作者：周珂银
沪语改写、讲述：李群
文字、语音审核：丁迪蒙
编辑：王乙其
三年前，我出版了一本散文集《情感扶手》。我姆妈就送了本拨了邻居林阿姨。搿是因为林阿姨常庄勒报纸浪读我发表个文章。伊退休之前是中学语文老师，满头银发，气质优雅。有趟仔我去看望爷娘，勒邻里中心刚巧碰着林阿姨。伊是位热心个志愿者，负责搿个养老社区个读书会活动，我爷娘侪是伊读书会个成员。伊看到我邪气开心，讲：“侬个书，里向个一眼小故事，老接地气个。我想组织一场读书会，邀请侬来讲讲书里个故事好伐？”我讲可以个呀，㑚约定辰光提前告诉我就好了。伊后来搭我爷娘说：“让我伲个子女告阿拉一道参加读书活动，邪气有意义个啊！”
迭句闲话讲得让我一记头觉着老有幸福感个。我也是个有孙辈个人了，还好拨看作小辈，搿种感动是不言而喻个。但是，作为小囡，向来爷娘是有要求个。小辰光，搭人家个小囡比读书，比考试；长大了比工作，比事业----每个阶段侪有得比个。现在，阿拉作为子女，差勿多侪退休了，还比点啥呢？其实，还是有得比个，搿就是比孝心。譬如，有趟社区组织老人近郊一日游，爷娘侪报名了。白相好回转来，老娘就唉声叹气讲：两只脚也抬勿起来了。还讲，小区里张阿姨八十多岁了，但是，人家囡儿六十多岁了，陪娘去白相个，伊囡儿还带了只小矮凳，张阿姨走勿动了，囡儿就拿出小矮凳让姆妈歇一歇，迭个女儿多少孝顺啊。我听出了弦外之音，晓得老妈又要比了，就成心讲：“搿六十多岁个囡儿应该带两只小矮凳去个。”“为啥？”老娘勿理解。我讲，姆妈老了，囡儿也老了呀。老娘也听出来了，我闲话里有闲话，伊“横”了我一眼，我就对牢伊做了只怪笑。
前腔把，我姆妈勒社区统一体检当中，查出身体有只部位有得结节，医生虽然讲目前呒没啥要紧，只需要定期随访。但是，姆妈有了心结。我回屋里个辰光，伊告我说起，搭伊一道早锻炼个王阿姨搭伊个病况相似，王阿姨个囡儿有门路，带伊个姆妈到了家三甲医院去做手术了，王阿姨现在勒囡儿屋里休养。我听了想了想，觉着要解开姆妈迭个“心结”，还是要陪伊去一趟医院，就讲：“姆妈，我没啥门路个，但是，可以陪你到三甲医院做只检查个，假使需要手术-----”伊马上打断我的闲话，讲：“没必要个，医生关照定期随访。王阿姨是两年前头就查出来有结节，搿趟检查又变大了，我没到搿地步，只不过讲讲。”
其实，爷娘侪是要强个，住勒养老社区七八年了，平常勿大麻烦我个，伊拉要个，无非是子女个“孝”个态度。
埃日天,勒食堂里碰到手术之后康复个王阿姨，几个老姊妹围牢伊讲，夸伊囡儿孝顺，王阿姨“谦虚”个讲：“我囡儿也没啥特别，就是蛮叫得动个。”老娘轻轻叫推推我，勒我耳朵边浪迓迓叫讲：“晓得伐，比孝，就是比啥人屋里个子女叫得动，王阿姨扎台型个哦。”
作者：周珂银；
讲述：李群
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
