来源：新民晚报
作者：杨锡高
沪语改写、讲述：李群
文字、语音审核：丁迪蒙
编辑：王乙其
面对难题，情商低个朋友总归“吃瘪”，情商高个朋友既摆平问题，又勿留痕迹。
情商，是指一个人勒情感领域里个智慧告应对能力。同样面对一道“辣手”个难题，或者一桩突发事件，情商低个朋友处理起来像只“呒头苍蝇”，没主意了，或者草草了事，越弄越推扳，拨人家骂一句“烂污三鲜汤”，阿只好“吃瘪”！而情商高个朋友胸有成竹，一出手就勿凡，既摆平问题，又勿留痕迹，赛过“刀切豆腐两面光”。覅小看摆平，摆平就是水平呀！
譬如家庭生活，情商低个，“吃力煞三军”；情商高个，“三军过后尽开颜”。
同事娟娟，天天抱怨屋里个大小事体侪要自家亲力亲为，每日天下班再衰瘏，也要撸起袖子上灶台，四十岁出头就跟广场舞大妈有得一拼了。而娟娟屋里个伊位也勒抱怨，勿是阿拉勿肯“买汏烧”，刚刚结婚辰光烧过几趟饭菜，但呒没一趟让新妇满意个，“鸡蛋里挑骨头”，勿是忒咸就是忒淡，“叽里呱啦骂山门”，实在吃勿消，索介袖手旁观，乐得吃现成饭了。
同样是同事，青青情商勿一般。结婚之后，勒先生第一趟下厨房捧出普通到勿能再普通个番茄炒蛋，青青偏偏翘起大拇指点赞：“哎哟喂，想勿到侬还有搿一手啊！假使再撒点葱花，勿输拨饭店里个大师傅唻！”勒太太激励下头，先生骨头轻啊，从此勿断钻研厨艺，再也离勿开锅碗瓢盆了。
朋友阿王搭阿平也是截然相反个例子。阿王每日夜饭板定要小老酒咪咪个，为之常庄会得跟太太吵相骂，大吵三六九，小吵天天有。而阿平呢，情商勿一般，当牢太太个面跟我讲：太太每日天精心烹饪三四只菜，我要是勿吃点酒，来煞勿及十分钟就吃好饭，搿是对太太辛勤劳动个勿尊重呀；假使咪点小老酒，陪牢太太嘎茄茄山胡”，搿再是一天当中搭太太最好个情感交流个黄金时刻。迭是我听到过个关于吃老酒个顶顶“美丽”个借口。
情商高个，总归是勿露声色解难题，看上去邪气丝滑。记得老弄堂里，住勒前楼个爷叔是一家国企个高工，每个号头工资八十几块，加上屋里向有点底子，小日脚蛮滋润。亭子间阿莉从农村顶替娘进了环卫所，男人尿毒症，呒没劳保，生活紧巴巴个。
阿莉刚刚来，看到前楼爷叔一本正经个腔势，有点吓丝丝个。有一天，两个人軋勒灶披间里烧菜。爷叔先开口：“阿莉啊，我年纪上去了，每日天早浪倒马桶是真生活，侬每天倒自家马桶个辰光，可以顺带便帮我拿马桶也倒一倒伐？我每个号头付侬十块洋钿好伐？”
阿莉有点勿好意思，想推脱。爷叔勒煤球炉浪葱烤河鲫鱼，倒了一勺子老抽，砰一声盖好镬盖，板仔面孔讲：“覅啰嗦，就就搿能定了！”阿莉勿好意思，轻轻叫讲：“外头倒马桶侪是七块，侬就付七块好唻！”爷叔讲：“就十块，定了！”
从此，爷叔再也呒没倒过一趟马桶，付拨阿莉个钞票也从十块慢慢叫增加到了十五块、廿块。直到老弄堂动迁，大家搬到了花园小区，有得抽水马桶了。爷叔501，阿莉502，两家约好再做邻居。
爷叔又出新花头了，跟阿莉讲：“我脚勿灵，侬帮帮忙，每日天夜快头帮我到楼下头信箱里拿夜报。夜饭吃饱看夜报，勿看夜报睏勿好，阿拉老上海习惯了呀！”
爷叔时勿时叫来阿莉，拿老单位发个、领导慰问个、朋友送个、子女孝敬个油、米、水果、干果老啥硬劲塞拨阿莉。
有趟仔老邻居聚会，嘻嘻哈哈当中，客堂间个阿姨讲爷叔：“上世纪七八十年代，阿拉工资三十六块，侬拿出十块，差勿多是小青年工资个三分之一，结棍哦！”爷叔淡淡叫一笑：“我看阿莉刚到上海，人生地勿熟，男人生重毛病，每个号头入不敷出，局促乌拉个，作为邻居能帮一把是一把！假使我直接拨阿莉钞票，可能伤了阿莉个自尊心。倒马桶是最好个方式，按劳取酬，心安理得！”
老邻居一听，侪啧啧称赞爷叔个情商是乓乓响个，既帮了阿莉，又勿让阿莉难堪。
讲述：李群
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
