作者：辛旭光
沪语改写、播讲：杜郁芬（十一）、李群（十二）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（十一）
八岁埃年，儿子眼睛感染细菌，外头有人讲迭个叫“沙眼”，一歇勿停要捻眼睛，开始辰光，姆妈寻隔壁郎中要了点眼药水滴滴，一年多还呒没好。阿伯骂伊，带仔儿子到医院看，医生讲是眼翳病，拖下去眼睛会瞎脱个。姆妈听了又后悔又急，伊小辰光看到过好婆，用舌头舔孙子眼翳个。所以姆妈夜班转来，就马上拿儿子叫醒，真个用舌头反复去舔儿子个眼睑、眼球、眼角，角角落落侪舔到了。儿子倒是觉着痒兮兮个蛮适意，浑身软酥，酥得好像泡勒浪花里荡漾。每趟舔好，姆妈侪会捏牢儿子面孔讲：“我想吃脱侬哎！。”搿句闲话成为了姆妈搭儿子特别个约定，碰着开心事体、勿开心事体，姆妈侪会讲个。
老天爷作证个，男小囡个脚后跟已经缩进去了，跟骨勿再是凸出来个，还永远结了一层邪气厚个老茧。别人个袜子，侪是脚节头部分先坏，伊个袜子呢，永远是先坏后跟头。迭个赤子之身，真个是勿同凡响啊。
搿歇日脚，姆妈是掐仔节头管算个，儿子养勒农历八月十八，属牛。离开上海正好15天了。三日天之后，姆妈硬撑碌起来，小囡积下来个尿布要汏好，有得血个稻草要清脱，否则蛇虫百脚侪要来个。伊是童工出身，勒上海滩混碗饭，吃十几年，性格磨炼得邪气坚强，手脚也锻炼得邪气能干。毕竟三十刚刚出头，一个南通乡下头出来个姑娘，身高162，勒伊个年代算是蛮长个了，身体硬扎、磨得起个。
搿趟莫名其妙落难他乡，再讲又是勒一个女人顶顶软弱、困难个辰光。举目无亲，真叫是人没钞票勿如鬼，汤里没盐勿如水。但是命，还是要捏勒自家个手里个。
吃饭第一要紧。姆妈决定每日天继续到庙里去讨粥。另外，要逃回上海，必须要有盘缠铜钿，葛是只好到街浪向去讨了。不过搿能也好打听眼消息。国共打仗，也勿晓得阿里一日会停，现在要回上海，看来也只有靠走私船了。
（十二）
大难临头，又人生地勿熟，呒没身份，乃末“脚馒头浪打瞌充，只有自靠自”了。姆妈一向自食其力，勒厂里就是能手，老板拨个工钿最高，一个号头有五只洋唻。姆妈有自尊心，现在当然勿会随便开口挜求，伸手讨要，就是讨饭也要有点样子。
姆妈用一块黄颜色个毛巾绢头包牢头，当怕自家生月子风。又拿小花头个长袖衬衫拉拉挺刮。半个号头前小姊妹搭伊烫过个短发，梳得整整齐齐，抱勒儿子，带只空罐头，坐勒靠码头个街边，拾了一只男人个大鞋子垫勒屁股下头，人家一看，就晓得是大城市落难过来个样子。
第一天，姆妈坐得离老阿娘屋里个店远一眼个地方，后来再晓得，老阿娘姓金，有两爿店铺，一爿叫“金氏弹花铺”，一爿叫“金氏打铁铺”。老阿娘看到了姆妈个样子叹了口气，叫伊孙囡拿块硬钵纸，写上去“有儿有女有男人，平白无故落他乡，饥儿在手勿满月，凑点盘缠回上海。”硬钵纸地浪一摊，压上搿只马口铁罐头，讨饭个腔调就算有了。
码头浪歇勿歇靠过来一只船，涌上来一批批疲惫勿堪个人流。大家看到姆妈穿着整齐，勿像邋里邋遢个叫花子，一般也乐意停下来跟伊攀谈几句，晓得是拨人家劫过来个上海女工，大家纷纷摇头，啧啧感叹，多眼少眼侪会厾几只零碎角子，姆妈就摇仔儿子肉嘟嘟个小手，向伊拉表示感谢。
“急水也有回头浪”。逆境中也总算碰着好人，有辰光倒来一碗米，有辰光送来一袋山芋，每日天多少侪有眼收入。姆妈突然觉着，靠山靠海个地方，到底物产丰富。
沈家门原来就是烧香拜佛个旅游地方，海产品种类多，贸易也繁荣，店铺摊位一家一家鳞次栉比，镇浪向人家大部分侪是三餐勿愁个，个个淳朴热心，迭个地方也是民情稳定。
作者：辛旭光
播讲：杜郁芬（十一）
播讲：李群（十二）
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
