来源：新民晚报
作者：吴翼民
沪语改写、讲述：朱枫
文字、语音审核：丁迪蒙
编辑：王乙其
侪讲塞北搭江南差异老大，几乎完全是两只天地。就讲饮食风格伐，江南个精细搭塞北个粗犷也是壁垒分明，不过也有极个别重叠个地方，比方讲，吃羊肉。
塞北人吃羊肉一眼也勿奇怪，大片个草原真个是“风吹草低见牛羊”，塞北人哪能会得勿煞煞辣辣去享受呢？江南人同样欢喜吃羊肉，但是，到了江南，吃羊肉却是另外一只风景唻。每年秋风一刮，江南个城镇就到处打出了“藏书羊肉”个招牌。“藏书”，是苏州郊外个一只小镇，专门养羊，杀羊，吃羊个，字面看起来蛮雅致，羊肉则粗放，搭配勒一道别有情味。
热天刚刚过脱，苏州个大街小巷辣末生头就冒出了几百家羊肉店，我老家勿足百米个距离就有四爿之多，沿街面个居民拿门面房出租拨了藏书乡或者并非藏书乡个村民进城开店，侪极吼拉吼个想赚一季个铜钿。
一微微大个店堂里向邪气简单，门口头一只大镬子，高高个隆起一只杉木镬盖，旁边连牢仔柜台搭橱柜，熟羊肉搭各种下水杂碎分门别类切好摆勒海，砧墩板刀具搭秤盘摆勒边头，镬子里一直热气腾腾，店堂里漂勒海稍为带点羊臊气个羊肉香味搭蒜叶个味道。通常只有两三只台子，五六只长矮凳，侪拨碱水刷得清清爽爽，白乎乎个，要勿然，坐上去油滋隔腻，顾客是茄门相个。
苏州乃至江南人侪欢喜吃羊汤个。有人总结出“两饮搭两汤”个讲法，也就是“夏吃冷饮，冬吃热饮”，冷饮是“酸梅汤”咾啥，热饮呢，就是“羊汤”咾。羊汤真个是平民食品，老底子一只角子好买一海碗，肉是现切现称个，老少无欺，然后，拿切好个羊肉勒热汤镬子里烫一烫，再拿烧得哒哒滚个奶白色羊汤舀到兑好个蒜叶搭仔调料里，一碗诱人食欲个羊肉汤就端到了门前。我搭小囡是难得享用搿碗冬令美汤个，要吃，也只吃七分洋钿一碗个羊杂汤。埃歇辰光个羊肉汤或者羊杂汤续汤是免费个，好一直加下去。老板也从来勿会怕麻烦、嫌鄙侬，总归是笑眯眯个为侬续汤，好勒一大镬子个羊汤拨吃客续汤是足足有余个，勿会摆过夜。我看到过店主熬汤个排场，隔夜几乎是整只羊摆勒镬子里用文火笃，埃眼羊头羊骨经过文火搿能介慢慢叫一笃，汤鲜得来眉毛也要落脱唻，哪能会得推板呢？店家用一镬子热腾腾个羊汤吸引吃客，勒勒隆冬季节真个是吊足了大家个胃口。
有趣个是，伊个年月羊肉店勿单单受老年人欢迎，年轻人也欢喜个，羊肉店像煞是现在个咖啡馆，交关青年男女谈谈恋爱劈劈情操，居然会得选择小小个羊肉店——寒冬腊月外头冷飕飕，羊肉店里却热烔烔个。侬留意看看个闲话，小小店堂个角落头，常庄会得坐勒海一对对青年男女，一头吃热腾腾个羊肉汤，一头迓迓叫讲绵绵情话，碗里向个汤吃得差勿多了，男青年就会得立起来跑到大镬子旁边请店主续汤。店主呢，总归是一头笑眯眯望牢仔搿对青年男女，一头拎起勺子为伊拉添汤。店堂里暖意融融，一幅人间和美个图画。记得，我搭家主婆当年就有过搿能介个经历。顶脱了，埃个一碗续勿完个羊肉汤噢……
作者：吴翼民
讲述：朱枫
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
