作者：陆勇
沪语改写：丁一军
讲述：牛美华
文字、语音审核：丁迪蒙
编辑：王乙其
往期回顾：乱世佳人（1）
严老先生讲起，勒做学生仔个辰光，欢喜到兆丰公园对过一家叫惠而康咖啡店去，一家头静静叫个吃咖啡、吃鸡排。伊勒伊面碰着黄阿姨，埃个辰光叫黄小姐。原话我勿记得了，大致是：“伊看我一家头呆笃笃坐勒海，就笑咪咪个走过来，坐勒我个对过，讲：“侬哪能总归是一家头啦？我来陪陪侬口伐。”我抬头看，伊着黑颜色个连衫裙，腰里向勃仔根两只节头介阔个红颜色腰带，老别致个。我一眼也勿吃惊，反倒脑子里一闪：做我个老婆口伐。老先生讲个辰光笑容满面，像煞回到了伊个年轻个时代。阿姨眯起仔眼睛默默个看牢伊，像煞是个姑娘，老有兴趣个听童话故事。
“老浪漫个呀。”我又看看照片，想象五十几年前头个艳遇，恍如隔世。
“其实，我看到伊好几趟了。我有把握个，只要我坐勒海，伊总归有一日会来搭我讲闲话个。”
“是新潮个自由恋爱。”我当时真个勿晓得哪能介夸奖了。伊拉年纪大我介许多，只好讲句老通俗个闲话。
两位互相看勒海，像煞是做了沟通。“我留学五年之后回来阿拉再结婚个。”老先生讲。老浪漫个一段爱情故事，老先生用勿能再简单个闲话，全部概括了。
搿段平常个小事体，我慢慢叫忘记脱了。因为欢喜画老上海个马路建筑，一个好心个朋友借仔几本上海个历史回忆书籍,夜里向睏勒床浪向翻翻看看。文章差勿多侪是老上海人回忆伊拉当时个生活。有篇小文章是讲上海交际花个，自然就讲到了唐瑛陆小曼等当时风头出足、耳熟能详个名媛，伊拉出身显赫，家境富足，风华绝代，结交名流，长袖善舞。伊拉个种种故事邪气传奇，拨当时辰光个人津津乐道。看发看伐，有个名字让我一惊：黄姬！
搿是一位专门写老上海掌故个作家写个，伊列数了几个上海交际花，讲：勒交际花里向，黄姬是个另类。还附了张照片，已经有眼模糊了，我勒灯光下头仔仔细细看，从轮廓、笑貌搭仔发型，我断定，伊就是廿多年前头我看到过个黄阿姨。
勒上海，老多家庭或者伊个上一辈个历史侪邪气模糊，甚至呒没人晓得。搿自然搭搿座移民城市个特征有关。从孤岛敌伪时期、抗战胜利国民政府接收、全国解放，一直到后来一系列个经历侪三缄其口，讳莫如深。后来又勿断冒出来一眼闻所未闻个故事，我听得也多了。黄阿姨就是黄姬，也就勿觉着老意外了。
黄姬出身于书香门第,最早引起热捧个是伊红舞女个身份。风头一度盖过所有交际场浪个名媛，可以讲是红得发紫个。从虹口个黑猫舞厅到兆丰公园个露天音乐广场，鬓影衣香，扇影花气。华尔兹、狐步、探戈，舞技高超，压倒群芳，西班牙舞、吉普赛惊鸿游龙，堪称一绝。翩翩公子大亨小开争相与舞，轮勿上个，坐只冷板凳，吸仔雪茄，一睹芳泽。
讲述：牛美华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
