作者：陆勇
沪语改写：丁一军
讲述：陈美莲
文字、语音审核：丁迪蒙
编辑：王乙其
往期回顾：乱世佳人（1）
勒上海市个弄堂里，一家人家一口气住勒老地方五十年个是邪气邪气少个。听我爷讲，我住个房子是
1960
年搬来个，勒弄堂里算是老住户了。
“我带侬看看呶。”老先生立起来，指指四周围：“搿水杉比房子个年龄还要大。”伊老客气个讲伊姓严。
我看房子，三层尖顶，尖顶个地方好看到烟囱，晓得房子里向有得壁炉个。门洞凹进去，刮风落雨辰光回屋里等开门辰光，就勿会得有淋着雨吃着风个尴尬。整幢房子拨水杉围勒海，囥勒老里向。沿牢弧形个水泥道走勒廿几步，门开勒海，里向有点暗。
走到二楼，一位老太等勒楼梯口，面孔也是邪气温和个。
“我太太。”老先生讲：“楼上楼下侪叫伊黄阿姨。”
“黄阿姨，我姓陆，打扰侬。”
“小陆先生，我窗口头看到㑚两家头过来。”阿姨笑笑。也是一头白发，但是梳得邪气整洁，还有点卷。我勒姆妈个老照片里也看到过搿能个发型。也是要纯个上海闲话，尤其是“先生”，是我勒老上海电影里向听到读音，舌尖发音个。弄堂里，一般先生介绍自家个家主婆，一般用“阿拉老太婆”、“老爱人”。叫太太个几乎呒没。我马上觉着有种穿越感。
我对搿对夫妻产生了好奇。伊拉语气侪是慢悠悠，邪气笃定，呒没夸张个热情，但绝对是客气、礼貌个，勿含一眼虚假，搿种温和、随意个待人接物，是经历过大世面、心底里向又坦然个人再有个。
老先生个房间老大个，朝南是落地钢窗，细长条个地板有几块破损、有得裂缝了，但是仍旧有光泽。家生是老式柚木个，三门个大衣橱，当中有整块玻璃，好照全身。五斗橱上头有三五牌台钟，瓷花瓶里插勒多年勿见个鸡毛掸子。沙发宽大厚重，坐上去隐约觉着里向有弹簧。勒墙角个小茶几浪，竟然还有台华生电风扇，已经没了黄铜个光头，但一点勿见破损，想必还好工作。
我所了解个老上海事体，是我老娘舅伊面听来个，零零碎碎，断断续续。老先生搭阿姨晓得邪气多，特别是阿姨。当年百乐门舞厅拨枪杀个舞女徐曼丽，黄阿姨像煞认得，讲伊“漂亮德勿得了”，“一双白颜色个高跟鞋，只有伊有”， 还讲“吴四宝个老婆勒静安寺百乐门美发厅门口头差点拨外国巡捕开枪打煞”。我好奇，问了眼细节，阿姨只是笑笑，只是讲：报纸浪后来讲，徐曼丽是拨日本人打煞个。吴四宝老婆命大，车夫保镖侪拨打煞了，伊一块皮也没伤着，但是魂吓脱了。
老先生讲搿房子是伊用勿少金条买个。但伊之前是报社或者是出版社个美术编辑，照我个经验，搿个职务勿大可能有力把个。阿姨像煞是家庭妇女，但是，伊哪能会得搭徐曼丽有得交往个？
讲述：陈美莲
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
