作者：周云海
沪语改写、讲述：朱枫
文字、语音审核：丁迪蒙
编辑：王乙其
爷娘走了，爷娘住个房子还勒海，阿弟弟新妇仍旧住勒埃面。爷娘住过个下南路个屋里，有散勿脱个血缘亲情，有爷娘个生活气息，我常庄要到阿弟屋里去看看个。
今朝下半日又去了。阿弟笑咪咪个讲，今朝夜饭拨侬吃腌冬瓜。我搭弟新妇会心一笑——埃个是姆妈个传承。
腌冬瓜一般侪叫伊臭冬瓜，属于绍兴“三臭”之一——臭豆腐、臭苋菜杆、臭冬瓜。勒超市小菜场难板好看到伊个身影，两三小块邪气清爽个叠装勒小瓶小罐里，价钿勿便宜，没去买过，勿晓得是否臭。绍兴人屋里有臭卤甏，拿冬瓜汏清爽切成条块、苋菜杆或者毛豆之类个菜蔬摆进臭卤里浸腌个制作过程，叫“臭一臭”。迭个作动词理解个“臭”字、让我印象深刻。绍兴人家屋里个臭卤甏，交关食材侪好用伊来“臭一臭”个。
宁绍两地紧靠勒一道，风俗食趣差勿多。侪欢喜吃臭冬瓜个。
勿像绍兴人屋里个海菜菇（臭苋菜杆）端上台子搿能介个臭，姆妈传承个臭冬瓜搿道清凉小菜是勿臭个。我屋里没臭卤甏，腌冬瓜勿用臭卤去 “臭”，葛唠呒没臭味道，吃起来酸酸凉凉、松松软软，邪气爽口。我勿晓得搿是宁波版个臭冬瓜，还是姆妈祖传改良版个臭冬瓜，我个姨妈也是搿能介制作臭冬瓜个，屋里习惯叫伊腌冬瓜。
夏天介，从瓮甏里轻轻叫捞两块切得的角四方个带皮个腌冬瓜出来，摆进到碗盏里，用冷开水稍为汏一汏，去脱附勒瓜皮或者瓜肉浪个浮沫，拿碗盏倒过来，轻轻叫托牢腌冬瓜，沥干冷开水之后，滴麻油、撒点味之素，就是姆妈传承拨我伲个一只好吃又勿贵，制作便当个家乡菜。
腌冬瓜个标准是要有得酸味道。切成功大块个冬瓜，蒸熟、凉透，抹点盐，瓜肉朝下、瓜皮朝上，一毗毗一层层摆进瓮甏里，盖布罩好，过脱三五天就好拿出来吃了。腌冬瓜做得是否好，除脱仔冬瓜，还取决于两点，一，用盐得当，二，温度适宜。盐摆多了或者是温度偏低，腌冬瓜就勿会出酸味道。
今朝吃夜饭，阿弟勒吃饭台子浪摆了好几只荤蔬菜品，最讨俏个还是横勒碗盏里一蓬白云一样个腌冬瓜。我伲每个人先搛一小块瓜肉尝尝，瀴笃笃、软冬冬、咸滋滋，只是还少点酸味道——子女学做家乡菜，还呒没拿姆妈个看家本领完全学到手。其实，弟新妇从冰箱里拿出个腌冬瓜品相清爽、瓜肉细软，我连瓜皮也吃下去了。我提醒大家，腌冬瓜制作辰光覅摆到冰箱里去，勒常温下头再会得发酸。
书到用时方恨少。情到深时天怜鉴。我伲思念天堂个爷娘，学做一道道姆妈菜，腌冬瓜、腌梭子蟹、烤芥菜、咸菜塌蛋、醉鸡醉肉、油氽苔条花生、咸鲜油浸蘑菇……哦，还有酒酿搭仔八宝饭等甜食，可惜姆妈勿勒海了，弄勿懂个辰光呒没人好问了呀？
岁月悠悠，传承勿会放弃，姆妈个菜记牢勒心里。姆妈，每当学做搭品尝家乡菜个辰光，我伲倍加思念侬搭仔爸爸！
作者：周云海
讲述：朱枫
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
