作者：陆勇
沪语改写：丁一军
讲述：徐辉
文字、语音审核：丁迪蒙
编辑：王乙其
往期回顾：乱世佳人（1）
搿场谈判，从开始到分手、前后只有一个礼拜。啥人也呒没想到个是，黄姬早在一年之前，已经买了一幢房子，埃位留学回来个严少爷已住勒里向了。所有回忆文章，侪呒没提到埃幢房子勒啥地方，想必是当时黄姬勿愿意让任何人晓得。事体做得老清爽个，呒没一眼眼草蛇灰线。
从此，黄姬消失勒所有人个眼睛里。呒没人晓得伊勒拉阿里个。众说纷纭，种种传说，侪是讲勿清爽。但是勿论阿里种讲法，结果就是黄姬搭过往一刀两断，毫无瓜葛。搿突然个变化，像煞是有高人点拨，一朝醒过来回头，又像煞是伊预感时局将要变化，马上抽身。
第二年抗战胜利，范三林作为汉奸，拨国民政府逮捕、判十五年徒刑，三年之后死勒提篮桥监牢里。有人讲黄姬犯有“附逆罪”，却始终呒没证据，再讲，伊搭范三林已经离婚，搭总会也呒没一眼牵连。也有讲，国民政府高层有人发话，总之，黄姬是安然无恙，勒僻静个小花园，勒自家个爱巢里，跟牢仔严先生过平静无忧个日脚。
看尽了浮华个世相，更加爱惜平淡个人生。激荡汹涌个河流，最终还是拨平波如镜子个深潭征服。坐勒勿拨人家晓得个咖啡馆个一只角落里，“陪侬吃鸡排吃咖啡”，勒一个人个心底深处、向往个随意搭仔恬静。
不过，我还是难以拿一个安静和顺个黄阿姨搭仔洒脱一时个乱世佳人联系勒一道，好像有种勿真实个感觉。大千世界，同名同姓个老多个，相似经历个也老多个。或许，搿是一种巧合，是我个猜测。辰光忒长了，我是呒没办法寻到一个确切个答案了。
上个号头，我特为去了搿家总会个旧址，从大铁门朝里向望进去。埃幢大洋房已经修缮过了，焕然一新，但是，仍旧透出来半个世纪前头个闹猛搭仔奢靡。现在，伊是乐团，勿允许参观。
随后，我转入勿远个弄堂，弄堂里向邪气安静，呒啥人，高大个水杉还勒海，白云飘过。走到铁门里向，廿年前头我看到过个埃幢小洋楼，已经改造成了一家会所。院子里一面种了花草，一面挖勒只小池子，池子边浪摆勒只长台子，十几把木头椅子整齐个围牢勒海，好像是静静叫个等待客人个到来，我一阵恍惚，怀疑自家跑错地方了，疑心廿年前头是否到过搿搭？是否勒搿搭碰着过严先生，看到过黄阿姨？
我呒没再朝里走，远远叫拍勒张照片。一个胖笃笃个中年男人走出来，眼光警惕个看牢仔我。
“先生，问一下，搿搭是否有个黄阿姨？”“黄阿姨？”男人一面孔个迷惑。
“我还是廿多年前头来过个。伊住勒二楼。”我搿能问，但是心里晓得，黄阿姨肯定勿勒海了。胖男人摇摇头：“搿搭是家艺术空间，已经有靠十年了。侬讲廿年前头个事体，搿搭呒没人晓得个。”
我讲声谢谢，退出来。走了几步，又回头看仔一眼，房子拨水杉密密猛猛个遮勒海，看勿见。有几只小鸟勒树丛个空挡里飞过去。
讲述：徐辉
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
