作者：潘志豪
刊登：新民晚报
沪语修改、诵读：高仁
文字、语音审核：丁迪蒙
后期制作：高仁达
编辑：王乙其
我年纪轻个辰光，每日天搭一位女同事同路上班下班，迭能嘎走法走法，就像钱锺书先生写个“糊里糊涂地不知她在我心里做了小窝”，倷末伊就成为了我个女朋友唻。
有一日，伊告诉我：礼拜天到伊屋里去，去望望未来个丈人丈母娘。女朋友个爷娘讲个一口上海宁波闲话，显得老热络个。正当阿拉闲话讲得老扎劲个辰光，搿位未来个丈母娘招呼阿拉吃夜饭。只看见八仙桌浪摆上来几只宁波菜，众星捧月能嘎个围牢之当中个咸菜大汤黄鱼，飘过来一阵阵老好闻个香味道，咽下去好几口馋吐水。迭位未来个丈母娘还笑咪咪个关照我：“下饭呣槁（没有），饭要吃饱。”迭搿是我搭“宁波下饭”个第一趟亲密接触。
总算，我拨女朋友屋里承认为男朋友，成为一位新个脚色。由于伊拉屋里住房宽敞，阿拉婚后就搭伊爷娘一道居住，从此我就搭宁波菜结下了一段愉快个故事。
勒拉我个印象当中，宁波人真是“会过日脚”。我丈人丈母娘囥了交交关关个甏甏罐罐，迭些家生侪是用来腌制宁波小菜个。
有人讲，宁波菜个特点是：鲜、咸、臭。
鲜，迭个是毫无疑问个。比方讲，奉化个银蚶，据说以前是皇帝享用个贡品，而丈人阿爸自己做个银蚶，酒香扑鼻，血淋溚滴，虽然有眼吓势势，但是搿种肥嫩鲜美，简直是呒没闲话来！
咸，这是宁波菜最最明显个特点。丈人阿爸腌制个红膏呛蟹、鳗鱼鲞等，摆个盐勿多，入口也勿咸，甚至于有眼甜丝丝个。我有辰光“嘴巴淡接呱嗒”，就“揩点油”，偷盘子里个咸菜或者咸蟹脚当零食吃。
臭。有人形容宁波人的臭冬瓜、臭海菜果是“顶风要臭500米”来。丈人阿爸第一趟请我吃臭海菜果辰光，甏盖头一开，臭气马上飚出来，但是我尝了一口臭冬瓜，真所谓是唇齿留芳，迭种既臭又香个感觉，堪称一绝。后来我读到宁波籍著名作家王鲁彦（1901—1944）个一段文字讲：“有的人闻到了邻居的臭汤气（即臭卤），心里就非常神往，若是在谁家讨得了一碗，便千谢万谢，如得到了宝贝一般”，我立时三刻发出了会心个微笑。
臭冬瓜是丈人阿爸个下饭神器，他讲腌制发酵个搿股浓烈气味当中，听说有种青霉素个成分，能够杀菌开胃，勿晓得是真是假。有一年勒三伏天辰光，我生毛病睏勒床浪，胃口也呒没。丈人阿爸端来一碗臭冬瓜我马上会馋吐水溚溚滴，倷么，我搭丈人阿爸这对“臭味相投”个翁婿，拿迭眼臭冬瓜一记头吃得来碗底朝天！
宁波人拿小菜叫作“下饭”，文绉绉个。每日天开饭前，丈人阿爸总归习惯个问丈母娘：“今朝有啥下饭？”记得滑稽大师姚慕双、周柏春在《宁波音乐家》曾经打棚讲：吃饭个小菜叫（ou）下饭，格末吃粥个小菜叫啥？叫（ou）下作……到此，总会引起大家哄堂大笑。
我曾经发现，丈人阿爸平常辰光勿拿黄泥螺、臭冬瓜、虾酱、蟹糊、龙头烤老啥叫“下饭”个，而叫“压饭榔头”，因为伊拉是“宁波下饭”当中个“战斗机”。我第一趟听到叫“压饭榔头”，感到老新奇幽默个，推板一眼笑出声音来。而我个一位朋友伊讲，勿是“压饭”，而是“押饭”。搿种讲法好像有眼暴力色彩，让我想起《水浒传》当中董超、薛霸押牢之“豹子头”林冲发配沧州个情景……迭个恐怕有眼过度解读了伐。
我吃过甬菜馆饭店搭亲朋好友自己做个“压饭榔头”，算我实话实讲，呒没人能够比我丈人阿爸来赛个。有一趟，丈人阿爸看到一本刊物浪登了我写个小说《爱的宗教》，里相有一张半身照，伊就奖赏我几只腌制个小蟹拨我吃，蟹钳洁白如玉，肉质肥嫩鲜美，吃得我是“打耳光也勿肯放”。
我跟勒丈人丈母娘身边23年了，迭个一段日脚是我生命中吃到“压饭榔头”个一塔骨子。可惜，到了1992年，因为动迁关系，丈人丈母搭阿拉分开蹲了。虽然多年来，丈人丈母娘尽心尽力向我传授制作宁波菜个要领，可惜讲者有心，听者无意，直到今朝我仍旧一窍不通，真是愧对伊拉个在天之灵。
文章写到此地，我突然之间想起另外一个熟人——“老宁波”。
有一趟，“老宁波”问我：老潘，侬懂几种方言啊？我讲：四种，温州、苏州、宁波、上海。
伊考考我：小菜，宁波闲话叫啥？我答：叫“压饭榔头”。“老宁波”笑了：对！像黄泥螺、臭冬瓜、海菜果，迭个几只“压饭榔头”，勿停个拿侬喉咙口搿饭用榔头敲下去，形象（口+伐）？新鲜（口+伐）？全世界有啥地方个人会拿小菜叫“榔头”个？只有“哦呶”（宁波人自称）宁波人！讲搿几句话辰光，“老宁波”个声音比平常辰光还低了几个分贝，但是，却充满了宁波人个迭种霸气。
有人会问：“老宁波”是啥人啦？“老宁波”啊！是阿拉对伊个昵称；用书面语言来讲，伊是有名个——连环画大师贺友直先生！
诵读：高仁
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
