གངས་རིན་པོ་ཆེ་ཐོག་མར་མཇལ་དུས།
(ཞར་བཀོད་གཉིས)
རྩོམ་པ་པོ། གདུ་བུ།
ངས་རྟག་ཏུ།
དཀར་པོ་ནི་ཁྱོད་གྲུབ་བྱེད་
གཅིག་པུ་དེ་ཡིན་པར་བཤད།
དེ་ནས་བཟུང་།
ངས་ཁྱོད་དྲན་དུས།
དེའི་སྔོན་ཏག་ཏག་ལ།
དཀར་པོ་དེ་ཁོ་ན་དྲན་དགོས་བྱུང་།
དེའི་རྗེས་སུ་ཁྱོད་བོར་སོང་།
དཀར་པོ་དེ་བོར་རྒྱུ་མི་འདུག
དེ་རིང་།
ཡུན་རིང་ཡུན་རིང་ཞིག
མུན་པའི་ནང་དུ་ཡང་ཡང་ཡོང་བའི་དཀར་པོ་དེ།
གློ་བུར་ནག་པོ་ལ་འགྱུར་སོང་།
སེམས་པ་འདི། ཡན་ལག་འདི།
2024.07.20ཉིན་གུ་གེའི་ཡུལ་ནས།
ཁོང་ཁྲོ་སྐྱེ་ཚུལ།
ཡན་ལག་ལ་ར་སྐྱེས་ཏེ་དངོས་པོ་དག་རྒྱང་དུ་གཡུགས།
མིག་ཚིལ་གྱིས་ཁྲག་འཐུང་ནས་འགུལ།
རྫི་མ་ཐེར་ཟུག་བྱས་ནས་ངུ་།
ངོ་གདོང་ཁོ་ནར་སྤྲིན་ནག་མཁྲིགས་ནས་གང་སར་ཐོག་རྒྱག
མིག་གི་རྒྱལ་མོ་རྒྱས་ཏེ་འབར་འགད་བྱེད།
མགོ་སྤུར་ཚེར་མ་སྐྱེས་ནས་སུས་རེག་ན་རྨ་ཁ་འདེབས།
སྣ་ཁུང་ནང་མེ་འགྱོགས་སྐྱེས་ཏེ་སྒྲ་འདོན།
སྤུ་ལོང་ལ་མེ་སྐྱེས་ཏེ་རྒྱང་རིང་གི་ནགས་ཚལ་ཚིག
རྐང་པ་ལ་ཕ་བོང་ཆེན་པོ་ཞིག་སྐྱེས་ཏེ་གནོད་པ་བྱེད།
ཁ་ནང་ནས་ནད་རིགས་བཞི་བརྒྱ་རྩ་བཞི་སྐྱེས་ཏེ་གང་སར་འགོ།
ལུས་ལ་གླང་ཆེན་སྐྱེས་ཏེ་ཅ་དངོས་གཅོག
མིག་ཟུང་ནང་དགྲ་བོ་སྐྱེས་ཏེ་ནང་རུལ་བྱེད།
ངོ་ཚའི་ནང་ཁྲེལ་མེད་སྐྱེས་ཏེ་དྲིན་དང་དགའ་བ་བརྗེད།
སྐད་ཆའི་ནང་དགུན་ཁ་སྐྱེས་ཏེ་ཁང་མིག་འཁྱག་པར་བཟོས།
བདེ་སྐྱིད་ནང་ལྕགས་སྐྱེས་ཏེ་བཙོན་ལ་བཅུག
མཉམ་འཛོམས་ནང་དུག་སྐྱེས་ཏེ་ཡུལ་གྱར་གཏོང་།
ཕ་ཡུལ་གྱིས།
ངས་ལུ་མའི་❶མགོ་ལ་རྫིང་❷གཏང་ན།
སྐྱེ་ཁམས་ལ་གནོད་པ་ཡོད་ཅེས་བྲིས་པ་དྲན།
དེའི་རྗེས་སུ་ངས།
ལུ་མའི་མགོ་ལ་རྫིང་གཏང་ན།
སྒོར་མོས་ཆད་པ་གཅོད་ཅེས་བྲིས་སོང་།
ཡང་བསྐྱར་ངས།
ལུ་མའི་མགོ་ལ་རྫིང་གཏང་ན།
གྲི་གཡུགས་ནས་གསོད་ཅེས་བྲིས་འདུག
མཐའ་མར་ངས།
ལུ་མའི་མགོ་ལ་“ཀླུ་”བཞུགས་ཡོད་ཅེས་བྲིས་བཞག
དྲང་མོར་བརྗོད་ན།
གངས་རི་དང་མཚོ་མོས་བྱས་པའི་ཕ་ཡུལ་གྱིས།
སྐྱེ་ཁམས་ཟེར་ན་གོ་བ་ལོན་གྱི་མི་འདུག
སྒོར་མོ་ཟེར་ན་གོ་བ་ལོན་གྱི་མི་འདུག
གྲི་ཟེར་ན་གོ་བ་ལོན་གྱི་མི་འདུག
❶ལུ་མ་ནི་ས་འོག་ནས་ལུད་པའི་ཆུ་སྟེ་དགུན་ཁར་དར་མི་ཆགས།
❷ནག་ཆུའི་ཡུལ་སྐད་དུ་གཅིན་པ་ལ་རྫིང་ཟེར།
★
རྩོམ་སྒྲིག་པ། རོང་པོ་རང་འཚོལ། དོ་དམ་པ། རོང་པོ་རང་འཚོལ།
