作者：周云海
沪语改写、讲述：知足常乐
审核指导：丁迪蒙
编辑：王乙其
现在差勿多每个人侪有一只智能手机。手机通讯或者微信语音侪比座机电话便当交关，葛咾交关人注销了屋里向已经沦为摆设却还要付月租费个固定电话。不过我弟弟屋里向倒是一直保留座机个，为个是方便姆妈，因为伊年纪大了，勿会得用手机。
弟弟屋里个搿条固定电话线，连接了阿拉原生家庭开枝散叶之后个血缘亲情，维系了暮年姆妈历经风雨岁月之后，留剩下来个铭心友情。
姆妈虽然勿出门，屋里向个事体倒侪晓得个。
妹妹每日天搭伊打电话，讲讲一日三餐，家长里短。母女连心呀，一日天勿通电话，想煞唻。
我呢，差勿多是隔日搭老人家通只电话，问问伊好伐，想吃点啥咾啥。我常怕自家唠唠叨叨变得娘娘腔，加上我欢喜写写弄弄，干脆拿盈盈亲情写成功文章，告大家讲讲我搿生世个拳拳爱恋。
我搭姆妈之间有一只电话刻骨铭心。
埃日天气晴朗，姆妈个心情也像阳光搿能灿烂。电话埃头传拨我个是一波一波少有个开心：赞是赞得唻，三条带鱼，银光闪闪亮！我好像看到了姆妈眼睛里鲜带鱼笔挺个银光闪发闪发，闻到了姆妈闲话里宁波人个海腥味道。原来是弟新妇拿朋友送拨伊拉个海钓带鱼来孝敬公婆；弟弟告弟新妇只吃了鱼头鱼尾巴，肉段侪拨姆妈吃了。姆妈讲三条带鱼哦，通通吃进我搿个老太婆个肚皮里唻。电话里宁波老太石骨铁硬个声音传到我耳朵里，比平常辰光响仔交关！
啥人晓得，第二日老人家竟然一记头诀别人世了！埃个海钓带鱼成了阿拉母子两家头搿生世最后一只话题。回味电话埃头姆妈眉飞色舞讲拨我听个样子，我想姆妈一定是带仔银光闪亮个带鱼开开心心，毫无遗憾个游向大海去远行了。
姆妈走脱之后，弟弟屋里也注销了座机电话。阿拉兄妹三家头就用手机畅通手足亲情。
从前，我搭弟弟有事体讲事体，平常老少通电话聊家常个。注销座机之后，我搭弟弟个联系反而频繁了，特别是弟弟，常庄用手机叫我。开场白总归是：侬饭吃过了伐？呒啥事体，讲账讲账呀。姆妈走了，弟弟一改以往粗放个性格，变得婆婆妈妈欢喜闲讲账了。
妹妹勒微信浪发语音了，弟弟用手机叫我了……老婆常庄问我：妹妹搭侬讲点啥？弟弟搭侬讲啥事体？我搭伊讲，姆妈勿勒海了，阿拉拿思念高堂个心摆到手足情份浪来了。彼此勒手机浪聊聊家常，搿勿是无聊，是维系亲情。有人讲“树倒猢狲散”，阿拉屋里是绝对勿会散个！
阿拉曾经勒勒老人家生前保证过：㑚个小囡会得永远相亲相爱个，㑚放心好唻！
刚刚吃好夜饭，手机又响了，是弟弟打过来个……注销了屋里向个座机，阿拉个血缘亲情永远勿会注销！
作者：周云海
讲述：知足常乐
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
