作者：周钰栋
上海话改写：郭莉
讲述：王维杰
文字、语音审核：丁迪蒙
编辑：王乙其
所谓料瓶商店，就是专门出售老百姓勒勒日常生活当中，一定会用得到个各种瓶瓶罐罐个商店，像油瓶、酱油瓶、酒瓶、花露水瓶以及盐钵斗、糖罐头咾啥。
第一次到料瓶商店，是搭我阿姐一道去个。到了店里，两家头分别勒柜台面前仔细挑选，最后阿姐用三分洋钿买了只造型别致个雪花膏瓶，我用一分洋钿买了只墨水瓶。走出料瓶商店，两家头直接到百货商店零拷柜台去，阿姐用一角五分拷了满满一瓶雪花膏，我呢，四分洋钿拷了瓶蓝黑墨水，刚刚买得来个瓶子各得其所，心里邪气开心。当年，交关小姑娘、学生子，侪像阿拉搿能，寻到料瓶商店，用自家勿多个零用铜钿，就好满足自家小小个心愿。
当然，到料瓶商店里去淘只油瓶或者老酒瓶，也是交关当家人欢喜个事体，毕竟日常拷油、拷老酒侪要用到个。当年糖、油侪是需要凭票限量供应个，上海市区居民一个号头每人食用油只配半斤，家家户户侪必须精打细算，量入为出，每次拷油自带油瓶，以“两”为单位购买，以免屋里向寅吃卯粮。
料瓶商店最闹猛个辰光就是每年个冬夏两季。冷天介用来取暖个热水袋价钿邪气贵，还要凭工业券购买，所以大家目光侪瞄准了料瓶店里向，伊眼医院里打吊针用个盐水瓶。一只一角洋钿，用橡皮塞头塞牢就可以确保瓶子灌满水了，也是滴水不漏，真是价廉物美。买回来灌满热水，日里向捧勒手里焐手，夜里向摆刀被头洞里可以焐脚。我呢，每趟学堂组织春游秋游个辰光，还要拿伊当水壶用。装满一瓶子开水，摆勒书包里，途中可以解渴。
到了大热天，料瓶商店里最吃香个就是啤酒瓶了。因为当时买啤酒，必须用空瓶子去调，屋里呒没啤酒瓶，就买勿了啤酒。伊歇辰光啤酒还常庄断货个，往往十天半个号头才会有一趟供应，一旦有货，就板定大排长队，所以居民勒料瓶商店里买啤酒瓶，大多数侪是一买五只、十只，甚至一记头买满满一箱子廿四只，摆勒屋里向备用。
1968年底，波澜壮阔个知识青年上山下乡运动开始，料瓶商店里，马口铁做个月饼盒子搭仔茶叶罐头就行俏了。做爷娘个侪用月饼盒子装满自家屋里精心烘炒个炒麦粉，让出远门个子女带勒海，以备勒山乡荒村饥饿辰光点点饥、救只急；茶叶罐头呢，用来装点针头线脑，做针线包个；也好装点医用纱布、橡皮胶、红药水，还有啥个磺胺粉啊、阿司匹林啊、黄连素咾啥个常用药，茶叶罐头变成功只保健盒，让勒外头战天斗地个小囡多份保险。迭眼瓶瓶罐罐，搭仔“儿行千里母担忧”个万般情愫一道，伴随仔交交关关个知识青年，度过了伊段难忘个艰难岁月。
到了上世纪七十年代初，市面上行自家做家生个热潮。五斗橱、茶几之类家生做好了，台面浪向空荡荡个，勿好看，乃末大家又想到了料瓶商店。到店里去选几只大号个饼干桶、麦乳精罐头搭仔月饼盒头来装饰台面。搿种大号个饼干桶，五面侪有漂亮个图案。有样板戏剧照，有花鸟虫草，买回来朝五斗橱台面浪向一摆，美观大方，真是蓬荜生辉呀。要是勒罐头、盒子里装眼自备个糖果、干果之类个小吃，摆勒茶几浪，既是种装潢点缀，待客辰光也显得大气、热情。
真个要感谢料瓶商店，勒勒伊个物资匮乏个年代，伊既为市民群众生活提供了种种方便，也节约了大家个日常开支。今朝看来，伊更重要个贡献是，为物资个循环利用，树立了邪气好个样板。
讲述：王维杰
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
