作者：辛旭光
沪语改写、播讲：钱美娟（五）、杜郁芬（六）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（五）
姆妈扳扳手节头算算日脚，还有十日天左右，自家就要养了。当家和尚碰着姆妈就合掌讲声“阿弥陀佛”。伊还叫送粥拨姆妈个小和尚来讲：“女善主有得喜了，最好另外寻只地方，勿要让血光冲撞了菩萨，养好小人侬再来呒没关系个”。听到小和尚迭能讲，姆妈想通了，要识相点，女人养小人是勿好再住庙里了。
搿天齐巧是八月十五，香客来了勿少，姆妈猜开店个老阿娘会得来烧香个，就等勒庙门口。真个，一歇歇就搭老阿娘碰头了。老阿娘嘴巴里勿断重复“阿弥陀佛，阿弥陀佛”，几句对话之后，老阿娘就问出了姆妈个难处。老阿娘双手合掌想了想，讲：“我个大伯屋里出去逃兵灾了，刚巧有几间新造好个柴房羊棚没用过。侬暂时可以去住下来。”
喔哟，姆妈听老阿娘一讲，也顾勿得啥个自尊了，马上就跟仔老阿娘离开寺庙了。
大户人家个柴房羊棚侪造得敞亮整齐，老阿娘叫小孙囡搬来捆稻草做铺垫，搿歇辰光，姆妈已经倦得只想马上坐下来，看看四周围侪是石头外墙，石板铺地，木门有得半个人介高，通风、透亮。羊棚一般侪勒大宅后头个，所以闲人也勿会过来。
天气勿算冷，小人总算勿会得养勒野地里了。姆妈摸摸自家个大肚皮，讲“小讨债呀，侬要晓得娘个难处，有命就活个养下来，没命勿要怪我哦……长大了也要记得，来拜拜此地个土地公公哦。”
姆妈是大脚，生活也是做惯个，伊拾了只马口铁空罐头，每日天中浪向到庙里去，多盛眼粥转来，一日三顿可以饿勿煞了。勒路浪向，姆妈又拾回来半条草席，铺勒身下头，睏个地方好平整眼，适意眼。
老阿娘有帮信佛个老姐妹，晓得伊收留了个大肚皮，侪会得带眼小囡个旧衣裳咾尿布咾啥送过来。“好人好报，長命百岁。”
姆妈谢天谢地。两边人侪是南腔北调，虽然相互听大勿懂，但是意思差勿多侪清爽个。
（六）
羊棚里住了勿到一礼拜，勒拿粥转来个路浪，姆妈个裤脚管血流出来了，是羊水破脱了。伊一路硬撑回到羊棚，等毛毛头流出来。
搿是姆妈第四次养小囡了，前头几胎侪是自家屋里个老娘来搭伊接生个，侪是顺产。所以姆妈勿怕养小人，只不过眼门前兵荒马乱，呒没亲人勒身边，手头一眼营养品也呒没。穷人做任何事体侪靠熬个，伊总归觉着自家个命硬，熬得过去个，呒没想到，经过一番劳顿惊吓，又呒没让人吃饱歇好个地方，乃末姆妈一睏到稻草铺浪就痛得来打滚呀。血水一直勒勒流，小囡勒肚皮里拳打脚踢，就是勿下来，姆妈痛得熬勿牢了，只好拼仔命咬牢仔毛巾绢头，心里向晓得，小囡养勒人家个地方，是勿好惊动人家个。
无边无际个痛，肚皮里所有个苦水侪倒出来了，呒没人陪伴，呒没水、呒没饭，再硬扎个身板也挡勿牢个。熬个辰光就变成了折磨，羊棚变成了地狱，姆妈捏牢仔满手个稻草，痛一阵又昏过去一阵。
迷迷糊糊个，伊又觉着自家勒织布机弄堂里奔，有数勿清个线头要接，拿摩温个棒头勒挥，自家一脚踏空，一只手节头拨梭子夹牢，鲜血嗒嗒渧，痛得浑身冒冷汗。一歇歇，又觉着羊棚顶浪有只蜘蛛挂下来，挂下来，就要挂到自家个面孔浪了。
迷迷糊糊个，又像煞看见三个流氓迓勒外头路口个黑洞里向，自家拼仔命个跑啊跑，搭攀鞋子落脱了，辫子拨伊拉拉牢了，伊回头咬了搿只手，第二只手又来拉牢伊个布衫，布衫拨伊拉扯破脱了。姆妈想喊救命，胡咙拨掐牢了，心跳得要飞出来了。搿歇辰光，又看见对面来了个挥舞扁担个人，一群人打成功一团。警笛响了。拿扁担个人长长大大个，挑仔副铜匠担子，拿伊送到屋里。
搿个男人每日天总归是勒弄堂口等伊夜班回来个。伊讲伊是海门人，是走街串户个铅皮匠，以敲畚箕、修锁、换镬底为生个。屋里爷娘看上了迭个长一码大一码个女婿，交代伊勒上海照顾好自家迭个囡儿。
作者：辛旭光
播讲：钱美娟（五）
播讲：杜郁芬（六）
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
