作者：辛旭光
沪语改写、播讲：张娅佳（一）、金和平（二）
审核：郭莉
推荐：丁迪蒙
编辑：王乙其
（一）
朱家门里弟兄姊妹老多个，每到清明辰光，侪会得聚到朱舟山个屋里。舟山是朱家老三，但又是朱家个长子，爷娘原来就搭伊住勒一道。今年清明节祭拜祖宗以后，一家门七嘴八舌头要伊“汇报”到南通老家，去参加陈老伯伯“老兵回家奉安活动”个情况。
酒醉心头事。朱舟山叫家主婆拿两块银洋钿掯出来，拨大家传了看，又拿自家两只脚浪个袜子一脱，露出了长满老茧，粗糙个脚后跟。
故事开始从头说起：
1949年春天，上海解放，姆妈肚皮里个小囡已经八个号头了，勒厂里靠牢织布机接线头蛮危险个。好在伊从小勒华丰纺织厂做童工，手脚邪气勤快，老板一向看得起伊，同意伊回南通老家做舍姆。女人侪欢喜做舍姆，因为只有迭个机会好赖勒床浪。再穷个人家，自家个娘也会得想方设法搭舍姆娘炖只鸡，每日天还有碗红枣水潽蛋吃吃。
隔夜，姆妈就叫小姐妹搭自家拿头发剪短，发梢搭刘海侪用火钳卷起来烫仔一烫。勒上海，伊是翻班织布个女工，回到乡下头，就是大上海回来个姐姐，总归要让邻居小姊妹看得起。姆妈老早就准备好了一件小花头个衬衫，还有件蓝竹布衬衫，侪是上海滩女学生流行个行头。出来已经十几年了，伊老早就勿欢喜着斜襟襻纽个土布衣裳了。伊还随身带仔两块毛巾绢头，汏面揩汗侪可以，总归是见过世面个样子。迭个就叫穷勒屋里富勒路浪。清清爽爽回娘家做舍姆唻。
9月下旬个一个夜快头，阿伯破天荒叫了一部黄包车，拿姆妈送到十六铺码头去。
码头浪有山东来个“老八路”。伊歇辰光，“解放军”，迭个名称还呒没普及，大家侪叫伊拉老八路。迭眼老八路带勒红袖章站岗，地痞流氓坏料胚当然侪迓起来了。不过呢，上海刚刚解放，人群流动、乱哄哄个，客船少了交关，班次也勿固定，只好碰碰额骨头了。阿爸勿晓得从阿里弄得来一张退票，姆妈心里老早就想回娘家了，伊一把抢过船票就上船了，关照阿伯候下一班轮船赶过来。阿伯勒码头浪买了两只大饼拨姆妈，还算好，路勿算远，又是热天介，轮船一夜天个水路，明早上半日就好到南通了。
（二）
秋高气爽，姆妈坐个是客轮，超载了几百个客人，人声嘈杂，出了吴淞口，朝左转弯进入长江，明朝早浪向就好到南通了。五等舱是散舱，一条粘支疙瘩个草席朝地浪向一铺，姆妈难得着得介清爽，就拿条毛巾绢头垫勒屁股底下，靠了船舱个壁角落里坐下来，一只布头包里囥了铜钿，扎勒罩衫个里向。
搿班船严重超载，大通铺个客人侪翁到甲板浪向乘风凉看风景。黑黜黜里，有个矮墩墩个男人踢着姆妈一脚，伊弯仔腰勒寻绊脱个鞋子，姆妈摸到一只布鞋子厾仔拨伊，男个豪扫讲了声谢谢，一口南通海门口音，原来是家乡人呀！伊自报家门姓陈，想勿到，两家人家住勒一个镇浪个，只远开仔三里路。伊告诉姆妈，自家是脱大人家拉黄包车个，老板逃到香港去了，现在伊失业了，回老家去。姆妈让伊明朝下船个辰光过跳板，帮忙搀自家一把。
就搿能，昏昏沉沉个，轮船出吴淞口了，有眼小小个摆动。突然之间，“哇”，一声惊叫传过来，人侪翁到船舱里来了，只看见月光下头个船舱门口，有人勒挥动亮晶晶个枪，勿许人进出船舱，大家侪吓得一声也勿敢响。突然船又摇摆起来了，像吃着了横浪头一样。听到有人勒轻轻叫讲“船拨人家劫持了”。
有七八个人，拿枪顶牢仔船老大个头，船现在转方向了。原来是朝北要开到南通去个，现在出吴淞口之后朝南开了，听讲是要开到台湾去。有人就开始哭哭啼啼个叫起来了：“搿哪能办啦！”
第二天中浪向，船停到了一个大岛浪，拿枪个人大声宣布，伊拉是国军别动队，船到沈家门了，迭只船已经拨征用，作为运兵个船，船浪向身强力壮个青年一律登记当兵。
真是晴天霹雳呀，船舱里马上就哭天抢地、喊爷叫娘，一歇歇辰光，戴仔钢盔、端仔刺刀个士兵，就到船舱里来捉人了，姆妈快点护牢仔自家个大肚皮，只看见一群女个勒搭士兵们侬拖我拉，勿肯让伊拉抢走自家个男人。
作者：辛旭光
播讲：张娅佳（一）
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
