作者：李大伟
沪语改写：朱枫
诵读：许建忠
文字、语音审核：丁迪蒙
编辑：王乙其
文革结束之后马上恢复高考。埃歇辰光，上海纯粹个文科大学只有三只：复旦、华师大、上师大。我最勿愿意考师范了，但是适合我搿种数学0分个偏科生，只有迭个华师大搭上师大了。
毕业辰光，辅导员征求意见，我回答得邪气爽快：只要勿到中学去，啥场化侪服从。我差眼分配到张家港港务局去做秘书。我勿欢喜教师迭个职业，是因为我中学班主任拨我个阴影。我从小就皮，只有体育老师欢喜我。中学呒没进入地区学堂，进了跨地域个体育班。班主任是文弱书生，面孔精精瘦瘦，戴副泛黄个塑料框眼镜，总归欢喜眯起眼睛看人，似笑非笑，让侬捉摸勿透，一看就是刁德一式个人物。学堂领导常怕伊压勿牢班级，专门设个副班主任，是迭只学堂唯一设副班主任个。先生姓沈名耀华，是田径教练，文革辰光第一个破全国1500米记录个选手“哈密瓜”，是伊训练个。三级跳冠军“黄豆”也是伊一手训练。要晓得，学堂个田径跑道是走道，60米还要转只弯唻。
我个娘文革前头是数学老师，我个数学老师搭我娘讲：
“侬个儿子哦！课上得来书也没唻”，照例应该是班主任负责批评教育，但是伊勿管勿问。原因是：一，我功课推扳，来得个木，还有点艮头艮脑。老师侪欢喜好学生，我从小学开始就拎得清个。另外，我爷娘邪气重视教育，常庄到学堂里寻伊，去得多就嫌烦，自然呒啥好面孔。再讲，我个爷娘无权无势，啥人睬侬呢！
有一日，上课辰光，伊当仔全班同学个面，拿一叠花花绿绿个塑料年历片厾拨我：“喏，还拨侬姆妈”。文革期间，“年历片”外贸机构是送拨外国客户个，社会浪邪气稀奇，我娘勒外轮代理公司做理货员，特地问领导要来送拨勒老师。结果呢，热面孔碰着冷屁股，自取其辱，当时我勿恨老师，恨个是姆妈！其实,侬“拒腐蚀、永不沾”，完全可以当场婉拒个 ，何必当全班又做婊子又立牌坊？何况大家心里侪煞辣势清，只有伊自以为天知地知：伊屋里个电视机侪是班里个无线电爱好者帮伊装个，从九寸到十四寸，毕业辰光伊拉侪分配到了好单位。
毕业之前我伲去学工，闲下来呒事体，有感而发，我写了四篇自以为是小说个小说，恭恭敬敬个誊写勒方格报告纸浪，一叠，伊来巡视个辰光交拨伊，请伊提修改意见。为啥交拨伊呢？首先伊是语文老师呀！另外，课堂浪伊流露出偏爱小说，但结果是：黄鹤一去不复返，泥牛入海无消息。侬忙，侬应该当场婉拒，起码完璧归赵。即使我投到报社去，素昧平生个编辑也会得拿稿子退还拨我，往往还会附几句勉励个闲话。但勒伊个眼睛里，侬勿配！
作者：李大伟
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
