作者：李大伟
沪语改写：朱枫
诵读：许建忠
文字、语音审核：丁迪蒙
编辑：王乙其
往期回顾：我个中学班主任（上）
毕业之后没几化辰光，恢复高考了，我到伊办公室想讨眼高考复习资料，伊当时勒带高考文科班，伊是埃个时代勿多个文革之前个本科生。我立勒海毕恭毕敬个搭伊讲，伊侧仔身体听，眼睛也没抬一抬，椅子往后头墙壁浪一靠，面孔朝天，哇啦哇啦朝远处个伊个曾经教过我政治课个老师喊：“诸老师啊！李大伟讲伊要考大学喽”，口气像煞是天方夜谭，或者是痴人说梦。我低仔头走出办公室，伊一动也勿动，一副势利面孔。我勿怪伊，只怪自家，勿晓得自家勒人家心里向有得几斤几两。亏得差生有优势，皮厚，而我面皮特别厚，因为从小到大，精神世界里勿晓得拨打了多少耳光，起板“噼、噼、噼三记耳光——一只半来回”：皮厚勿觉着痛痒，还勿记恨，搿就是憨呀！否则末，非得抑郁症勿可。
我当年考上了，属于瞎猫碰着死老虫，好听点叫额角头碰着天花板。伊晓得之后，差伊班里个同学跑到我屋里，便条也呒写一张，勒伊个眼睛里，我就是“召之即来、挥之即去”个狗呀。伊叫我到伊班里去现身说法讲讲心得体会，我一记头像煞成为了《大墙内外》（上海劳改局个刊物，专门介绍重新做人个模范）里个浪子回头人物。
我百思不得其解，我也就功课推扳点、有眼木噱噱、戆嗨嗨，而搿些缺陷对伊侪呒啥害处，为啥搿能恨我呢？直到中学毕业，我也呒没加入红卫兵。学生当中个红卫兵，也就相当于农村里个民兵组织，只要呒没污点，侪好参加个，偏生就拿我拒之门外。班长赵家华是校红卫兵团长，多次推举，居然拨伊一次次否决，搿是学生组织，拨伊一手遮天，因为迭个原因，伊对搿位“校级领导”有得看法。
现在明白了，其实勿是恨，伊根本就是看勿起，当侬是空气 。
我带仔感恩个心情写过《教语文个数学老师》，写过《我个体育老师》，也写过《小学班主任》，伊也讨厌我个，但是我尊敬伊，伊拿爱送拨勒其他差生，一个失去了母爱、也呒没父爱个差生，伊个人格是高尚个，只不过胸襟有些狭窄而已。
我搿篇文章，写负面个多了，可能登勿出来，因为老师是拨光环包围勒海，勿好批评个。其实，一个行业里总归是有君子有小人个，假使侪是一抹式个君子、呒没小人，就像一出大戏呒没戏眼了。
后来，我也创办了教育机构，对差生我特别关心，搿应当归功于中学个班主任，学渣可以读勿好书，但是，勿好呒没尊严。
作者：李大伟
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
