来源：海上一珠
作者：沈一珠
沪语改写、诵读：李群
文字、语音审核：丁迪蒙
编辑：王乙其
姆妈老房子居委会个小刘打电话来讲，申请个一只报警器到了，叫阿拉抽空去拿。问伊拉啥辰光方便？居委会迭种事业单位，中浪向一般是有休息辰光个。小刘讲，伊拉11
点半吃饭，下半天1点半再上班。因为下半天有事体，阿拉只好赶勒11点半前头到。
老破小住宅区，居委会办公室个门一推开，暗黜黜个，好几只写字台，人一个个坐得紧绷绷个。还好还好，一喊小刘，顶靠里个一只电脑后头露出了一只头，一面孔个阳光，小姑娘长得好看得来，像一个讲勿出名字个女明星。
报警器薄薄个一片，跟一片排骨年糕差勿多大小；看上去简单得勿得了，主要就是一红一绿两只键。揿绿键，居然出来一个上海女人个声音：有啥需要帮忙伐？漂亮个小刘请对方改一只联系电话。上海女人重复了一遍号码，讲：好，马上就改。然后，揿红键挂脱。蛮有意思个高科技，对一家头住个老人来讲，碰着要紧要慢个事体，多一个寻求帮助个渠道，是多少好个事体啊。
迭能一埭，又有机会到水城路个光明食堂吃顿饭，前一抢去过，赤刮辣新个环境，菜也过得去，点了红烧肉、黄瓜炒河虾，还有一只小荤一只蔬菜一碗饭，送紫菜虾皮汤一小碗，一共六十几块洋钿，比外头普通饭店吃顿饭要实惠交关。
搿趟再去，人更加多了，店堂里坐得拍拍满，有阿姨妈妈勒此地聚餐个，也有姆妈带小朋友吃便饭个，还有勒附近上班个小青年出来混顿中饭个。看看队伍，弯弯曲曲已经要伸到门外头去了，至少要排廿分钟朝外。
想想，吃碗馄饨伐，至少勿要排队；现包个菜肉馄饨还可以，有点自家屋里个味道……啥人晓得，拨前头一个爷叔插仔一档，就迭能，最后一碗馄饨卖脱了。问伊拉为啥勿多包点？买单个小弟讲，早浪四五点钟就开始包了呀……哦，搞勿清爽，是吃个人突然多出来了，还是材料预备得少了？看看辰光，也只有刚刚11点半……
诵读：李群
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
