作者：辛旭光
沪语改写、播讲：丁一军（九）、杜郁芬（十）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（九）
姆妈一日一夜滴水呒没进口，小毛头勒勒脚边头个稻草堆里动发动发，姆妈本能个拿小毛头夹了自家两只大腿里，却再也没力气抱起来了。鬼门关前头兜仔一圈，伊个一眼眼生气还飘悠勒云里雾里唻。暗头里向，有人端来一钵斗烂糊面，搿是舟山人利用火堆个余热煲仔吃个物事，俗称“煨粥”“煨面”。浓稠个面条裹勒海煠酥个青菜叶子。姆妈拼仔命个连吞带咽，软稠个面条滑进胡咙，先是脚底心，再到肚肠根侪开始暖热起来了。“还算好，呒没死勒昨日仔！”干枯个眼眶里眼泪水又翁出来了：“讨债鬼啊，老天爷勿收侬，姆妈一定要拿侬带回上海去。”
搿一钵斗面是啥人送来个？隐隐约约像煞是有人摸摸索索塞到自家手浪个，搿只观世音菩萨一样个手，纤纤细细，瘦骨精干，手腕浪还套仔只滑溜溜个镯头。
好像是暗头里有老多只手，拿姆妈扶起来了。伊个身浪向开始有热气了，脑子也活起来了，伊终于听到了毛毛头已经哭哑脱个声音。伊拿脚跟边浪向个小毛头拉上来，摸到了小毛头两条腿当中个小麻雀，开心个哭了：“朱家门有种了！”
伊拿小毛头抱勒胸口头，小毛头个嘴巴开始动起来了，像小老虫小兔子一样，闭仔眼睛，两只手勒姆妈身浪向乱摸。因为小毛头个手节头浪还留了娘胎里向羊水个味道，搿种味道熟悉到魂灵头里了。但是，姆妈原来又大又饱满个两只奶奶，搿歇竟然勿争气，瘪搨搨个坍勒两边，呒没一滴奶水，小毛头个手也就没了好抓牢个地方。姆妈是痛得钻心呀，伊晓得现在个处境，是等勿到奶奶再膨胀，溢出无穷无尽奶水个了。
（十）
姆妈寻到了欸只钵斗，里向还有剩下来个面条汤，马上吃了一口，又拿面条淘成烂糊，口对口，拿面汤嘘嘘嘘个送到儿子个小嘴巴里，勿晓得喂了几口，直到儿子勿哭了。
想勿到儿子个第一口奶，居然是口浓浓个咸个面汤。咸汤奠定了迭个小囡以后吃口一定是咸个，伊勿会挑食，但是也永远留下了“奶馋”个念想。
看牢迭个从鬼门关抢回来个儿子，姆妈要查查看伊身浪向有啥个记认。手一摸末心一惊呀，儿子个两只脚跟鲜血溚溚渧，后跟个嫩皮侪挫脱了。出了娘胎没人管，毛毛头滑落勒姆妈个脚边头，两只小脚勒老老粗个稻草浪乱蹬乱划，划了一日一夜，一片血肉模糊。哎呦呦，再硬气个姆妈也见勿得儿子受苦受难。十指连娘心，是长子夭折个厄运又要重演了？葛勿来事个！老朱家一门勿好断后个。姆妈捧起仔儿子个小脚，毫勿迟疑个用舌头去舔，赛过一只老猫，用自家柔软个舌尖，专心致志个舔脱小猫身浪个每一滴血迹、每一厾龌龊。舔了一只调一只，舔了一遍又一遍，直到拿小脚脚浪伤口个血迹、草丝侪舔光了，露出了血肉原来细嫩个样子。姆妈又像只野狗衔仔小狗寻庇护个地方一样，拿儿子用布裹好，再也勿肯让伊离开自家了。
迭个真个是一场古老又原始个仪式，搿种母性个唤醒，激发起生命个洪荒之力。血里个亲，切肤透骨，喷薄而出，扫荡、摧垮了“勿想活下去”个怯弱想法。“就是做孟姜女，我也要拿儿子带回上海！”
姆妈个决心，就像搭儿子做了一件抗拒饥寒、磨难个铁布衫。一直到几十年之后，姆妈还总归要讲，“儿子个脚是香喷喷个，比奇楠香好闻！我真想吃脱侬呀”。
作者：辛旭光
播讲：杜郁芬（十）
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
