མ་མཆོག་གསུམ་ཡི་དམ་ལྷ།།
དམ་ཅན་རྒྱ་མཚོའི་ཚོགས་རྣམས་འདིར་གཤེགས་ཤིག།
ཕུན་ཚོགས་བསོད་ནམས་སྟོབས་ལས་གྲུབ་པའི་བཅུད།།
རྒྱ་ཇ་དྲི་བཟང་མདོག་མཛེས་རོ་བརྒྱ་པ།།
མོས་བློས་མཁའ་ཁྱབ་བདུད་རྩིའི་མཚོར་དམིགས་ནས།།
མཆོད་དོ་གྲུབ་པ་བརྒྱད་ཀྱི་དངོས་གྲུབ་སྩོལ།།
རྩ་ཚོགས་དྷཱུ་ཏཱིར་དག་པའི་བདེ་སྐྱོང་མར།།
ནཱ་དའི་སྔགས་རྒྱས་ཕུང་ཁམས་སྐྱེ་མཆེད་ཆོས།།
དྭངས་མའི་ཁམས་བཞུ་ཟག་མེད་བདུད་རྩིར་འབུལ།།
མཆོག་གི་གོ་འཕང་ཐོབ་པའི་དགེ་ལེགས་སྩོལ།།
སྒྱུ་འཕྲུལ་སྣང་བས་མཛེས་པའི་སྟོང་ཉིད་ལ།།
མི་འགྱུར་སྙིང་རྗེའི་གང་བ་ཆགས་པའི་རོ།།
ཟུང་འཇུག་ཡེ་ཤེས་བདུད་རྩིའི་ལོངས་སྤྱོད་ཀྱིས།།
མཆོད་བྱ་མཆོད་བྱེད་མཉམ་པ་ཉིད་དུ་མཆོད།།
ཆོས་སྐྱོང་ཆེན་པོའི་བཀས་བསྐུལ་ནས་བཙུན་པ་པདྨ་དཀར་པོས་སྦྱར་བའོ།།
སྒྲིག་སྦྱོར་བ། རོང་པོ་རང་འཚོལ།
