作者：张爱玲
沪语改写：上官
朗读：上官
文字、语音审核：丁迪蒙
编辑：王乙其
前言
作家贾平凹曾经讲：“搭张爱玲共同生勒一个世界浪也是幸运。”
2024年7月28日，勒张爱玲个故居，我伲举办了一场别开生面张爱玲作品沪语诵读会。
上海康定东路85号，原名叫麦根路别墅，是张爱玲个出生地，建造于张爱玲生出来个伊个一年，搿是一座一百多年个花园洋房，见证了上海个历史记忆。
现场共有三十多个沪语朗读爱好者，搿些老年、中年搭仔年轻人，勒勒大热天，顶勒火热踏踏滚个太阳，来到了故居，大家齐聚勒一堂，沉浸勒富有感染力个张爱玲个散文当中，阿拉采用个是用沪语，用沪语诵读，显得更加高雅，具有海派文化个风味。
从今朝开始，我伲陆续推出用沪语朗读个张爱玲个散文（节选），通过搿种方式，让大家晓得。沪语既来可以拉家常、聊天，也可以朗读典雅个文学作品。用沪语读文章，有普通话完全勿同个语音感受，音韵、节奏、语气侪是另具风采个。
往期回顾：沪语诵读张爱玲作品（一）：公寓生活记趣
我个孃孃讲闲话，里向有种机智搭仔见识，我告诉伊，搿有点像周作人个。伊讲，伊勿晓得搿眼物事，也勿感兴趣——因为伊勿欢喜文人，所以到处需要撇清。但是，有趟仔伊也讲：“我一日到夜一直是心平气和个呀！”
有天夜里蛮冷个。伊极吼吼要朝被头洞里钻，讲：“视睡如归。”写下来好成为首小诗：“冬天介个夜里向，睏觉真适意呀。”有趟汏头，勿晓得难能桩事体，头发弄得邪气龌龊，墨黜里个黑。伊讲：“头发像煞褪颜色了。”
伊有过个邪气啰嗦个老年朋友，乃勿大来往了。伊讲：“生命忒短唻，化介许多辰光搭伊个勒一道忒可惜唻——但是，搭伊勒一道又拨人一种生命长头势个感觉。”
开始辰光我当是伊讲：因为烦，辰光好像过得邪气慢。后首来发现，伊是另外个意思：人老了好变得稀里糊涂，看到搿副吞头势，辣末生头觉着生命真是长头势啊。
孃孃读了苏青搭我交谈个纪录，所有个书咾、报纸、杂志咾啥，我侪要逼牢伊看个。我个小说伊一来就讲“看勿进去”，葛末看勒亲眷个份浪，伊倒是老诚心个每一篇侪看过个，不过还是嫌比我个小说写得勿哪能开心。原稿，伊是绝对覅看个，清样还好将就。关于职业妇女，伊也有交关意见。伊觉着，大家侪拿职业妇女搭其他女人分开，作为一种特别个类型，实际浪勿需要迭能个。职业浪个成败，侪看人个作派，搭家庭生活是一样个。普通妇女个职业，侪勿是啥专门技术个性质，只不过是勒写字间里做人罢了。勒屋里向有本事个，好比王熙凤，出来了一定是个做经理个人才，老了勿起个。将来伊或许要写本书，就写关于女人上班个秘诀，譬如讲，开头应该哪能“有冲头”，对自家哪能“隐恶扬善”……但是，挨下去伊又讲了：“勿用劝我写，我做文人是勿来三个。只管勒公事房里打电报，养成了一种电报作风，只会得一味个省字，拿起稿费来是忒勿佮算了呀！”
伊讲起事体来，勿要忒挑三拣四噢，譬如，伊讲：“假使是个男人就要当家个，有辰光就呒没选择个余地，再苦也必须做个，因为讲起来搿是伊个责任。但是，像我搿能呒没屋里向拖勒海个，假使做个生活勿称心，赚眼钞票愁眉苦脸，活得勿开心，到底是为点啥呢?”
以前伊有段辰光勒无线电台浪播新闻，诵读社论，每日天工作半个钟头。伊讲：“我每日天讲半个钟头没意思个闲话，工资好拿好几万；我一日到夜讲有意思个闲话，倒拿勿着一分洋钿。”
有种人胆子老小个，演讲个辰光要打搿楞，孃孃就批评伊：“人家讲闲话优美好听，讲起来像煞是嘴巴里吐珠宝出来一样，乃搿个人呢，是珠宝卡勒胡咙里了。”
我拿“爱德华七世路”弄错了，当成是“爱德华八世路”，伊讲：“爱德华八世还没来得及成为马路唻。”对于阿拉张家个人，伊没啥好感，但伊对我比较好眼，但也是因为我自家贴上去个，伊拿我没办法，还常庄抱怨：“搭侬住勒一道啊，老是“笃笃笃”，人就变得啰嗦了，老是要搭侬解释清爽，就变得骄傲唻。”
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
